koi dekhe to zara raat ki rani ka jamal
rukh pe ghaze ki mahak itr mein aaluda libas

allah allah ye hai phul bhi kitna khud-bin
husn-o-ranai ka kis darja ise hai ehsas

marmarin rang subuk jism dahan chhota sa
lambi gardan kisi mai-kash ki surahi jaise

shakh-e-nazuk pe chamakta hai shab-e-rangin mein
kisi tute hue tare ki tajalli jaise

din ke auqat mein ye phul nahin khilta hai
raat ke waqt hi ithlata hai ye simin-tan

shab ke parde hi mein karta hai ye aaraish-e-rukh
is ki zulfon se mahak uthte hain gulzar-o-chaman

din mein dekhe to koi us ki pareshan-haali
chehra utra hua khamosh fasurda munh band

koi doshiza hai jo rahti hai din mein ghamgin
shab ke aate hi ye ho jati hai laila khursand

din mein ye malgaje kapdon mein nazar aati hai
raat mein karti hai aaraish-e-zulf-o-rukhsar

din mein rahti hai ye nazura-e-gul parde mein
raat ke waqt dikhati hai jawani ki bahaar

apne aashiq se mulaqat ki khatir dam-e-shab
kunj-e-gulshan mein pasand aai rihaish is ko

mujh ko is phul pe shirin ka guman hota hai
apne farhad se hai wasl ki khwahish is ko