zindagi kar gai tufan ke hawale mujh ko
ai ajal kashmakash-e-gham se chhuda le mujh ko

kuchh to le kaam taghaful se wafa ke paikar
ye tera pyar kahin mar na dale mujh ko

wah ri qismat ki kahan manzil-e-maqsud mili
jab maza dene lage panw ke chhaale mujh ko

aakhiri waqt talak sath andheron ne diya
ras aate nahin duniya ke ujale mujh ko

koi bhi mohsin o rahbar hi nahin hai mera
yun to 'danish' hain bahut chahne wale mujh ko