اشرا شاعری

وہ سب میں نعمتیں تقسیم کر کے خوش رہتا
مگر خدائی کا دعویٰ نہیں کیا اس نے
وہ ماں کا ہاتھ بٹاتا تھا گھر کے کاموں میں
پہ فیمینسٹی کا چرچا نہیں کیا اس نے


جو قرض فرض نہیں تھے ادا کیے وہ بھی
کسی سے کوئی تقاضا نہیں کیا اس نے
بنائی زندگی جن کی وہ اس کی موت بنے
یہ دکھ مجھے ہے کہ اچھا نہیں کیا اس نے


پھر ایک عصر وہ مسجد کی سیڑھیوں پہ ڈھلا
تو بجھتے دل سے بھی شکوہ نہیں کیا اس نے

کھانسی اور ہچکی کا فرق
غیر واضح ہوتا ہے
عوام کے مسیحاؤں اور خدا کے وکیلوں کو
مؤکل اور دستانے نہیں ملتے


زمین کو وینٹیلیٹر لگانے والوں کو
زمین کو وینٹیلیٹر لگانے کی ہمت نہیں ہوتی
ہجوم کی بھوک میں خوف
اور خوف کی موت میں بھوک نہیں ہوتی


دو محبت کرنے والوں کے درمیان
دو محبت کرنے والے نہیں ہوتے

بابائے کل اقوام پوری صدی
اسنوکر کھیلتے رہے
اسنوکر کی سب سے بہترین گیندیں
گینڈے کے سینگ سے بنتی رہیں


کچھ عرصہ پہلے
آخری سفید گینڈا مارا گیا
سکوت گینڈا سے
کسی قوم کو فرق نہیں پڑا


آخری انسان مرنے سے
کسی سیارے کو فرق نہیں پڑنے والا

کون پہلی محبت نہیں تھا
کون آخری محبت نہیں
کون ہے جو پہلی اور آخری محبت ہے
کون سا بچہ کس کی اولاد ہے


کون سی دولت کس پر حلال ہے
کس قتل کا سراغ کس زمین میں ہے
مثلث کب سے ہے اور کن تین میں ہے
وبا کے دنوں میں


ضروری ہوتا ہے
وصیت لکھ رکھنا

مختصر کر جاتی ہے زندگی کو ہر ملاقات
بن جاتا ہے مرکب خوف خدا میں خوف وبا
بڑھ جاتی ہے اہمیت میں محبت سے مدافعت
کھو بیٹھتے ہیں کرنسی نوٹ تک اپنی وقعت


رہ جاتا ہے جمع بہت سا موت کے بعد کا راشن
چلی جاتی ہیں نقابوں تلے کھلی مسکراہٹیں
مٹ جاتی ہے مصافحوں اور معانقوں کی ملمع کاری
روٹھ جاتا ہے بدن سے لمس کا رزق


دور ہو جاتا ہے اپنا چہرہ اپنے ہاتھ سے
مکمل ہوتی ہے وبا کے دنوں میں تنہائی

وبا کے دنوں میں میت کا غسل
جنازے کا کندھا
اور آخری لمحے کا دیدار نہیں ہوتا
لیکن یہی نہیں


ان دنوں قبر کے پھولوں کی
گلقند نہیں بنائی جاتی
لاش کے بالوں کی وگ نہیں بنتی
کفن پلاسٹک کا ہوتا ہے


جو چوری نہیں ہوتا
اور کوئی آدم خور زندہ نہیں بچتا