chacha nehru ka KHat bachchon ke nam

mere aziz watan ke aziz farzando
mere watan ki nai subh ke naqib ho tum
bichhad ke tum se kai sal ho chuke hain magar
guman hota hai ab tak mere qarib ho tum


diwaliyan hon ki iden khushi mana lena
kabhi ye dil mein na lana ki bad-guman hun main
tum is yaqin ko dil se nikalna na kabhi
ki dur rah ke bhi tum sab ke darmiyan hun main


main jaanta hun judai ka dukh bahut hoga
tum apne dukh ko amal se mita bhi sakte ho
agarche dur hun tum se bahut hi dur magar
mujhe talash karo tum to pa bhi sakte


tumhein milunga main ganga ki shokh maujon mein
wo shokh maujen jinhon ne mujhe qarar diya
tumhein milunga himala ki sabz-wadi mein
tamam umr mujhe jis ne man ka pyar diya


tumhein milunga main kheton ki garm mitti mein
kisan apna pasina jahan bahate hain
tumhein milunga mashinon ke darmiyan jahan
hazaron hath nai qismaten banate hain


tumhein milunga main kashi ki sarhadon mein kabhi
kabhi milunga main ajmer ke gulistan mein
kabhi charagh ki manind shab ke sine par
kabhi gulab ki surat watan ke daman mein