غزل شاعری

سودا برائے زندگی آسان کر دیا
جو بک نہیں رہا تھا اسے دان کر دیا
پوری غزل کا لطف اٹھا ہی نہیں سکے
مطلع نے اس قدر ہمیں حیران کر دیا


محفل میں کوئی حسن کا مصرع اگر ملا
اتنے سنائے شعر کہ دیوان کر دیا
پانی پہن کے دوڑ لگا دی گلی گلی
دریا نے کھیل کھیل میں نقصان کر دیا


ہم توڑنے گئے تھے نصیحت کی بوٹیاں
آرڈر جناب شیخ نے جلپان کر دیا
مشکل میں پڑ گئے ترے چکر میں خود مگر
خوش ہیں کہ راستہ ترا آسان کر دیا


سچائیوں نے خواب کے سب خیمے ڈھا دئے
اور عاشقوں کو بے سر و سامان کر دیا

سامنے والے کو ہلکا جان کر بھاری ہیں آپ
آپ کا معیار دیکھا کتنے معیاری ہیں آپ
سارے دریا سب سمندر منتظر ہیں آپ کے
جائیے بہیے مری آنکھوں سے کیوں جاری ہیں آپ


اف تلک کرتے نہیں ظل الٰہی کے خلاف
آپ کو دربار کی عادت ہے درباری ہیں آپ
آپ کی آزادیاں ہیں آپ ہی کے ہاتھ میں
جس پہ قدرت بھی ہے نازاں وہ گرفتاری ہیں آپ


جسم کے پنجرے میں لے کر گھومیے ننھی سی جان
چند سانسوں کی مرے پیارے اداکاری ہیں آپ

اس مصیبت سے نکلنے کا وسیلہ کر دے
کھو گیا ہے جو مرا مجھ کو وہی لا کر دے
اب میں کیسے تجھے سمجھاؤں کہ الجھن کیا ہے
کھول دے سانس کی گرہیں مجھے ڈھیلا کر دے


کیا پتہ کون سا رنگ اوڑھ کے آ جائے بہار
اور ترا ہاتھ مرے سامنے پیلا کر دے
ایک چٹکی کہ تری ناف میں پڑ جائیں بھنور
ایک بوسہ کہ ترے گال کو گیلا کر دے


روح کی آنچ بڑھا تیز کر احساس کی لو
جسم کو عشق و محبت کا پتیلا کر دے
استعارہ کوئی مل جائے مجھے ٹھوس ایسا
جو ترے حسن کا مضمون لچیلا کر دے

بے خیالی کی ردا دور تلک تانی ہے
اب تو یہ بھی نہیں لگتا کہ پریشانی ہے
سرد موسم میں بھڑک اٹھی ہے تنہائی کی آگ
جو بڑھا دیتی ہے مشکل وہی آسانی ہے


آب گریہ سے ہے دیدار کی صورت پیدا
دیکھیے غور سے آنکھ آنکھ نہیں پانی ہے
میں تو احساس کی تصویر بنا بیٹھا ہوں
رونق بزم تصور مری حیرانی ہے


یہ جو دنیا ہے یہ دنیا کی بنائی ہوئی ہے
آدمی کیا ہے نظریات کی شیطانی ہے
یہ غزل سن کے کہیں گے قمر عباس قمرؔ
یار عباس قمرؔ تم نے عجب ٹھانی ہے

پہلے سے عشق کے وہ زمانے نہیں رہے
ہم جیسے عاشقوں کے ٹھکانے نہیں رہے
نفرت کی آندھیوں میں گرفتار ہو گئے
ہونٹوں پہ چاہتوں کے ترانے نہیں رہے


ہم نے بھی چھوڑ دی وہ حسینوں کی رہگزر
بھنورے بھی پھول کے یہ دوانے نہیں رہے
منظر حسین خوابوں کے دل سے اتر گئے
موسم بھی بارشوں کے سہانے نہیں رہے


تہذیبیں زندگی کی یہ پامال ہو گئیں
محفل میں لوگ جب سے پرانے نہیں رہے
عابدؔ ہیں کون سی یہ روایت کے سلسلے
سینوں میں الفتوں کے خزانے نہیں رہے

خوشیاں ہوں صرف جس میں یہ غم کا دھواں نہ ہو
کوئی زمیں نہیں ہے جہاں آسماں نہ ہو
اس کو بھی سینچے ہے خدا رحمت کی چھانو میں
دنیا میں جس چمن کا کوئی باغباں نہ ہو


پھرتی ہو در بہ در سی مری حسرتو کہاں
کوئی تمہارے جیسا یہاں بے مکاں نہ ہو
لازم ہے احتجاج ہواؤں کا اس لئے
ظلمت کی رہگزر پہ کوئی کارواں نہ ہو


نفرت کی آگ میں جو اصولوں کو جھونک دے
ایسا بھی مسندوں پہ کوئی حکمراں نہ ہو
قائم کرو یہاں نئی الفت کے سلسلے
راہوں میں وحشتوں کا یہ نام و نشاں نہ ہو


عابدؔ جلاؤ پیار کی شمعوں کو ہر طرف
ان نفرتوں میں تاکہ کوئی بد گماں نہ ہو

جھلسے ہوئے صحرا میں شجر دیکھ رہا ہوں
امید کے گلشن میں سحر دیکھ رہا ہوں
جلوؤں کی تجلی کا طلب گار ہے یہ دل
تو حسن کا پیکر ہے نظر دیکھ رہا ہوں


ہر سمت محبت کے نئے باب لکھے ہیں
بس خواب سے منظر ہیں جدھر دیکھ رہا ہوں
اک خواب کی تعبیر ہے درکار مسلسل
اک آگ کا دریا ہے سفر دیکھ رہا ہوں


جاتے ہوئے لوگوں کو تم آواز نہ دینا
یہ ہجر کے مارے ہیں ڈگر دیکھ رہا ہوں
وہ شخص محبت میں خطا کار ہوا ہے
ہر شخص کے ہونٹوں پہ خبر دیکھ رہا ہوں


ہر گام ہیں راہوں میں سیاست کے بونڈر
مشکل میں ہے ہر ایک بشر دیکھ رہا ہوں
کیسا ہے ستم یارو ہے یہ ظرف بھی کیسا
جلتا ہوا اپنا ہی میں گھر دیکھ رہا ہوں


عابدؔ تجھے الفت کی تمنا ہی نہیں اب
کب سے میں تری سمت گزر دیکھ رہا ہوں

ان چراغوں میں روشنی ٹھہرے
تو جو آئے تو زندگی ٹھہرے
تجھ کو دیکھیں تو خواب چلتے ہیں
بجھتی آنکھوں میں تازگی ٹھہرے


تیرے چہرے پہ خواب سے منظر
تیری پلکوں پہ راگنی ٹھہرے
کتنی پر نور ہیں تری آنکھیں
جیسے راتوں میں چاندنی ٹھہرے


ہر سو جلتے ہیں شام سے جگنو
تو جو یادوں میں جاں مری ٹھہرے
دل کے صحرا میں ہجر کا موسم
رات جیسے کہ بے بسی ٹھہرے


تجھ میں عابدؔ یہ کون رہتا ہے
جس کے رہنے سے خسروی ٹھہرے

ہجر میں ایسے ترے شام و سحر جاتے ہیں
قافلے یادوں کے آتے ہیں گزر جاتے ہیں
کیا سزا پائی ہے پھولوں نے مہکنے کی یہ
ہر سحر کھلتے ہیں ہر شام بکھر جاتے ہیں


در بہ در خواب سے منظر ہیں مری آنکھوں میں
غم بھی پلکوں پہ مری آ کے ٹھہر جاتے ہیں
زندگی ہم نے ترا کچھ تو بھرم رکھا ہے
اتنے کرداروں میں جیتے ہیں کہ مر جاتے ہیں


کو بہ کو یاس کا عالم ہے فقط ہم تنہا
حوصلے ٹوٹ کے راہوں میں بکھر جاتے ہیں
جستجو کس کی ہے جانیں یہ سفر ہے کیسا
ہم کو جانا ہے کہاں ہم یہ کدھر جاتے ہیں


کشمکش میں ہے خوشی سب کی بھلا کیوں آخر
ہم جدھر جاتے ہیں یہ غم بھی ادھر جاتے ہیں
آؤ اب یارو زمیں پر بھی اتر آئیں ہم
یہ پرندے بھی بلندی سے اتر جاتے ہیں


اک نظر تیری زمانے پہ ہوا کرتی ہے
اگڑے بگڑے جو مقدر ہیں سنور جاتے ہیں
سر پھری آگ ہے اس دل میں لگی اے عابدؔ
آ چلیں اب کسی دریا میں اتر جاتے ہیں

ہر سمت اک دھواں ہے ہر گام تیرگی ہے
دنیا ترے سفر میں یہ کیسی روشنی ہے
ظلمت کی رہگزر پہ الفت سسک رہی ہے
یہ کون بے حسی ہے یہ کون بے بسی ہے


تنہا ہی چل رہے ہم منزل کی آرزو میں
ہر صبح اجنبی ہے ہر شام اجنبی ہے
اپنی ہی دھن میں سب ہیں ہر شخص در بہ در ہے
یہ کیسی جستجو ہے یہ کیسی تشنگی ہے


ہم مر کے جی رہے ہیں خوابوں کی انجمن میں
ناکام حسرتیں ہیں گمنام زندگی ہے
عابدؔ تمہارے حق میں ہر لب پہ اک گلہ ہے
ہر دل میں اک چبھن ہے ہر آنکھ شبنمی ہے

گلوں کے درمیاں وہ کھلکھلانا یاد آیا ہے
چمن میں بلبلوں کا چہچہانا یاد آیا ہے
کئی پھر خواب آنکھوں میں بسے ہیں زندگی بن کر
ہمیں پھر عشق میں گزرا زمانا یاد آیا ہے


پرندے چاہتوں کے سرزمیں پہ رقص کرتے ہیں
کوئی بھولی کہانی کا فسانہ یاد آیا ہے
تبسم ان لبوں کا پھر سحر سے گل کھلاتا ہے
بہار حسن کا وہ لہلہانا یاد آیا ہے


حسیں منظر تمہارے قرب کے اب بھی لبھاتے ہیں
تمہارے وصل کا موسم سہانا یاد آیا ہے
ہمیں عابدؔ کسی سے اب شکایت ہے نہ شکوہ ہے
نہ جانے کیوں دلوں کا ٹوٹ جانا یاد آیا ہے

دنیا میں روشنی کی قیادت کو لکھ چلیں
لازم ہے ظلمتوں کی بغاوت کو لکھ چلیں
ہر سمت ہوں جہاں میں یہ الفت کے سلسلے
نفرت کی رہگزر پہ محبت کو لکھ چلیں


روشن ہے جن کے دم سے ابھی ہند کا چمن
اشکوں سے آج ان کی شہادت کو لکھ چلیں
اب تو مٹاؤ یارو عداوت کی تلخیاں
وحشت کی آندھیوں میں رفاقت کو لکھ چلیں


نفرت میں پھر جلے نہ کوئی امن کی سحر
لازم ہے لاکھ ایسی روایت کو لکھ چلیں
عابدؔ بسائیں ہر سو سبھی پیار کا جہاں
دنیا میں آؤ ایسی حکایت کو لکھ چلیں

دل میں نفرت کی لگی آگ بجھا دی جائے
اب زمانہ کو محبت کی فضا دی جائے
بات لازم ہے اصولوں کی مگر اے یارو
پہلے دیوار عداوت کی گرا دی جائے


پھر جلے گھر نہ کسی کا بھی حکومت میں کوئی
بے حسی وقت کی جو بھی ہو مٹا دی جائے
کب تلک یوںہی سہو گے یہ ستم دنیا کے
اب تو آواز بغاوت کی اٹھا دی جائے

آنکھوں میں آنسوؤں کا گزارا نہیں رہا
جب سے بچھڑ کے تو جو ہمارا نہیں رہا
تم نے بھلا دئے وہ محبت کے سلسلے
اک ہم ہیں الفتوں سے کنارا نہیں رہا


منظر حسین خوابوں سے جب سے بکھر گئے
کوئی بھی پھر نظر میں دوبارہ نہیں رہا
سارا جہان تیری محبت میں ہار کر
کہہ دوں میں تجھ سے کیسے خسارہ نہیں رہا


پھولوں کی بات ہو کہ ستاروں کی ذات ہو
کس پر ترے کرم کا اشارہ نہیں رہا
عابدؔ یہ ہم نے چاہا چراغوں کو پھونک دیں
اس سے بچھڑ کے یہ بھی گوارہ نہیں رہا

کتاب زیست میں ایسا کوئی بھی باب نہیں
تمہارے عشق کا جس پر لکھا حساب نہیں
شراب خانے میں دو بوند بھی شراب نہیں
ہمارے واسطے اس سے بڑا عذاب نہیں


ہوئی یہ زندگی تاریک رات کے مانند
تو ماہتاب نہیں میں بھی آفتاب نہیں
نئی حیات میں ڈھلنا پڑے گا اب اس کو
یہ زندگی تو محبت میں کامیاب نہیں


تو اپنی آنکھوں کا چشمہ بدل کے دیکھ مجھے
جہان جتنا ہے اتنا تو میں خراب نہیں
ہمیں بھی ترک تعلق کا خاک ہو افسوس
بچھڑ کے ہم سے تمہیں بھی تو اضطراب نہیں


یہ مے کدہ ہے یہاں ہے ہر ایک شخص قبول
کوئی شریف نہیں ہے کوئی خراب نہیں
خزاں نے کون سی ترتیب سے کیا برباد
کسی بھی شاخ پہ گلشن میں اک گلاب نہیں

تو نے نظروں سے کئی لوگ گرائے ہوں گے
ہم نہیں پہلے بھی کچھ لوگ رلائے ہوں گے
شہر کا شہر جو پھرتا ہے عجب حالوں میں
تو نے آنکھوں سے انہیں جام پلائے ہوں گے


جن کے لہجوں میں الم باتوں میں دکھ ملتا ہے
میرا اندازہ ہے سب تیرے ستائے ہوں گے
ہم جو ہر حال میں دیتے ہیں دعائیں تجھ کو
جانے کس فرض میں کیا قرض اٹھائے ہوں گے


کتنے دلدار تری لاش سے لپٹے ہوں گے
کتنے غم خوار تری موت پہ آئے ہوں گے

اوڑھ کر شال تری یادوں کی گھر جاتا ہوں
گھر نہ جاؤں تو سر راہ بکھر جاتا ہوں
سرد موسم کے تھپیڑوں سے جو نخل گل پر
چوٹ پڑتی ہے تو کچھ اور سنور جاتا ہوں


حسن والوں پہ تو دیتا ہوں ہمیشہ پہرہ
وادیٔ عشق میں بے لوث اتر جاتا ہوں
مرنے والوں کو جلانے میں مزہ آتا ہے
جینے والوں پہ تو میں روز ہی مر جاتا ہوں


سوچ کو آگ دکھاتا ہوں ترے چہرے کی
آگ کو دل میں لگا کر میں نکھر جاتا ہوں
دن کو کہتا ہوں نہیں یاد نہیں کرنا اسے
شام کو اپنے ہی وعدے سے مکر جاتا ہوں

نظروں سے گر گیا تو اٹھایا نہیں گیا
مجھ سے وہ روٹھا شخص منایا نہیں گیا
اشکوں کو جس نے آنکھ کا زیور بنا دیا
آنکھوں کی چلمنوں سے ہٹایا نہیں گیا


ٹوٹا جو ایک بار تو حسرت ہوئی تمام
مجھ سے دوبارہ دل بھی لگایا نہیں گیا
مجھ کو مٹانے والے نے سب کچھ مٹا دیا
مجھ سے تو اس کا نام بھلایا نہیں گیا


اپنوں نے میری سوچ کو دیمک زدہ کیا
خوشیوں بھرا جو گھر تھا بسایا نہیں گیا
اس نے مجھے گرانے کا جب عہد کر لیا
ہارا وہ شخص مجھ سے ہرایا نہیں گیا

نگین لگتا ہوں میں دل نشین لگتا ہوں
وہ دیکھ لے جو مجھے میں حسین لگتا ہوں
خرید لے وہ اگر کچھ کہیں بھی سستے میں
میں دل کی بستی میں بکتی زمین لگتا ہوں


وہ آب جو سی اگر رخ کرے مری جانب
میں پانیوں کے جہاں کا مکین لگتا ہوں
وہ روشنی جو مجھے روک لے کہیں تنہا
میں رات اوڑھ کے چندے جبین لگتا ہوں


وہ دیکھتے ہی مرا نام بول دے جو کہیں
میں اس کے لفظ سے اعلیٰ ترین لگتا ہوں
وہ مورنی سی مجھے جب ذہین کہتی ہے
میں اپنے آپ میں خود کو فطین لگتا ہوں

نہ مجھ کو چین آوے ہے نہ مجھ کو نیند ہی آوے
سجن کی دے خبر کوئی کوئی تو اس طرف جاوے
ترے ہنسنے پہ دل اپنا تری جانب کھچا جاوے
ترے رونے پہ دل تڑپے عجب سی تشنگی چھاوے


بتاؤں کیا میں لوگوں کو ترے دیکھے سے کیا ہووے
جو تجھ کو دیکھ لے صاحب وہ جنت کا مزہ پاوے
جلن رہتی ہے سینے میں اسے کہہ دو صدا دے دے
کوئی تو یار کے کوچے سے تھوڑی دلبری لاوے


یہ دل کاہے کو تیری یاد میں جل جل کے دھڑکے ہے
یہ کاہے نام لے تیرا یہ کیونکر روگ ہے کھاوے
سجن کی بھولی باتاں سے گماں ہووے ہے کوئل کا
سجن کی بھوری اکھیاں میں پپیہا گیت ہے گاوے


ملن کی بات کرنے پر حیا مکھڑے کو کھا جائے
سمٹتی جائے لاجاں سے دلاں پر برق ہے ڈھاوے
تری سوچاں کی بھنوراں میں کوئی رستہ نہیں ملتا
سفر یہ بوجھ لاگے ہے محبت خون ہے تاوے


تو سنگت ہے بہاروں کی دلاں کے چاند تاروں کی
تو رانی ہے مرے دل کی نہ دل کو اب کوئی بھاوے

مرے ہجر کا تو علاج کر کوئی حل بتا مرے سائیاں
مرے کرب کی مرے درد کی کوئی کر دوا مرے سائیاں
مجھے دیکھ جا مرے چارہ گر میں تری نظر کا شکار ہوں
کہاں کیوں ہوا کہاں کیا ہوا نہ مجھے سنا مرے سائیاں


ذرا ہاتھ رکھ کے تو ہاتھ پر مری دھڑکنوں کو قرار دے
مجھے ریزہ ریزہ سمیٹ کر تو گلے لگا مرے سائیاں
نہ بتا مجھے کہ زمانے نے تجھے کیسے مجھ سے جدا کیا
تجھے عشق ہے جو ابھی تلک مرے پاس آ مرے سائیاں


مرے حوصلے کو تو داد دے مرے حسن ظن پہ تو جان دے
میں یہی رہا سدا سوچتا تو ہے بے خطا مرے سائیاں
ترے چونکنے سے پتہ چلا مرا نام اب بھی عزیز ہے
مرے ذکر پر جو جھکا ہے اب ذرا سر اٹھا مرے سائیاں


مجھے شوق لطف سے دیکھ کر نہ تو کر اشارے فریب کے
یوں پلٹ پلٹ کے نہ بات کر نہ یہاں سے جا مرے سائیاں

مرے ہم نشیں یہ ملال ہے مری زندگی کہیں کھو گئی
مجھے ڈس لیا ترے عشق نے مری دل کشی کہیں کھو گئی
کسی اجنبی کا ہوا نہیں مرا دل بھی کھل کے کھلا نہیں
مرا ربط ٹوٹا جو یار سے مری خوش دلی کہیں کھو گئی


وہ عروج تھا تو بتا مجھے یہ عجب سا کیسا زوال ہے
مرا حال اب تو عذاب ہے مری تازگی کہیں کھو گئی
نہ ہی خواب میں کوئی روپ ہے نہ ہی سوچ میں کوئی رنگ ہے
ترا عکس مجھ سے ہے دور جو مری بندگی کہیں کھو گئی


میں کھڑا ہوں کس کے مکان میں میں بجھا بجھا ہوں جہان میں
مرا دل بھی لگتا ہے غیر کا مری دل لگی کہیں کھو گئی
وہ جو مہرباں تھا خیال کا مری گہری سوچ و بچار کا
اسی مہرباں کے بچھڑنے پر مری پختگی کہیں کھو گئی


مجھے مان تھا کہ جو زخم ہیں یہ صلے رہیں گے سدا یوںہی
مرے چاک سلتے ہی پھٹ گئے مری عمدگی کہیں کھو گئی
میں دریدہ ہجر کا باسی ہوں جو مچل رہا ہے وصال کو
ترا لمس نکھرا جو خواب میں مری خستگی کہیں کھو گئی


تو کہاں گیا مرے ہم نشیں مرے نقش مجھ سے ہیں ہم کلام
مجھے ہے گماں ترے عشق میں وہ شگفتگی کہیں کھو گئی

میں زندگی کے ستم کو رواج کہہ نہ سکا
شکستہ پا بھی رہا آبلہ بھی بہہ نہ سکا
میں جان بوجھ کے پیچھے رہا زمانے سے
میں دوستوں کی دغا بار بار سہہ نہ سکا


عجیب حال ہوا دل بھی بے قرار رہا
وہ حال دل تھا کہ روئے بغیر رہ نہ سکا
میں حق پرست قبیلے کا فرد ہوں صاحب
چڑھا بھی سولی تو میں سچ کو جھوٹ کہہ نہ سکا


میں اس کی سوچ کے دریا میں بہتے بہتے کبھی
بنا جو موج تو دریا کے بیچ رہ نہ سکا

گزرے موسم کا چلن دل سے مرے گویا ہے
تجھ کو کھو کر بھی کہاں دل نے تجھے کھویا ہے
ضبط کے اشک دبائے ہیں ترے ہونے پر
چاند ہجرت کے مہینوں میں بہت رویا ہے


ہر گھڑی سوچ کو باندھا ہے تری یادوں سے
ہر گھڑی یاد کو اشکوں سے تری دھویا ہے
وصل کی چاہ میں دیکھے ہیں زمانے کتنے
کتنی صدیوں سے ترا مجنوں نہیں سویا ہے


کس نے سازش کی زمینوں پہ ہیں کاٹی فصلیں
زہر کا بیج بتا کس نے یہاں بویا ہے
ہم نے بیلوں کو نہیں باندھا ذرا غور کرو
رزق نے باندھ کے انساں کو یہاں جویا ہے

بے صدا سے شہر میں کچھ لوگ تنہا رہ گئے
آنکھ سے آنسو گرے اور خواب سارے بہہ گئے
بے خبر سی رات میں سنسان گلیوں کے چراغ
رتجگوں کی چاہ میں کیا کیا دلوں پر سہ گئے


دیکھنے سے لگ رہا ہے آپ بھی واقف سے ہیں
جن پہ نازاں تھے کبھی یہ بات ہم کو کہہ گئے
کیا کریں شکوہ کسی سے زندگی کا ہم میاں
سننے والے سنتے سنتے کب کے زیر تہہ گئے


زندگی کی دھوپ میں سایہ تھا جن کے نام کا
کیا ہوئے وہ پیار کے مینار کیسے ڈھہ گئے
کیا ہوا جو چال چلتے مٹ گئے ہم پٹ گئے
ہم پیادے تھے مگر میداں میں بن کے شہہ گئے


کس نگر میں شمس ڈوبا تارے بھٹکے کس طرف
کس جہاں میں رات ٹھہری جگنو بادل مہ گئے