یہ عشق وہ ہے کہ جس کا نشہ نہ اترے گا

یہ عشق وہ ہے کہ جس کا نشہ نہ اترے گا
اس آسمان سے اب یہ خدا نہ اترے گا
یہ رنگ گریہ رہے گا جو تیرے کوچے میں
ادھر سے کوئی بھی ہنستا ہوا نہ گزرے گا


جو تیرے پاؤں فلک پر دھرے رہے یوں ہی
زمیں پہ سبزۂ رنگ حنا نہ اترے گا
لگا دیا جو اسے میرے خون ناحق نے
زبان شہر سے اب یہ مزہ نہ اترے گا


اتار لائے کسی بھی غبار راہ کا عکس
اب اس قدر بھی مرا آئنہ نہ اترے گا
ندی پہ مہر لگا دی شناوری نے مری
اس آب خاص میں اب دوسرا نہ اترے گا


لذیذ بھی ہے رواں بھی بہت مگر احساسؔ
مرے گلے سے ترا ذائقہ نہ اترے گا