death certificate par likhi ek nazm

main us aadmi ki zaban
kat dena chahti hun
jis ne pahli bar
panw chatne ki riwayat qaem ki


main us ladki ke hath
qalam karna chahti hun
jis ne pahli bar
ek mard ke pairon ko chhua


us man ko sangsar karna chahti hun
jis ne beti ke khwab phad kar
bete ki kitabon par kawar chadhae
aur beti ko badbu-dar shauhar dete hue


bete se aati kothe ki khushbu
nazar-andaz kar di
us bap ko
kude ke jalte hue dher mein


daba dena chahti hun
jis ne apne bistar mein
ek kunwari ladki hamila ki
aur beti ko


ghairat ki tili se phunk diya