hasin chehron se surat-ashnai hoti rahti hai

hasin chehron se surat-ashnai hoti rahti hai
samajh lo ibtidai karawai hoti rahti hai
hamari biwi aur mahngai donon hain sagi bahnen
hamari jeb ki aksar safai hoti rahti hai


kaha main ne ki milte ho bichhad jaane ki niyyat se
kaha us ne mohabbat mein judai hoti rahti hai
kaha main ne meri darkhwaston ka kya bana aakhir
kaha us ne ki un par karawai hoti rahti hai


kaha ladke ki ammi ne rahegi khush sada beti
ki upar se bhi ladke ki kamai hoti rahti hai
tere pand-o-nasaeh ka natija sifr hai naseh
burai hoti rahti thi burai hoti rahti hai