زلزلوں کا اثر نہیں ہوتا

زلزلوں کا اثر نہیں ہوتا
گھر ادھر سے ادھر نہیں ہوتا
صرف شعلوں کی داد ملتی ہے
کیا سلگنا ہنر نہیں ہوتا


ریل گاڑی سے کود جاؤں کیا
اب اکیلے سفر نہیں ہوتا
عشق اس فیصلے کو کہتے ہیں
جو کبھی سوچ کر نہیں ہوتا


قبر میں روز حشر سے پہلے
زندہ ہونے کا ڈر نہیں ہوتا
سب کرشمہ ہے شعر ہونے کا
شعر کہنا ہنر نہیں ہوتا


میں ہی زخموں کو چھیڑ دیتا ہوں
جب کوئی چارہ گر نہیں ہوتا
جس کے قبضے میں دنیا ہوتی ہے
اس کا دنیا میں گھر نہیں ہوتا