mazdur

gard chehre par pasine mein jabin dubi hui
aansuon mein kuhniyon tak aastin dubi hui
pith par naqabil-e-bardasht ek bar-e-garan
zoaf se larzi hui sare badan ki jhurriyan


haddiyon mein tez chalne se chatakhne ki sada
dard mein dubi hui majruh takhne ki sada
panw mitti ki tahon mein mel se chikte hue
ek badbu-dar maila chithada bandhe hue


ja raha hai jaanwar ki tarah ghabraata hua
hanpta girta larazta thokaren khata hua
muzmahil wamandgi se aur faqon se nidhaal
chaar paise ki tawaqqoa sare kumbe ka khayal


apne ham-jinson ki be-mehri se mayus-o-malul
safha-e-hasti par ek satr-e-ghalat harf-e-fuzul
apni khilqat ko gunahon ki saza samjhe hue
aadmi hone ko lanat aur bala samjhe hue


zindagi ko nagawar ek saneha jaane hue
bazm-e-kibr-o-naz mein farz apna pahchane hue
raste mein rahgiron ki nazar se be-niyaz
shorish-e-matam se naghmon ke asar se be-niyaz


us ke dil tak zindagi ki raushni jati nahin
bhul kar bhi us ke honton par hansi aati nahin
ek lamha bhi nahin fikr-e-maishat se najat
subh ho ya sham hai tarik us ki kaenat


dekh ai qarun-e-azam dekh ai sarmaya-dar
na-muradi ka muraqqa be-kasi ka shahkar
go hai teri hi tarah insan magar maqhur hai
dekh ai daulat ke andhe sanp ye mazdur hai