raat aa ga.ii chaman ke nazaare bhii so ga.e
nadiyaa ko nii.nd aa ga.ii dhaare bhii so ga.e

niile gagan ke raaj-dulaare bhii so ga.e
soyaa hu.aa hai chaa.nd sitaare bhii so ga.e

nii.nde.n ghulii hu.ii hai.n nashiilii havaa.o.n me.n
so jaa re laadle mire aa.nchal kii chhaa.o.n me.n

champaa bhii so ga.ii hai saliimaa bhii so ga.ii
abbaa bhii mahv-e-khvaab hai.n aapaa bhii so ga.ii

gu.diyaa kii chor kal.mu.ii azraa bhii so ga.ii
le ab to terii nannhii bhii mainaa bhii so ga.ii

nii.nde.n ghulii hu.ii hai.n nashiilii havaa.o.n me.n
so jaa re laadle mire aa.nchal kii chhaa.o.n me.n

kal phir sunaa.uu.ngii tujhe sachchii kahaaniyaa.n
ruus aur chiin des ke logo.n kii daastaa.n

jin kii vatan-parast javaa.n-saal la.dkiyaa.n
mardo.n se ba.dh ke apne vatan kii hai.n paasbaa.n

nii.nde.n ghulii hu.ii hai.n nashiilii havaa.o.n me.n
so jaa re laadle mire aa.nchal kii chhaa.o.n me.n

chup-chaap aur khamosh hai har ek rahguzar
panchhii bhii so rahe hai.n darakhto.n pe be-khabar

ab der ho chukii hai mire laal zid na kar
jaanaa hai madrase tujhe kal sub.h vaqt par

nii.nde.n ghulii hu.ii hai.n nashiilii havaa.o.n me.n
so jaa re laadle mire aa.nchal kii chhaa.o.n me.n

kal sub.h jab mai.n paas ke baazaar jaa.uu.ngii
'siraaj' aur 'tiipuu' kii tasviir laa.uu.ngii

aur un kii zindagii kii kahaanii sunaa.uu.ngii
tujh ko bhii vaisii shaan se jiinaa sikhaa.uu.ngii

nii.nde.n ghulii hu.ii hai.n nashiilii havaa.o.n me.n
so jaa re laadle mire aa.nchal kii chhaa.o.n me.n

phuulo.n kii shaahzaadiyaa.n baago.n kii raaniyaa.n
jaa.e.ngii khvaab me.n tire ham-raah gulsitaa.n

aur dhuu.nd kar tire liye laa.e.ngii titliyaa.n
hai.n tere intizaar me.n khvaabo.n kii vaadiyaa.n

nii.nde.n ghulii hu.ii hai.n nashiilii havaa.o.n me.n
so jaa re laadle mire aa.nchal kii chhaa.o.n me.n