ye mera shisha-e-dil be-misal hai pyare

ye mera shisha-e-dil be-misal hai pyare
dikhai de hai kahan jitna baal hai pyare
har ek baat ko likhna muhaal hai pyare
khud aa ke dekh lo jo dil ka haal hai pyare


jahan se chaha hamein lakht lakht kar dala
bina chhuri ke ye kaisa kamal hai pyare
mita do husn-e-gulistan ko shokh phulon ko
ho lab-kusha koi kis ki majal hai pyare


jhulas ke rah gae gulshan mein aashiyan kitne
teri bahaar mein kitna jalal hai pyare
kisi ka khun 'adalat mein phir hua hoga
sutun-e-dar-o-rasan lal lal hai pyare


kahan kisi ki bhi surat dikhai deti hai
har aaine mein to tera jamal hai pyare
har ek sans hai anfas-e-baz-pas ki tarah
nizam-e-dam mein dama-dam wabaal hai pyare


wo aa ke laut gae meri dewdhi se 'sahar'
sukun-e-dil ke liye nek-fal hai pyare