umr ka fifty year jo expire ho gaya
husn ki mahfil se mera dil retire ho gaya

kal ki duniya mein sharafat ek taqat thi magar
ab sharif insan taraqqi kar ke kayer ho gaya

tin bete the khuda ke fazl se mere magar
inna lillah aakhiri beta bhi shair ho gaya

kizb-o-ghibat aur ghaban mein zindagi to ki basar
ab zaifi mein madine ka wo zaer ho gaya

khabt mein fikr-e-sukhan ke jagta hai raat-bhar
ab to 'bazagh' bhi shab-e-tira ka tair ho gaya