doctor

agarche hain apni jagah sare kaam
magar doctor ka hai apna maqam
zara dard mein mubtala hon agar
pukare hain sab doctor doctor


kahin par agar ho bura hadisa
to phir kaam aata hai ye nakhuda
kahin operation kahin surgery
bhala kis se hogi ye chaaragari


badan ka har ek zakhm bharne ko hain
masiha hi ye kaam karne ko hain
magar kaam ye zimmedari ka hai
aur ehsas iman-dari ka hai


hai is kaam mein yun to mehnat badi
khuda in ko deta hai izzat badi
bade ho ke socha hai main ne yahi
ki main doctor hi banungi kabhi


gharibon se main fees lungi nahin
kabhi ye gunah main karungi nahin
meri ye dua sun le mere khuda
mujhe aisi khidmat ke laeq bana