یہ جو ویرانے میں بیٹھا ہوا ہے

یہ جو ویرانے میں بیٹھا ہوا ہے
کسی آواز سے بچھڑا ہوا ہے
تلافی اس کی تنہائی سے ہوگی
تری محفل میں جو گھاٹا ہوا ہے


کہاں تک مٹی سمجھوتے کرائے
ہمارا چاک سے جھگڑا ہوا ہے
لچک تھی ہی نہیں گردن میں اپنی
بڑی مشکل سے اک سجدہ ہوا ہے


مجھے پینا ہے جس کوزے میں پانی
ابھی وہ چاک پہ رکھا ہوا ہے
سجاتا رہتا ہوں جو شاعری میں
وہ سب کچھ آپ کا پھینکا ہوا ہے


اندھیری رات ہے اور ایک جگنو
فضا میں دور تک پھیلا ہوا ہے
پلے گی کس طرح نسل مصنف
کتابوں میں یہی لکھا ہوا ہے