ye tamanna nahin ki mar jaen
zinda rahne magar kidhar jaen

aisi dahshat ki apne sayon ko
log dushman samajh ke dar jaen

wo jo puchhe to dil ko dhaaras ho
wo jo dekhe to zakhm bhar jaen

bach ke duniya se ghar chale aae
ghar se bachne magar kidhar jaen

ek khwahish hai jism se mere
jald se jald baal-o-par jaen

ab ke lamba bahut safar in ka
in parindon ke par katar jaen

sochte hi rahenge hum shayad
wo balaen to un ke ghar jaen