lucknow ki sair

chaar bagh station dekho
shahr mein ek naya-pan dekho
saji sajai dulhan dekho
qadam qadam par fashion dekho


aao tumhein lucknow dikhaen
aur yahan ki sair karaen
kitna achchha chidiya ghar hai
sher hiran bhaalu bandar hai


mor kabutar aur titar hai
andar murda ajaib ghar hai
aao tumhein lucknow dikhaen
aur yahan ki sair karaen


hazrat ganj ki sair karaen
qaisar bagh ki lat dikhaen
aur aminabaad ghumaen
sham-e-awadh rangin banaen


aao tumhein lucknow dikhaen
aur yahan ki sair karaen
ye puri up ka dil hai
is mein ek chhatar-manzil hai


art school lab-e-sahil hai
nawa dekhne ke qabil hai
aao tumhein lucknow dikhaen
aur yahan ki sair karaen


chauk nakhkhas husain-abaad
golaganj nazirabaad
pyar mohabbat mein aazad
mard-o-zan shirin farhad


aao tumhein lucknow dikhaen
aur yahan ki sair karaen
aao shahd ismarak dikhaen
jhande wale park mein jaen


belly-gaurd ko samjhaen
medical collage dikhlaen
aao tumhein lucknow dikhaen
aur yahan ki sair karaen


ye sab shahron mein nyara hai
nam is ka kitna pyara hai
sab ki aankhon ka tara hai
amn-o-sukun ka gahwara hai


aao tumhein lucknow dikhaen
aur yahan ki sair karaen