GHAZAL SHAYARI

wo bazm kahan aur ye daryuza-gari
le jaegi mujh ko meri aashufta-sari
diwane ne tawil koi pesh na ki
hone ko to ilzam se ho jata bari


ek dew ne qisse mein daraya tha mujhe
phir raat ko sapne mein chali aai pari
patthar ko bhi dekha to chamak phut padi
sikhi hai kahan tu ne ye aaina-gari


ai khalwati-e-husn kabhi parda utha
ai 'ishq-e-junun-khez kabhi parda-dari
be-tab hai duniya mere naghmon ke liye
sunta nahin fariyaad yahan tu hi meri

mere jine ki saza ho jaise
zindagi ek khata ho jaise
dil ke gulshan se guzar jati hai
yaad ek baad-e-saba ho jaise


yun khayalon mein chale aate ho
koi paband-e-wafa ho jaise
yaad hai tujh se bichhadne ka saman
shakh se phul juda ho jaise


apni baaton pe guman hota hai
tu ne kuchh mujh se kaha ho jaise
us se mil kar hua mahsus 'asir'
wo mere sath raha ho jaise

jahan sharab ka main ne gilas dekha hai
gham-e-hayat tujhe bad-hawas dekha hai
jo inkisar hai mera hijab-aluda
tere ghurur ko bhi be-libas dekha hai


kisi amir ka kaif-o-surur yaad aaya
kisi gharib ko jab bhi udas dekha hai
hamein fareb diya hai us aadmi ne zarur
jise zara sa bhi chehra-shanas dekha hai


meri hayat se waqif nahin qalam mera
ki sha'iri ne faqat iqtibas dekha hai

gham hi gham hain khushi ke parde mein
maut hai zindagi ke parde mein
aarzuen sisakti rahti hain
meri tishna-labi ke parde mein


kar-farma hain hadse lakhon
meri dariya-dili ke parde mein
ab tamannaon ke hasin tair
hain meri be-kasi ke parde mein


kis ki khushbu chaman chaman hai 'asir'
kaun hai raushni ke parde mein

apne hi dil ki baat se mahka gaya hun main
apne hi ruh-o-jism mein ghulta gaya hun main
aisi hi kuchh kashish hai jo hun farsh-e-khak par
warna bulandiyon se bhi uncha gaya hun main


ai 'ishq rah-e-dost hai dushwar-tar bahut
ya'ni nigah-e-naz mein aaya gaya hun main
har chehra aaina hai nigahon ke samne
har aaine ke qalb mein dekha gaya hun main


maqsad har ek nigah ka meri nazar mein tha
kya kya fareb-e-dost hain batla gaya hun main
phir koi baat meri saba le ke ud gai
khushbu ki tarh phulon se udta gaya hun main


ya to tere shabab ko pahunchi nahin nazar
ya wus'at-e-khayal se ghabra gaya hun main
har ibtidai marhala pesh-e-nazar bhi tha
kya hai maal-e-'ishq ye samjha gaya hun main


ash'ar mere tere tasawwur ka jazb hain
jaise tere khayal se milta gaya hun main

sauda barae zindagi aasan kar diya
jo bik nahin raha tha use dan kar diya
puri ghazal ka lutf utha hi nahin sake
matle' ne is qadar hamein hairan kar diya


mahfil mein koi husn ka misra' agar mila
itne sunae she'r ki diwan kar diya
pani pahan ke daud laga di gali gali
dariya ne khel khel mein nuqsan kar diya


hum todne gae the nasihat ki botiyan
order janab-e-shaikh ne jalpan kar diya
mushkil mein pad gae tere chakkar mein khud magar
khush hain ki rasta tera aasan kar diya


sachchaiyon ne khwab ke sab kheme dha diye
aur 'ashiqon ko be-sar-o-saman kar diya

samne wale ko halka jaan kar bhaari hain aap
aap ka me'yar dekha kitne me'yari hain aap
sare dariya sab samundar muntazir hain aap ke
jaiye bahiye meri aankhon se kyon jari hain aap


uf talak karte nahin zill-e-ilahi ke khilaf
aap ko darbar ki 'adat hai darbari hain aap
aap ki aazadiyan hain aap hi ke hath mein
jis pe qudrat bhi hai nazan wo giraftari hain aap


jism ke pinjre mein le kar ghumiye nannhi si jaan
chand sanson ki mere pyare adakari hain aap

is musibat se nikalne ka wasila kar de
kho gaya hai jo mera mujh ko wahi la kar de
ab main kaise tujhe samjhaun ki uljhan kya hai
khol de sans ki girhen mujhe dhila kar de


kya pata kaun sa rang odh ke aa jae bahaar
aur tera hath mere samne pila kar de
ek chutki ki teri naf mein pad jaen bhanwar
ek bosa ki tere gal ko gila kar de


ruh ki aanch badha tez kar ehsas ki lau
jism ko 'ishq-o-mohabbat ka patila kar de
isti'ara koi mil jae mujhe thos aisa
jo tere husn ka mazmun lachila kar de

be-khayali ki rida dur talak tani hai
ab to ye bhi nahin lagta ki pareshani hai
sard mausam mein bhadak utthi hai tanhai ki aag
jo badha deti hai mushkil wahi aasani hai


aab-e-girya se hai didar ki surat paida
dekhiye ghaur se aankh aankh nahin pani hai
main to ehsas ki taswir bana baitha hun
raunaq-e-bazm-e-tasawwur meri hairani hai


ye jo duniya hai ye duniya ki banai hui hai
aadmi kya hai nazariyat ki shaitani hai
ye ghazal sun ke kahenge ‘qamar-abbas-qamar'
yar 'abbas-qamar' tum ne 'ajab thani hai

pahle se 'ishq ke wo zamane nahin rahe
hum jaise 'ashiqon ke thikane nahin rahe
nafrat ki aandhiyon mein giraftar ho gae
honton pe chahaton ke tarane nahin rahe


hum ne bhi chhod di wo hasinon ki rah-guzar
bhaunre bhi phul ke ye diwane nahin rahe
manzar hasin khwabon ke dil se utar gae
mausam bhi barishon ke suhane nahin rahe


tahziben zindagi ki ye pamal ho gain
mahfil mein log jab se purane nahin rahe
'abid' hain kaun si ye riwayat ke silsile
sinon mein ulfaton ke khazane nahin rahe

khushiyan hon sirf jis mein ye gham ka dhuan na ho
koi zamin nahin hai jahan aasman na ho
us ko bhi sinche hai khuda rahmat ki chhanw mein
duniya mein jis chaman ka koi baghban na ho


phirti ho dar-ba-dar si meri hasrato kahan
koi tumhaare jaisa yahan be-makan na ho
lazim hai ehtijaj hawaon ka is liye
zulmat ki rah-guzar pe koi karwan na ho


nafrat ki aag mein jo usulon ko jhonk de
aisa bhi masnadon pe koi hukmaran na ho
qaem karo yahan nai ulfat ke silsile
rahon mein wahshaton ka ye nam-o-nishan na ho


'abid' jalao pyar ki sham'on ko har taraf
in nafraton mein taki koi bad-guman na ho

jhulse hue sahra mein shajar dekh raha hun
ummid ke gulshan mein sahar dekh raha hun
jalwon ki tajalli ka talabgar hai ye dil
tu husn ka paikar hai nazar dekh raha hun


har samt mohabbat ke nae bab likhe hain
bas khwab se manzar hain jidhar dekh raha hun
ek khwab ki ta'bir hai darkar musalsal
ek aag ka dariya hai safar dekh raha hun


jate hue logon ko tum aawaz na dena
ye hijr ke mare hain dagar dekh raha hun
wo shakhs mohabbat mein khata-kar hua hai
har shakhs ke honton pe khabar dekh raha hun


har gam hain rahon mein siyasat ke bawandar
mushkil mein hai har ek bashar dekh raha hun
kaisa hai sitam yaro hai ye zarf bhi kaisa
jalta hua apna hi main ghar dekh raha hun


'abid' tujhe ulfat ki tamanna hi nahin ab
kab se main teri samt-e-guzar dekh raha hun

in charaghon mein raushni thahre
tu jo aae to zindagi thahre
tujh ko dekhen to khwab chalte hain
bujhti aankhon mein tazgi thahre


tere chehre pe khwab se manzar
teri palkon pe ragni thahre
kitni pur-nur hain teri aankhen
jaise raaton mein chandni thahre


har-su jalte hain sham se jugnu
tu jo yaadon mein jaan meri thahre
dil ke sahra mein hijr ka mausam
raat jaise ki bebasi thahre


tujh mein 'abid' ye kaun rahta hai
jis ke rahne se khusrawi thahre

hijr mein aise tere sham-o-sahar jate hain
qafile yaadon ke aate hain guzar jate hain
kya saza pai hai phulon ne mahakne ki ye
har sahar khilte hain har sham bikhar jate hain


dar-ba-dar khwab se manzar hain meri aankhon mein
gham bhi palkon pe meri aa ke thahar jate hain
zindagi hum ne tera kuchh to bharam rakkha hai
itne kirdaron mein jite hain ki mar jate hain


ku-ba-ku yas ka 'alam hai faqat hum tanha
hausle tut ke rahon mein bikhar jate hain
justuju kis ki hai jaanen ye safar hai kaisa
hum ko jaana hai kahan hum ye kidhar jate hain


kashmakash mein hai khushi sab ki bhala kyon aakhir
hum jidhar jate hain ye gham bhi udhar jate hain
aao ab yaro zamin par bhi utar aaen hum
ye parinde bhi bulandi se utar jate hain


ek nazar teri zamane pe hua karti hai
igde-bigde jo muqaddar hain sanwar jate hain
sar-phiri aag hai is dil mein lagi ai 'abid'
aa chalen ab kisi dariya mein utar jate hain

har samt ek dhuan hai har gam tirgi hai
duniya tere safar mein ye kaisi raushni hai
zulmat ki rah-guzar pe ulfat sisak rahi hai
ye kaun be-hisi hai ye kaun bebasi hai


tanha hi chal rahe hum manzil ki aarzu mein
har subh ajnabi hai har sham ajnabi hai
apni hi dhun mein sab hain har shakhs dar-ba-dar hai
ye kaisi justuju hai ye kaisi tishnagi hai


hum mar ke ji rahe hain khwabon ki anjuman mein
nakaam hasraten hain gumnam zindagi hai
'abid' tumhaare haq mein har lab pe ek gila hai
har dil mein ek chubhan hai har aankh shabnami hai

gulon ke darmiyan wo khilkhilana yaad aaya hai
chaman mein bulbulon ka chahchahana yaad aaya hai
kai phir khwab aankhon mein base hain zindagi ban kar
hamein phir 'ishq mein guzra zamana yaad aaya hai


parinde chahaton ke sarzamin pe raqs karte hain
koi bhuli kahani ka fasana yaad aaya hai
tabassum un labon ka phir sahar se gul khilata hai
bahaar-e-husn ka wo lahlahana yaad aaya hai


hasin manzar tumhaare qurb ke ab bhi lubhate hain
tumhaare wasl ka mausam suhana yaad aaya hai
hamein 'abid' kisi se ab shikayat hai na shikwa hai
na jaane kyon dilon ka tut jaana yaad aaya hai

duniya mein raushni ki qayaadat ko likh chalen
lazim hai zulmaton ki baghawat ko likh chalen
har samt hon jahan mein ye ulfat ke silsile
nafrat ki rah-guzar pe mohabbat ko likh chalen


raushan hai jin ke dam se abhi hind ka chaman
ashkon se aaj un ki shahadat ko likh chalen
ab to mitao yaro 'adawat ki talkhiyan
wahshat ki aandhiyon mein rifaqat ko likh chalen


nafrat mein phir jale na koi amn ki sahar
lazim hai lakh aisi riwayat ko likh chalen
'abid' basaen har-su sabhi pyar ka jahan
duniya mein aao aisi hikayat ko likh chalen

dil mein nafrat ki lagi aag bujha di jae
ab zamane ko mohabbat ki faza di jae
baat lazim hai usulon ki magar ai yaro
pahle diwar 'adawat ki gira di jae


phir jale ghar na kisi ka bhi hukumat mein koi
be-hisi waqt ki jo bhi ho mita di jae
kab talak yunhi sahoge ye sitam duniya ke
ab to aawaz baghawat ki utha di jae

aankhon mein aansuon ka guzara nahin raha
jab se bichhad ke tu jo hamara nahin raha
tum ne bhula diye wo mohabbat ke silsile
ek hum hain ulfaton se kinara nahin raha


manzar hasin khwabon se jab se bikhar gae
koi bhi phir nazar mein dubara nahin raha
sara jahan teri mohabbat mein haar kar
kah dun main tujh se kaise khasara nahin raha


phulon ki baat ho ki sitaron ki zat ho
kis par tere karam ka ishaara nahin raha
'abid' ye hum ne chaha charaghon ko phunk den
us se bichhad ke ye bhi gawara nahin raha

kitab-e-zist mein aisa koi bhi bab nahin
tumhaare 'ishq ka jis par likha hisab nahin
sharab-khane mein do bund bhi sharab nahin
hamare waste is se bada 'azab nahin


hui ye zindagi tarik raat ke manind
tu mahtab nahin main bhi aaftab nahin
nai hayat mein dhalna padega ab is ko
ye zindagi to mohabbat mein kaamyab nahin


tu apni aankhon ka chashma badal ke dekh mujhe
jahan jitna hai itna to main kharab nahin
hamein bhi tark-e-ta'alluq ka khak ho afsos
bichhad ke hum se tumhein bhi to iztirab nahin


ye mai-kada hai yahan hai har ek shakhs qubul
koi sharif nahin hai koi kharab nahin
khizan ne kaun si tartib se kiya barbaad
kisi bhi shakh pe gulshan mein ek gulab nahin

tu ne nazron se kai log girae honge
hum nahin pahle bhi kuchh log rulae honge
shahr ka shahr jo phirta hai 'ajab haalon mein
tu ne aankhon se unhen jam pilae honge


jin ke lahjon mein alam baaton mein dukh milta hai
mera andaza hai sab tere satae honge
hum jo har haal mein dete hain du'aen tujh ko
jaane kis farz mein kya qarz uthae honge


kitne dil-dar teri lash se lipte honge
kitne gham-khwar teri maut pe aae honge

odh kar shaal teri yaadon ki ghar jata hun
ghar na jaun to sar-e-rah bikhar jata hun
sard mausam ke thapedon se jo nakhl-e-gul par
chot padti hai to kuchh aur sanwar jata hun


husn walon pe to deta hun hamesha pahra
wadi-e-'ishq mein be-laus utar jata hun
marne walon ko jalane mein maza aata hai
jine walon pe to main roz hi mar jata hun


soch ko aag dikhata hun tere chehre ki
aag ko dil mein laga kar main nikhar jata hun
din ko kahta hun nahin yaad nahin karna use
sham ko apne hi wa'de se mukar jata hun

nazron se gir gaya to uthaya nahin gaya
mujh se wo rutha shakhs manaya nahin gaya
ashkon ko jis ne aankh ka zewar bana diya
aankhon ki chilmanon se hataya nahin gaya


tuta jo ek bar to hasrat hui tamam
mujh se dubara dil bhi lagaya nahin gaya
mujh ko mitane wale ne sab kuchh mita diya
mujh se to us ka nam bhulaya nahin gaya


apnon ne meri soch ko dimak-zada kiya
khushiyon bhara jo ghar tha basaya nahin gaya
us ne mujhe girane ka jab 'ahd kar liya
haara wo shakhs mujh se haraya nahin gaya

nagin lagta hun main dil-nashin lagta hun
wo dekh le jo mujhe main hasin lagta hun
kharid le wo agar kuchh kahin bhi saste mein
main dil ki basti mein bikti zamin lagta hun


wo aabju si agar rukh kare meri jaanib
main paniyon ke jahan ka makin lagta hun
wo raushni jo mujhe rok le kahin tanha
main raat odh ke chande jabin lagta hun


wo dekhte hi mera nam bol de jo kahin
main us ke lafz se aa'la-tarin lagta hun
wo morni si mujhe jab zahin kahti hai
main apne aap mein khud ko fatin lagta hun

na mujh ko chain aawe hai na mujh ko nind hi aawe
sajan ki de khabar koi koi to us taraf jawe
tere hansne pe dil apna teri jaanib khicha jawe
tere rone pe dil tadpe 'ajab si tishnagi chhawe


bataun kya main logon ko tere dekhe se kya howe
jo tujh ko dekh le sahib wo jannat ka maza pawe
jalan rahti hai sine mein use kah do sada de de
koi to yar ke kuche se thodi dilbari lawe


ye dil kahe ko teri yaad mein jal jal ke dhadke hai
ye kahe nam le tera ye kyunkar rog hai khawe
sajan ki bholi baatan se guman howe hai koyal ka
sajan ki bhuri akhiyan mein papiha git hai gawe


milan ki baat karne par haya mukhde ko kha jae
simatti jae lajaan se dilan par barq hai dhawe
teri sochan ki bhanwran mein koi rasta nahin milta
safar ye bojh lage hai mohabbat khun hai tawe


tu sangat hai bahaaron ki dilan ke chand taron ki
tu rani hai mere dil ki na dil ko ab koi bhawe