aap mahbub-e-KHuda ya-mustafa

aap mahbub-e-khuda ya-mustafa
ho gaya dil aap ka ya-mustafa
wo haqiqat mein kaha allah ne
aap ne jo kuchh kaha ya-mustafa


aap par aur aap ke farman par
jaan-o-dil se hum fida ya-mustafa
aap ke naqsh-e-qadam par hum chalen
aap sab ke rahnuma ya-mustafa


waliyan-e-mulk sultan tajwar
aap ke dar ke gada ya-mustafa
ummaton mein afzal ummat aap ki
aap shah-e-ambiya ya-mustafa


din-e-haq ki aap ne talim di
aap haq hain haq-numa ya-mustafa
aap hi ne to kiya insan ko
khud-nigar khud-ashna ya-mustafa


aap par hain khatm sari azmaten
tha na hoga aap sa ya-mustafa
har ghadi main aap par bhejun darud
dil kahe salle-ala ya-mustafa