ye shan-e-wafa gham ki hikayat se mili hai

ye shan-e-wafa gham ki hikayat se mili hai
daulat mujhe ye dard-e-mohabbat se mili hai
aalam ko bahaaran hai kiye us ki tamanna
gulshan ko mahak phul ki sohbat se mili hai


ek hashr hai us ka kisi kuche se guzarna
raftar ki had hadd-e-qayamat se mili hai
zarre se jo sunta hun main suraj ki kahani
ye aagahi muddat ki riyazat se mili hai


mushkil ki har ek shakl pe mera hai tasarruf
mujh ko ye sanad shah-e-wilayat se mili hai
is qaum ke ab koi bhatakne ka nahin dar
manzil jise sadiyon ki masafat se mili hai


tum yaad na rakkho mujhe lekin ye rahe yaad
shohrat tumhein meri hi mohabbat se mili hai