na bhula iztirab-e-dam-shumari intizar apna

na bhula iztirab-e-dam-shumari intizar apna
ki aakhir shisha-e-saat ke kaam aaya ghubar apna
zi-bas aatish ne fasl-e-rang mein rang-e-digar paya
charagh-e-gul se dhundhe hai chaman mein shama khar apna


asir-e-be-zaban hun kash ke sayyaad-e-be-parwa
ba-dam-e-jauhar-e-aina ho jawe shikar apna
magar ho mane-e-daman-kushi zauq-e-khud-arai
hua hai naqsh-band aaina-e-sang-e-mazar apna


daregh ai na-tawani warna hum zabt-ashnayan ne
tilism-e-rang mein bandha tha ahd-e-ustuwar apna
agar aasudgi hai muddaa-e-ranj-e-betabi
niyaz-e-gardish-e-paimana-e-mai rozgar apna


'asad' hum wo junun-jaulan gada-e-be-sar-o-pa hain
ki hai sar-panja-e-mizhgan-e-ahu pusht-khar apna