یہ ایک کام بچا تھا سو وہ بھی کرنے لگے

یہ ایک کام بچا تھا سو وہ بھی کرنے لگے
نفس نفس میں اداسی کے جام بھرنے لگے
ابھی تو ان کو مرتب ہی کر رہے تھے ہم
خیال صفحۂ قرطاس پر بکھرنے لگے


ستم ظریفیٔ دوراں بھی راس آنے لگی
یہ کس کی زلف کے سائے میں ہم سنورنے لگے
اداس نسلوں کو درکار ہے اک اور سفر
رخ سحر پہ شبوں کے نقوش ابھرنے لگے


مسافران تغیر ہیں کیسے سادہ مزاج
حیات نو کی بشارت پہ کان دھرنے لگے
بس اتنا قصہ ہے آنکھوں میں خواب آنے کا
اٹھے سنبھل کے چلے اور پھر ٹھہرنے لگے