یہ عبادت ہے الگ عشق کے معیار الگ

یہ عبادت ہے الگ عشق کے معیار الگ
تیرے دیوانے الگ تیرے پرستار الگ
اس کے دیدار سے بھرتا ہی نہیں دل اپنا
جب بھی دیکھو اسے لگتا ہے وہ ہر بار الگ


جس میں آئی تھی خبر آپ کے لوٹ آنے کی
میں نے رکھا ہے ابھی تک کے وہ اخبار الگ
اک ذرا بات پہ رشتوں کے بھرم ٹوٹ گئے
ہو گئے در بھی الگ ہو گئی دیوار الگ


دل کی بے چینی کو آرام نہ مل پایا کہیں
ہو کے اس یار سے دیکھا ہے کئی بار الگ
ہم بھی یوسف تھے تو کم دام میں بکتے کیسے
اپنا بازار الگ اپنے خریدار الگ