پرندے

میں ان پرندوں کو جانتا ہوں
مرے بدن کو یہ بانٹ لیں گے
کہ میرے مردہ بدن سے یارو
یہ میرے اعصاب چھانٹ لیں گے


میں ان پرندوں کو جانتا ہوں
میں ان پرندوں کو جانتا ہوں
میں ان پرندوں کو جانتا ہوں
کہ جن کی چونچیں


لہو میں تر ہیں
کہ جن کے پنجوں میں ہڈیاں ہیں
جو آسمانوں کی وسعتوں سے بھی دیکھ لیتے ہیں
مردہ لاشیں


میں ان پرندوں کو جانتا ہوں
میں ان پرندوں کو جانتا ہوں
میں ان پرندوں کو جانتا ہوں
جو اپنی منحوس بوڑھی آنکھوں سے دیکھتے ہیں


مرے بدن کو مرے بدن کو
مرے بدن کو جس کے اعصاب سڑ چکے ہیں
کہ جو غلاظت کا ایک انبار بن گیا ہے
کہ جو تعفن سے اپنی پوری فضا کو مسموم کر رہا ہے


میں جانتا ہوں کہ یہ پرندے
جو دیکھتے ہیں مرے بدن کو عجب طرح چشم نیم وا سے
یہ میری آنکھوں کے بند ہونے کے منتظر ہیں
کہ بند ہوتے ہی میری آنکھیں