meri zindagi ki likhi hui
mere taq-e-dil pe saji hui

wo kitab ab bhi hai muntazir
jise main kabhi nahin padh saki

wo tamam bab sabhi waraq
hain abhi talak bhi jude hue

mera ahd-e-did bhi aaj tak
unhen wo judai na de saka

jo har ek kitab ki ruh hai
mujhe khauf hai ki kitab mein

mere roz-o-shab ki aziyyaten
wo nadamaten wo malamaten

kisi hashiye pe raqam na hon
main fareb-khurda-e-bartari

main asir-e-halqa-e-buz-dili
wo kitab kaise padhungi main?