zamin se dur sitaron ke darmiyan raushan

zamin se dur sitaron ke darmiyan raushan
siyah raat mein kab se hai kahkashan raushan hai
shafaq-misal lahu-rang meri khak hui
'aza ki sham hua mera ashk-dan raushan


nasheb-e-huzn mein sham-e-siyah-bakht kati
phir ek charagh hua shab pe mehrban raushan
yahin kahin tha andhere mein ma'bad-e-zartusht
qadim aag se hain mash'alen jahan raushan


barahnagi ne bhi roka na archimedes ko
'ajab ghadi thi hui fikr-e-nukta-dan raushan
safar-nasib hun main mah-e-nim-mah ki shab
charagh-e-kohna se hai taq-e-asman raushan


sitara ho ki parinda koi khabar lae
hameshgi mein hai kya qasr-e-la-makan raushan