mera jazba-e-shauq kaam aa raha hai
ki bazar mein dekhun aam aa raha hai

gharib-o-amir us ke shaidai yaksan
pasandida-e-khas-o-am aa raha hai

kisi muqtadi ko khridun main kyunkar
ki jab khud phalon ka imam aa raha hai

sab hathon ko phailaen aankhen bichhaen
phalon mein wo aali maqam aa raha hai

wo chausa saroli wo sindhdi wo fazli
wo aamon ka ek azhdaham aa raha hai

hai langda pa langdate langdate dekho
wo mahbub-e-man khush-khiram aa raha hai

mujhe hai khushi jo hain diwane us ke
'asar' un mein mera bhi nam aa raha hai