ajib laDki

ajib ladki hai wo
ki us ko khuda banaya to wo khafa hai
chahaar jaanib
ibaadaton ka hisar khincha


masafaton ke shajar ugae
hiras ki wusaton ko main ne
tilism-e-saut-o-sada se bandha
hawaon ko samt-e-agahi di


shabon ke zakhmi kabutaron ko lahu pilaya
falak pe nilahaten bikherin
khala mein qaus-e-quzah ke rangin par udae
nigah-o-dil ki fasil par jism-o-jaan sajae badan ugae


magar wo ladki
khudai pa kar bhi muzmahil hai
wo khush nahin hai
wo kah rahi thi


ki tum ne mujh ko khuda banaya
to kya ye samjhun
ki koi mujh se bhi baala-tar hai