یہ کہہ کے اور مرا صبر آزمایا گیا

یہ کہہ کے اور مرا صبر آزمایا گیا
وہ راہ پر تھا مجھے راستے پہ لایا گیا
پتہ تھا کوئی کسی کو نہیں منائے گا
سو اختلاف زیادہ نہیں بڑھایا گیا


اب اس خیال نے نیندیں حرام کر دی ہیں
وہ کوئی تھا بھی جسے عمر بھر بھلایا گیا
کچھ ایسی کیفیت وجد تھی کہ پھر ہم سے
تماشبیں کے لئے کچھ نہیں بچایا گیا


خیال آیا کہ بے چہرگی ہی اچھی تھی
کبھی یہ چہرہ اگر کام میں بھی لایا گیا
تو جانیے کہ یہ صحرا یہ دشت سب بے کار
اگر جنوں کو تماشہ نہیں بنایا گیا