ye aalam ab dhuen ka kar-KHana lag raha hai

ye aalam ab dhuen ka kar-khana lag raha hai
barah-e-rast sanson par nishana lag raha hai
hamare ahd ki haiwaniyat ka surkh qissa
qurun-e-jahiliyat ka fasana lag raha hai


charaghon ko muhayya kijiye suraj-panahi
hawaon ka rawayya jarehana lag raha hai
tera mamnun hun ai jazba-e-sahra-nawardi
sulagti ret ka manzar suhana lag raha hai


hamari waza-dari ko saraho chaarasazo
naya zakhm-e-talluq bhi purana lag raha hai
hum apne sabz-o-nam uslub ke mare hue hain
naya lahja bhi ab hum ko purana lag raha hai


kisi aahang-e-nau ki justuju mein hai musalsal
ye mera dil jo be-tabl-o-tarana lag raha hai
hazaron suraten hain munakis chehra-ba-chehra
makan-e-shash-jihat aaina-khana lag raha hai


hamein darkar hai ek dusre ka kasa-e-sar
ba-zahir hum mein gahra dostana lag raha hai
zamin ki gahri khamoshi nahin be-wajh 'jauhar'
zamin mein dafn raazon ka khazana lag raha hai