ghar se niklun to duniya khaDi hai parakhne ko

jin machhliyon ne
zindagi ke sare din
samundar mein guzare hon
unhen pani ke lams ki


khabar kaise ho
jin parindon ne
zindagi ke sare din
pinjre ki qaid mein guzare hon


unhen asiri ke azab ki
khabar kaise ho
jin hathon ne
zindagi ke sare din


bekari mein guzare hon
unhen fursat ke ehsas ki
khabar kaise ho
jin aankhon ne


zindagi ke sare din
ghaflat ki tariki mein guzare hon
unhen gunahon ke andhere ki
khabar kaise ho


jin sanson ne
zindagi ke sare din
ibaadat-khane mein guzare hon
unhen mabud ke imtihan ki


khabar kaise ho