hijr ka aadha cup

chae ka aadha cup hath mein liye
wo sidhiyon pe ja baithi
raat
aakhiri sansen le rahi thi


chehre pe thakan ke aasar wazeh the
khushk hont
khali nigahen
dil ajib iztirab ka shikar tha


koi dagh sulag raha ho jaise
wo shayad rona chah rahi thi
magar aansu
khushk ho chuke the


aur aankhen sahra
koi hijr
aakhiri sansen le raha tha
dur masjid mein azan ki aawaz gunji


wo uthi
bargah-e-ilahi mein sajda-rez ho gai
khushk aankhen tar ho chuki thin
han


wo chae ka aadha cup
hijr samet
wahan sidhiyon pe hi thanda ho chuka tha