یہ جو باہر خدا سے ڈر رہے ہیں

یہ جو باہر خدا سے ڈر رہے ہیں
بہت کچھ دل کے اندر کر رہے ہیں
ابھی دیکھا ہے کچھ ٹی وی میں شاید
مرے بچے مجھی سے ڈر رہے ہیں


ارادہ ہے مرا گھر بیچنے کا
پڑوسی خوب خاطر کر رہے ہیں
یہاں پر کوئی دریا دل نہیں ہے
سب اپنے گھر کا پانی بھر رہے ہیں


تری خوشبو سے جو واقف نہیں ہیں
وہ پھولوں سے گزارہ کر رہے ہیں
نکل آئے تو پھر رونے نہ دیں گے
ہم اپنے آنسوؤں سے ڈر رہے ہیں


ٹہلتے پھر رہے ہیں سارے گھر میں
تری خالی جگہ کو بھر رہے ہیں