زہے نصیب کہ امکان زیست اب تک ہے

زہے نصیب کہ امکان زیست اب تک ہے
تمہارا ہجر ہی عنوان زیست اب تک ہے
کسے پڑی ہے جو آ کر سنے کہانی مری
مرے وجود پہ بہتان زیست اب تک ہے


بہت ہی دیدنی منظر تھا میری وحشت کا
تبھی سے چاک گریبان زیست اب تک ہے
محبتوں میں ازل سے سبھی نے غم ہی سہا
محبتوں میں تو نقصان زیست اب تک ہے


نکالا جس کو بغاوت پہ تھا قبیلے نے
نہیں مرا وہ تو مہمان زیست اب تک ہے
کہاں ملیں گے سنواریں گے ایک دوجے کو
تری طلب مجھے دوران زیست اب تک ہے


ابھی قلم بھی ہے باقی مرے یہ مصرعے بھی
مری تو کٹیا میں سامان زیست اب تک ہے
کبھی بھی یاد مصیبت میں غیر کو نہ کیا
مرا خدا ہی نگہبان زیست اب تک ہے