main ne dekhi nahin
khwab bunti hui makhmalin ungliyan

jin ka lams-e-gudaz ek din
waqt ke sard galon se bahta hua

mere honton pe aaya
to sadiyon ki namkiniyan

sang-basta dilon ke samundar mein
ubhre pahadon ka ek silsila ban chuki thin

wo kya silsila tha
jo ek god se gor tak reshmi tar sa tan gaya

jis pe chalte zamane
khuda-wand-e-ala ke ahkaam-e-rahmat uthae hue

raqs karte guzarte
to mitti pe naqsh-o-nigaran-e-gham muskuraate

tujhe yaad aate
tujhe yaad karte hue

yun guzre
ki jaise kisi bhed-bhaw bhari chandni raat se

chand ka bankpan
baadalon ke ladakpan ke gale udate hue

khwab-labrez pariyon se
chhup-chhup ke guzre

ye dikhne dikhane ki sari mashiat
ye chhupne chhupane ki sari aziyyat

koi jhelta hai
jo tu ne akele mein jheli

main kitne dinon baad aaya tere panw chhune
hisab is khajalat ka karte hue

kitne aansu gire
main nahin gin saka

bhigte phailte lafz aadad jab bhi samundar banate
tere nam ki naw mujh ko kinare lagati

magar ye kinara koi kahkashan to nahin tha
ki main tere la-waqt sahil pe

khud apne panw ke mitte nishan dekh kar muskuraata
wo ginti ka ma'kusi zina tha

taht-us-sara tak rawan rengti aabnae thi
aankhon ka karez thi

teri mohabbat ki wo dastan
jis ko likhne ki koshish mein lakhon waraq

main ne kale kiye
magar ek lamha bhi mere qalam par

wo khush-rang ilham ban kar na utra
jise tere honton ki tasdiq milti

badi se badi baat ko
ek bhigi hui muskurahat mein kahne ka tujh ko saliqa tha

aadad-o-alfaz ki bhid mein
kis qadar main akela hun

tujh ko khabar hai
bata de mujhe bhi koi ism-e-asrar

jis ki tamanna liye sab parinde gae satwin samt
lekin koi aaj tak mud ke aaya nahin

phul honton ke murda zamane pe rakkhun to
khushbu teri

gul-badan ban ke jage
tere sans mein sans lene ki rahat

meri yaad ke bagh mein
ek jadu-zada nim-khwabida

shahzadi zindagi ki tarah muntazir hai
yahan apne hone se kis ko mafar hai

koi nind mein jagne ki aziyyat nahin jaanta
apni jannat ka manzar mere malgaje khwab par khol de

koi shirin takallum mere zahr mein ghol de
fasla nind aur maut ke darmiyan

apni maujudgi se bana
kar ata mojazati hunar

main to noton ki ginti mein masruf
andhe zamane ke hathon ki

wo mail hun
jis pe makkhi bhi aa kar nahin baithti