یہ مت سمجھنا کوئی بد نما سا داغ ہیں ہم

یہ مت سمجھنا کوئی بد نما سا داغ ہیں ہم
کسی کی آنکھ کا جلتا ہوا چراغ ہیں ہم
ملے گا ہم سے ہی تجھ کو پتہ محبت کا
ہمیں سنبھال کے رکھ آخری سراغ ہیں ہم


ہمارے جلنے جلانے سے فائدہ کیا ہے
کہ اپنے طاق سے بچھڑے ہوئے چراغ ہیں ہم
لپیٹ رکھا ہے خود کو انا کی چادر میں
سبب یہی ہے کہ اندر سے داغ داغ ہیں ہم


کسی کے پیار کو ہم مصلحت سمجھ بیٹھے
یقین ہو گیا نادرؔ کہ بے دماغ ہیں ہم