tum to kahte the
duniya badalne ko hai

chhote chhote the hum
falsafi kah ke sab chhedte the tumhein

fulan ne kaha hai
fulan ne likha hai

kitabon se dete the aksar hawale
sawere sawere

mujhe roz le jate the
sath stall par

muft akhbar padhne
ye dhun thi

ki bas ho na ho
aaj duniya badalne ki achchhi khabar

chhap gai ho
zamane ki aandhi mein udte hue

tukde akhbar ke
hum juda ho gae

phir mile hi nahin
iftikhar

ab mere shisha-e-umr mein
aakhiri ret hai

chand aainda akhbar baqi hain shayad
tere naqsh dhundla chuke hain

meri yaad mein
par tera nam main bhul sakta nahin

mere bachpan ke ai dost
hum donon hamnam the na

nahin jaanta
tum kahan ho

ya shayad nahin ho abhi tak
meri tarah duniya mein

duniya jo badli nahin
han

jo stall tha na
wo akhbar ka

railway road par
us jagah ek juton ki dukan hai

us zamane ke hawker sabhi mar chuke hain