hai to hai

chappa-chappa ghum kar aane ki hasrat hai to hai
dosto mirrikh par jaane ki hasrat hai to hai
jo nahin paya use pane ki hasrat hai to hai
dil hai diwana ye diwane ki hasrat hai to hai


bagh se talta nahin kambakht mali hae hae
tod kar khubaniyan khane ki hasrat hai to hai
dhaul-dhappa mauj-masti shokhiyan atkheliyan
apna karobar phailane ki hasrat hai to hai


sham ko milna zara footbaal ke maidan mein
ma'raka phir koi garmane ki hasrat hai to hai
dad apne fan ki 'tariq' de padosi ya na de
chhat pe aadhi raat ko gane ki hasrat hai to hai