kaha ye maine ki apni aankhon mein KHwab rakhna

kaha ye main ne ki apni aankhon mein khwab rakhna
kaha ye us ne ki aankh rakhna 'azab rakhna
ye main ne puchha tha log kyun mar rahe hain itne
jawab aaya tum un ke khun ka hisab rakhna


kaha ye main ne zamin par amn ho sakega
kaha ki hathon mein alam rakhna kitab rakhna
kaha ye main ne ki zindagi kis tarah kategi
kaha ye us ne ki chahatin be-hisab rakhna


kaha ye main ne hawaen hain tund-o-tez kitni
wo hans ke boli ki kashtiyan zer-e-ab rakhna
kaha ye us ne ki daere se nikal ke dekhen
kaha ki pahle koi safar intikhab rakhna


kaha ye us ne ki bhid mein hum bichhad na jaen
kaha ki jude mein ek taza gulab rakhna
kaha ye us ne ki hum agar sach ka sath den to
kaha ye main ne ki sahne ki tab rakhna