yahan jaan par bani hai yar mere

yahan jaan par bani hai yar mere
tujhe apni padi hai yar mere
meri aankhon mein jo mahngi jagah thi
ghamon ne gher li hai yar mere


dararen hain jo ye diwar-o-dar mein
ye buniyaadi kami hai yar mere
meri haalat pe kyon hairat-zada hai
mohabbat ho gai hai yar mere


khudi par she'r kahna chahta hun
koi bidi padi hai yar mere
zabani tir phenke ja raha hun
kaman tuti padi hai yar mere


na uth jae koi diwar ghar mein
taraazu aa chuki hai yar mere
sitamgar ne mujhe barbaad kar ke
mu'afi mang li hai yar mere