ai zamiin aasmaan ke maalik
saarii duniyaa jahaan ke maalik

tere qabze me.n sab khudaa.ii hai
tere hii vaaste ba.daa.ii hai

aa.ii mausam se tang jab khilqat
tuu ne mausam kii dii badal suurat

garmiyaa.n ho ga.ii.n ajiiran jab
tuu ne barsaat bhej dii yaa-rab

sab ke garmii se the khataa ausaan
me.nh barasne se aa.ii jaan me.n jaan

ga.e jab log me.nh se sab ghabraa
hukm se tere chal pa.dii pachhu.aa

jaa.daa aa pahu.nchaa aur ga.ii barsaat
dam ke dam me.n badal ga.e din-raat

phir lagii pa.dne jab bahut sardii
mushkil aasaan tuu ne phir kardii

jaa.daa aakhir hu.aa aur aa.ii bahaar
jangal aur tiile ho ga.e gulzaar

tuu yuu.nhii rut pe rut badaltaa rahaa
yuu.nhii duniyaa kaa kaam chaltaa rahaa