خاک اور خون

اے مری مونس غم اے مری پرسان مزاج
تو نے افسردگئ دل کا سبب پوچھا ہے
کیا بتاؤں تجھے کس سوچ میں ہے قلب حزیں
کیا سناؤں کہ مری آنکھ نے کیا دیکھا ہے


خاک اور خون کے غم ناک مناظر توبہ
کس قدر ضبط شکن جلوہ گہہ دنیا ہے
حسرتیں خاک میں ملتی ہوئی دیکھیں کیا کیا
کتنی معصوم تمناؤں کا خوں دیکھا ہے


آہ وہ گل جو نہ تھے نیم شگفتہ بھی ہنوز
دفعتاً باد خزاں نے جنہیں آ روندا ہے
کتنا بے مایہ ہے اس دور میں انساں کا لہو
کتنا مجبور ہے انسان کبھی سوچا ہے


اک طرف گردش حالات زمانہ ہے مرے
اک طرف تیرا یہ اصرار کہ خوش رہنا ہے
شدت حس مجھے مجروح کیے جاتی ہے
زندگی ہے کہ نئے زخم دئے جاتی ہے


اے مری مونس غم اے مری پرسان مزاج
تو نے افسردگئ دل کا سبب پوچھا ہے