عروس البلاد

ایک جزیرہ زمیں کے سینے پر
ہے جو آباد روشنی سے ہے
جس کی سڑکوں پہ رات دیر تلک
زندگی دوڑتی ہے بھاگتی ہے


زندگی رات رات جاگتی ہے
چائے خانوں پہ شب گزاروں کے
قہقہے گونجتے ہی رہتے ہیں
اس کی شامیں حسین ہوتی ہیں


اس مقام حسین کے باسی
چاشنی ہے زبان میں جن کی
پاسباں یہ امیر خسرو کے
میرؔ و غالبؔ کے رازدان سخن


وارثان زبان اردو ہیں
گھولتے ہیں مٹھاس باتوں سے
اپنا لہجہ حسین رکھتے ہیں
ایک تہذیب ہے ثقافت ہے


اس کے کھانوں کی اپنی لذت ہے
اور پھر حسن کی تمازت ہے
دیکھنے والے دیکھتے ہیں کہیں
اس کے ساحل پہ رونق دنیا


کھیلتی ہنستی غل مچاتی ہوئی
من چلے ہنستے مسکراتے ہوئے
زندگی کی غزل سناتے ہوئے
رونقوں کے اسیر رہتے ہیں


جس کو کہتے تھے لوگ کولاچی
اب وہ ساحل کنارے بستا شہر
جانا جاتا ہے شہر قائد سے
لوگ جس کو کراچی کہتے ہیں