lamhe nae hain sal naya aarzu nai
himmat nahin hai rah nai justuju nai

lagti hai hum ko aaj har ek guftugu nai
ujla sa aaftab hai chhabbis january

khilta hua gulab hai chhabbis january
jis din bana tha mulk mein aain-e-khush-gawar

apne chaman mein aai thi jis din nai bahaar
jo din hai apni azmat-o-rifat ki yaadgar

us din ka ek bab hai chhabbis january
khilta hua gulab hai chhabbis january

har rah-rau ki lal qile par nazar hai aaj
uncha jahan mein apne tirange ka sar hai aaj

aazadi-e-watan ki khushi auj par hai aaj
raushan hai kaamyab hai chhabbis january

khilta hua gulab hai chhabbis january
dil mein buland hausle rakhte hain naujawan

swaraj mil gaya hai to bachche hain shadman
masrur zindagi hai irade hain kaamran

ek jashn-e-ab-o-tab hai chhabbis january
khilta hua gulab hai chhabbis january