zaban pe lafz hai mera zaban hai uski

zaban pe lafz hai mera zaban hai us ki
har ek tir hai mera kaman hai us ki
udhaar mang ke laya hun chahe jab le le
bahut sanbhaal ke rakkha hai jaan hai us ki


usi ke dam se hai qaem meri ana ka bharam
hai meri aan salamat ye shan hai us ki
bahut qadim hai lekin jadid hai phir bhi
ba-qaid-e-umr ye duniya jawan hai us ki


har ek sham hai us ki malamaton ki amin
har ek subh sabahat-nishan hai us ki
zamin ka farsh hai us ka ki khwan-e-neamat hai
khudai jis ke liye mehman hai us ki