یہاں جاں پر بنی ہے یار میرے

یہاں جاں پر بنی ہے یار میرے
تجھے اپنی پڑی ہے یار میرے
مری آنکھوں میں جو مہنگی جگہ تھی
غموں نے گھیر لی ہے یار میرے


دراریں ہیں جو یہ دیوار و در میں
یہ بنیادی کمی ہے یار میرے
مری حالت پہ کیوں حیرت زدہ ہے
محبت ہو گئی ہے یار میرے


خودی پر شعر کہنا چاہتا ہوں
کوئی بیڑی پڑی ہے یار میرے
زبانی تیر پھینکے جا رہا ہوں
کماں ٹوٹی پڑی ہے یار میرے


نہ اٹھ جائے کوئی دیوار گھر میں
ترازو آ چکی ہے یار میرے
ستم گر نے مجھے برباد کر کے
معافی مانگ لی ہے یار میرے