گڑبڑ جھالا

آلا بالا مکڑی کا جالا
مکڑی بھوری مکڑا کالا
گھات لگائے دونوں بیٹھے
خاموشی سے جپتے مالا


لو جالے میں پھنس گئی مکھی
دوڑ کے فوراً پہنچی مکڑی
اس کو مضبوطی سے جکڑا
خوب اسے جالے میں لپٹا


ہاتھ پاؤں مکھی نے چلائے
لیکن اس کے کام نہ آئے
جاں ہاری بیچاری مکھی
کھا گئے اس کو مکڑا مکڑی


دیکھ کے سارا گڑبڑ جھالا
ہوئی اداس معصوم غزالہ
کہنے لگی وہ آلا بالا
ہائے رے وہ مکڑی کا جالا


جس میں پھنس گئی مکھی بالا
آلا بالا مکڑی کا جالا
شیروں کو جنگل میں دیکھو
ہرن بنے ہے ان کا نوالہ


اسی طرح چلتی ہے دنیا
حیراں کیوں ہوتی ہے غزالہ
تم ہر جان دار کو دیکھو
اک دوسرے کا ہے وہ نوالہ