aurat

lazzat-e-did se dekhoge machal jaoge
aag hun hath lagaoge to jal jaoge
mom patthar ko bana dun wo asar rakhti hun
panw shoalon pe to talwar pe sar rakhti hun


ye bahaaren ye umangen ye masarrat ye shabab
ye shafaq-rang manazir ye shagufe ye gulab
ye nawazish ye inayat kahan paoge
rab se bakhshi hui saughat kahan paoge


meri zulfon hi ki barsat se sairab ho tum
phul ki tarah mere sae mein shadab ho tum
ye bhi sach hai ki bayaban mein gulistan hun main
muztarib ruh ki taskin ka saman hun main


mukhtasar ye ki mujhe pyar se pa sakte ho
tum mere dil ke gulistan mein aa sakte ho
gar meri zat ka irfan tumhein mil jae
ye zamin kya hai aasman tumhein mil jae


haisiyat kya hai meri aur haqiqat kya hai
main batati hun tumhein meri fazilat kya hai
ek aadam ke alawa koi insan na tha
main na hoti to tumhaara koi imkan na tha