main tutor tha main ghar ghar padhata phirta tha
mudarrisi ki bandariya nachata phirta tha

kahin main sofe pe baitha kahin chatai par
kahin tikaya gaya kharri chaarpai par

kahin se nikla kisi lal ki pitai par
kisi aziz ne tarkha diya mithai par

main tutor tha main ghar ghar padhata phirta tha
mudarrisi ki bandariya nachata phirta tha

na koi sham meri apni sham hoti thi
ki meri sham to bachchon ke nam hoti thi

pa jab kisi ki mami ham-kalam hoti thi
to mere alam ki turki tamam hoti thi

main tutor tha main ghar ghar padhata phirta tha
mudarrisi ki bandariya nachata phirta tha

jo chhota bhai bhi shagird ka koi hota
to wo bhi aan ke meri hi god mein sota

bade ke pitne pe chhota jo phut kar rota
main sherwani ke dhabbon ko der tak dhota

main tutor tha main ghar ghar padhata phirta tha
mudarrisi ki bandariya nachata phirta tha

har ek qimash ke bachche padha diye main ne
mata-e-ilm ke nalke laga diye main ne

jo khote sikke the wo bhi chala diye main ne
jo ass the css bana diye main ne

main tutor tha main ghar ghar padhata phirta tha
mudarrisii ki bandariya nachata phirta tha

na qadar-dan na koi sahib-e-nazar paya
na ghat hi ka raha main na koi ghar paya

khitab paya to sukha sada sa sir paya
main apni qaum ke bachche padha ke bhar paya

main tutor tha mein ghar ghar padhata phirta tha
mudarrisi ki bandariya nachata phirta tha