مثنوی شاعری

ہر شاخ میں ہے شگوفہ کاری
ثمرہ ہے قلم کا حمد باری
کرتا ہے یہ دو زباں سے یکسر
حمد حق و مدحت پیمبر


پانچ انگلیوں میں یہ حرف زن ہے
یعنی کہ مطیع پنج تن ہے
ختم اس پہ ہوئی سخن پرستی
کرتا ہے زباں کی پیش دستی


خواستگاری جناب باری سے مثنوی گلزار نسیم کی ترتیب کے واسطے
یارب! میرے خامے کو زباں دے
منقار ہزار داستاں دے
افسانہ گل بکاولی کا


افسوں ہو بہار عاشقی کا
ہر چند سنا گیا ہے اس کو
اردو کی زباں میں سخن گو
وہ نثر ہے، داد نظم دوں میں


اس مے کو دو آتشہ کروں میں
ہر چند اگلے جو اہل فن تھے
سلطان قلمروسخن تھے
آگے ان کے فروغ پانا:


سورج کو چراغ ہے دکھانا
پر، عجز سخن سدا ہے باقی
دریا نہیں کار بند ساقی
طعنے سے زبان نکتہ چیں روک


رکھ لے مری اہل خامہ میں نوک
خوبی سے کرے دلوں کو تسخیر
نیرنگ نسیم باغ کشمیر
نقطے، ہوں سپند خوش بیانی


جدول، ہو حصار بحر خوانی
جو نکتہ لکھوں کہیں نہ حرف آئے
مرکز پہ کشش مری پہنچ جائے
داستان تاج الملوک شاہ زادے اور زین الملوک باشاہ مشرق کی


روداد زمان پاستانی
یوں نقل ہے خامے کی زبانی
پورب میں ایک تھا شہنشاہ
سلطان زین الملوک ذی جاہ


لشکر کش و تاج دار تھا وہ
دشمن کش و شہر یار تھا وہ
خالق نے دیے تھے چار فرزند
دانا، عاقل، ذکی، خردمند


نقشہ ایک اور نے جمایا
پس ماندہ کا پیش خیمہ آیا
امید کے نخل نے دیا بار
خورشید حمل ہوا نمودار


وہ نور کہ صدقے مہرانور
وہ رخ کہ نہ ٹھہرے آنکھ جس پر
نور آنکھ کا کہتے ہیں پسر کو
چشمک تھی نصیب اس پدر کو


خوش ہوتے ہی طفل مہ جبیں سے
ثابت یہ ہوا ستارہ بیں سے
پیارا یہ وہ ہے کہ دیکھ اسی کو
پھر دیکھ نہ سکیے گا کسی کو


نظروں سے گرا وہ طفل ابتر
مانند سر شک دیدہ تر
پردے سے نہ دایہ نے نکالا
پتلی سا نگاہ رکھ کے پالا


تھا افسر خسرواں وہ گل فام
پالا، تاج الملوک رکھ نام
جب نام خدا جواں ہوا وہ
مانند نظرواں ہوا وہ


آتا تھا شکار گاہ سے شاہ
نظارہ کیا پدرنے ناگاہ
صاد آنکھوں کے دیکھ کے پسر کی
بینائی کے چہرے پر نظر کی


مہر لب شہ ہوئی خموشی
کی نور بصر سے چشمک پوشی
دی آنکھ جو شہ نے رونمائی
چشمک سے نہ بھائیوں کے بھائی


ہر چند کے بادشاہ نے ٹالا
اس ماہ کو شہر سے نکالا
گھر یہی ذکر تھا یہی شور
خارج ہوا نور دیدہ کور


آیا کوئی لے کے نسخہ نور
لایا کوئی جاکے سرمۂ طور
تقدیر سے چل سکا نہ کچھ زور
بینہ نہ ہوا وہ دیدہ کور


ہوتا ہے وہی خدا جو چاہے
مختار ہے، جس طرح نبا ہے
جانا چاروں شاہ زادوں کا بہ تجویز کحال تلاش گل بکاولی کو
پایا جو سفید چشم صفحا


یوں میل قلم نے سرمہ کھینچا
تھا اک کحال پیر دیریں
عیسی کی تھیں اس نے آنکھیں دیکھیں
وہ مرد خدا بہت کراہا


سلطاں سے ملا، کہا کہ شاہا!
ہے باغ بکاولی میں اک گل
پلکوں سے اسی پہ مار چنگل
خورشید میں یہ ضیا کرن کی


ہے مہر گیا اسی چمن کی
اس نے تو گل ارم بتایا
لوگوں کو شگوفہ ہاتھ آیا
شہ زادے ہوئے وہ چاروں تیار


رخصت کیے شہ نے چار ناچار
شاہانہ چلے وہ لے کے ہمراہ
لشکر، اسباب، خیمے، خرگاہ
وہ بادیہ گرد خانہ برباد


یعنی تاج الملوک ناشاد
میدان میں خاک اڑا رہا تھا
دیکھا تو وہ لشکر آرہا تھا
پوچھا تم لوگ خیل کے خیل


جاتے ہو کدھر کو صورت سیل؟
بولا لشکر کا اک سپاہی
جاتی ہے ارم کو فوج شاہی
سلطاں زین الملوک شہ زور


دیدار پسر سے ہوگیا کور
منظور علاج روشنی ہے
مطلوب گل بکاولی ہے
گل کی جو خبر سنائی اس نے


گلشن کی ہوا سمائی اس کو
ہمرہ کسی لشکری کے ہوکر
قسمت پہ چلا یہ نیک اختر
غلام ہونا چاروں شاہ زادوں کا چوسر کھیل کر دلبر بیسوا سے


نقطوں سے قلم کی مہر ہ بازی
یوں لاتی ہے رنگ بد طرازی

یک چند پھرا کیا وہ انبوہ


صحرا صحرا و کوہ در کوہ
بلبل ہوئے سب ہزار جی سے
گل کا نہ پتا لگا کسی سے
وارد ہوئے ایک جگہ سر شام


فردوس تھا اس مقام کا نام
اک نہر تھی شہر کے برابر
ٹھٹکے سیارے کہکشاں پر
اک باغ تھا نہر کے کنارے


جویاے گل اس طرف سدھارے
دلبر نام ایک بیسوا تھی
اس ماہ کی واں محل سرا تھی
دروازے سے فاصلے پہ گھر تھا


نقارہ چو بدار در تھا
بے جا و بجا نہ سمجھے ان جان
نقارہ بجا کے ٹھہرے نادان
آواز پہ وہ لگی ہوئی تھی


آپ آن کے ٹھاٹھ دیکھتی تھی
جس شخص کو مال دار پاتی
باہر سے اسے لگا کے لاتی
بٹھلا کے، جوے کا ذکر اٹھا کر


چوسر میں وہ لوٹتی سراسر
جیت اس کی تھی، ہاتھ جو کچھ آتا
اس کا کوئی ہتکھنڈا نہ پاتا
بلی کا سر چراغ داں تھا


چوہا پاسے کا پاسباں تھا
الٹاتے اڑی پہ، قسمت آسا
بلی، جو دیا موش، پاسا
جیتے ہوئے بندے تھے ہزاروں


قسمت نے پھنسائے یہ بھی چاروں
صیادنی لائی پھانس کر صید
کرسی پہ بٹھائے نقش امید
گھاتیں ہوئیں دل ربائیوں کی


باتیں ہوئیں آشانائیوں کی
رنگ اس کا جما، تو لا کے چوسر
کھیلی وہ کھلاڑ بازی بد کر
وہ چھوٹ پہ تھی، یہ میل سمجھے


بازی چوسر کی کھیل سمجھے
مغرور تھے مال و زر پہ کھیلے
ساماں ہارے تو سر پہ کھیلے
بدبختی سے آخر جوا تھا


بندہ ہونا بدا ہوا تھا
دو ہاتھ میں چاروں اس نے لوٹے
پنچے میں پھنسے تو چھکے چھوٹے
ایک ایک سے رات بھر نہ چھوٹا


پوپھٹتے ہی جگ ان کا ٹوٹا
زنداں کو چلے مچل مچل کر
نردوں کی طرح پھرے نہ چل کر
لشکر میں سے جوگیا سوئے شہر


پانی سا پھرا نہ جانب نہر
جیتنا تاج الملوک کا دلبر بیسوا کو اور چھوڑ کر روانہ ہونا تلاش گل بکاولی میں
لانا زر گل جو ہے ارم سے
یوں صفحے سے نقش ہے قلم سے


وہ ریگ رواں کا گرد لشکر
یعنی تاج الملوک ابتر
حیران ہوا کہ یا الٰہی!
لشکر پہ یہ کیا پڑی تباہی


اٹھا کہ خبر تو لیجے چل کر
گزرا در باغ بیسوا پر
حیران تھا یہ بلند پایہ
نکلی اندر سے ایک دایہ


لڑکا کوئی گھو گیا تھا اس کا
ہم شکل یہ مہ لقا تھا اس کا
بولی وہ کہ نام کیا ہے تیرا
فرزند اسی شکل کا تھا میرا


بولا وہ کہ نام تو نہیں یاد
طفلی میں ہوا ہوں خانہ برباد
لیکن یہ میں جانتا ہوں دل گیر
مادر تھی مری بھی ایسی ہی پیر


بیٹا وہ سمجھ کے جی سے اس کو
گھر لائی ہنسی خوشی سے اس کو
چلتے تھے ادھر سے دو جواری
ایک ایک کی کر رہا تھا خواری


کہتے تھے: فریب دو گے کیا تم
شہ زادے نہ ہم، نہ بیسوا تم
ذکر اپنے برادروں کا سن کر
بولا وہ عزیز، سن تو مادر!


کون ایسی کھلاڑ بیسوا ہے
شہ زادوں کو جس نے زچ کیا ہے؟
بولی وہ کہ ہاں جوا ہے بدکام
دلبر اک بیسوا ہے خود کام


بلی پہ چراغ رکھ کےشب کو
چوسر میں وہ لوٹتی ہے سب کو
پاسے کی ہے کل چراغ کے ساتھ
وہ بلی کے سر، یہ چوہے کے ہاتھ


شہ زادے کہیں کے تھے بد اقبال
بندے ہوئے، ہار کر زر و مال
بھائی، جوش خوں کہاں جائے
صدمہ ہوا، درد سے کہا ہائے!


پاسے کا، چراغ کا الٹ پھیر
سوجھا نہ اانھیں، یہ دیکھو اندھیر
سوچا وہ کہ اب تو ہم ہیں آگاہ
جیتے ہیں، تو جیت لیں گے ناگاہ


اک بلی جھپٹی چوہے کو بھانپ
نیولے تے بھگا دیا دکھا سانپ
سمجھا وہ کہ ہے شگوں نرالا
نیولا پکڑ آستیں میں پالا


چوسر ہی کے سیکھنے کو اکثر
گھوما وہ بہ رنگ نرد گھر گھر
اک روز اسے مل گیا امیر ایک
وہ صاحب جاہ دل سے تھا نیک


اشراف سجمھ کے لے گیا گھر
بخشا اسے اسپ و جامہ و زر
اس گل کے ہاتھ میں جو زر آیا
جاں بازی کو سوے دلبر آیا


ملتی تھی کھلاڑ ڈنکے کی چوٹ
نقارہ و چوب میں چلی چوٹ
آواز وہ سن کے در پر آئی
ہمرہ اسے لے کے اندر آئی


کام اس کا تھا بس کہ کھیل کھانا
چوسر کا جما وہ کارخانہ
وہ چشم و چراغ بیسوا کے
کرنے لگے تاک جھانک آ کے


نیولا، کہ وہ مار آستیں تھا
چٹکی کے بجاتے ہی وہیں تھا
بلی تو چراغ پا تھی خاموش
بل ہو گیا موش کو فراموش


ہنس ہنس کے حریف نے رلایا
مانند چراغ اسے جلایا
بارے بہ ہزار بددماغی
لی خضر نے غول سے چراغی


پا سے چلی نہ جعل سازی
اجڑی وہ، بسا بسا کے بازی
سب ہار کے نقد و جنس، بارے
جیتے ہوئے بندے بد کے ہارے


بنیاد جو کچھ تھی، جب گنوائی
تب خود وہ کھلاڑ، مہرے آئی
پھر پاسے کی نہ پاس داری
ہمت کی طرح وہ دل سے ہاری


پاسے کی بدی ہے آشکارا
راجانل سلطنت ہی ہارا
دانا تو کرے کب اس طرف میل
ہارا ہے جوے کے نام سے بیل


ہارے، دیکھا جو بیسوا نے
بندہ کیا غیر کا خدا نے
سوچی کہ نہ اب بھی چال رہیے
شادی کا مزہ نکال رہیے


بولی نہ ہزار عجز و زاری
تم جیتے میاں میں تم سے ہاری
لونڈی ہوں، نہیں عدول مجھ کو
خدمت میں کرو قبول مجھ کو


بولا وہ کہ سن، یہ ہتکھنڈے چھوڑ
نقارہ در کو چوب سے توڑ
یہ مال، یہ زر، یہ جیتے بندے
یوں ہی یہیں رکھ بجنس چندے


بالفعل ارم کو جاتے ہیں ہم
انشاء اللہ آتے ہیں ہم
بولی وہ۔ سنو تو بندہ پرور!
گلزار ارم ہے پریوں کا گھر


انسان و پری کا سامنا کیا!
مٹھی میں ہوا کا تھا منا کیا!
شہ زادہ ہنسا، کہا کہ دلبر!
کچھ بات نہیں، جو رکھیے دل پر


انسان کی عقل اگر نہ ہو گم
ہے چشم پری میں جاے مردم
یہ کہہ کے اٹھا، کہا کہ لو جان!
جاتے ہیں، کہا: خدا نگہ بان!


دولت تھی اگر چہ اختیاری
پا مردی سے اس پہ لات ماری
جز جیب، نہ مال پر پڑا ہاتھ
جز سایہ، نہ کوئی بھی لیا ساتھ


درویش تھا بندۂ خدا وہ
اللہ کے نام پر چلا ہو
پہنچنا تاج الملوک کا سرنگ کھدواکر باغ بکاولی میں اور گل لے کر پھرنا
کرتا ہے جو طے سواد نامہ


یوں حرف، ہیں نقش پاے خامہ
وہ دامن دشت شوق کا خار
یعنی تاج الملوک دل زار
اک جنگلے میں جا پڑا جہاں گرد


صحراے عدم بھی تھا جہاں، گرو
سایے کو پتا نہ تھا شجر کا
عنقا تھا، نام جانور کا
مرغان ہوا تھے ہوش راہی


نقش کف پا تھے ریگ ماہی
وہ دشت کہ جس میں پر تگ و دو
یا ریگ رواں تھی یا وہ رہ رو
ڈانڈا تھا ارم کے بادشاہ کا


اک دیو تھا پاسباں بلا کا
دانت اس کے: گور کن قضا کے
دو نتھنے: رہ عدم کے ناکے
سر پر پایا بلا کو اس نے


تسلیم کیا قضا کو اس نے
بھوکا کئی دن کا تھا وہ ناپاک
فاقوں سے رہا تھا پھانک کر خاک
بے ریشہ یہ طفل نوجواں تھا


حلوا بے دود بے گماں تھا
بولا کہ چھکوں گاہیں یہ انساں
اللہ اللہ! شکر، احساں!
شہ زادہ کہ منہ میں تھا اجل کے


اندیشے سے رہ گیا دہل کے
پل مارنے کی ہوئی جو دیری
سبحان اللہ شان تیری!
اشتر کئی جاتے تھے ادھر سے


پر آردو روغن و شکر سے
وہ دیو لپک کے مار لایا
غراتے ہوئے شکار لایا
اونٹوں کی جو لو تھیں دیو لایا


دم اس کا نہ اس گھڑی سمایا
تیورا کے وہیں وہ بار بر دوش
بیٹھا تو گرا، گرا تو بے ہوش
چاہا اس نے کہ مار ڈالو


یا بھاگ سکو تو راستہ لو
وہ اونٹ تھے کاروانیوں کے
سب ٹھاٹھ تھے میہانیوں کے
میدہ بھی، شکر بھی، گھی بھی پایا


خاطر میں یہ اس بشر کی آیا
میٹھا اس دیو کو کھلاؤ
گڑ سے جو مرے، تو زہر کیوں دو
حلوے کی پکا کے اک کڑھائی


شیرینی دیو کو چڑھائی
ہر چند کہ تھا وہ دیو کڑوا
حلوے سے کیا منہ اس کا میٹھا
کہنے لگا: کیا مزہ ہے دل خواہ!


اے آدمی زاد واہ وا واہ!
چیز اچھی کھلائی تو نے مجھ کو
کیا اس کے عوض میں دوں میں تجھ کو
بولا وہ کہ پہلے قول دیجے


پھر جو میں کہوں، قبول کیجے
وہ ہاتھ پر اس کے مار کر ہاتھ
بولا کہ ہے قول جان کے ساتھ
بولا وہ کہ قول اگر یہی ہے


بد عہدی کی پر نہیں سہی ہے
گلزار ارم کی ہے مجھے دھن
بولا وہ: ارے بشر وہ گلبن!
خورشید کے ہم نظر نہیں ہے


اندیشے کا واں گزر نہیں ہے
واں موج ہوا: ہوا پہ اژدر
واں ریگ زمیں: زمیں پہ اخگر
ہوتا نہ جو قول کا سہارا


بچتانہ یہیں تو خیر، ہارا
رہ جا، میرا بھائی ایک ہے اور
شاید کچھ اس سے بن پڑے طور
اک ٹیکرے پر گیا، بلایا


وہ مثل صدائے کوہ آیا
حال اس سے کہا کہ قول ہارا
ہے پیر، یہ نوجواں ہمارا
مشتاق ارم کی سیر کا ہے


کوشش کرو، کم خیر کا ہے
حمالہ نام دیونی ایک
چھوٹی بہن اس کی تھی بڑی نیک
خط اس کو لکھا بہ ایں عبارت


اے خواہر مہرباں! سلامت
پیارا ہے یہ میرا آدمی زاد
رکھیو اسے، جس طرح مری یاد
انسان ہے، چاہے کچھ جو سازش


مہمان ہے، کیجیو نوازش
خط لے کے، بشر کو لے اڑا دیو
پہنچا حمالہ پاس بے ریو
بھائی کا جو خط بہن نے پایا


بھیجے ہوئے کو گلے لگایا
اس دیونی پاس اک حسیں تھی
زنبور کے گھر میں انگبیں تھی
محمودہ نام، دخت آدم


لے ائی تھی دیونی دے کے دم
جوڑا ہم جنس کے ہاتھ آیا
محمودہ کے گلے لگایا
دن بھر تو الگ تھلگ ہی تھے وہ


دو وقت سے شام کو ملے وہ
تھے ضببط و حیا کے امتحاں میں
پردہ رہا ماہ میں، کتاں میں
آپس میں کھلے نہ شرم سے وہ


خاطر کی طرح گرہ رہے وہ
بولا وہ فسردہ دل سحر گاہ
کیا سرد ہوا ہے واہ وا واہ!
بولی وہ کہ ہونے کو ہوا ہے


جو غنچے کو گل کرے، صبا ہے
بولا وہ، یہی تو چاہتا ہوں
گل پاؤں، تو میں ابھی ہوا ہوں
پیراہن گل کی بو، تھی مطلوب


یوسف نے کہا وہ حال یعقوب
اول کہی بد نگاہی اپنی
بعد اس کے وہ سب تباہی اپنی
کھولی تھی زبان منہ اندھیرے


کہتے سنتے اٹھے سویرے
پوچھا حمالہ نے: میری جان!
ہم جنس ملا، نکالے ارمان
بولی وہ کہ کہتے آتی ہے شرم


دل سرد رہا، بغل ہوئی گرم
ناکامی کے جب وہ طور سمجھی
وہم اس کو ہوا، کچھ اور سمجھی
پوچھا کہ بتا تو درد، لیکن


تم چاہو، تو ہے دوا بھی ممکن
وہ بولی: جو تو کہے زباں سے
تارے لے آؤں آسماں سے
چہرے کو چھپا کے زیر چادر


محمودہ نے کہا کہ مادر!
باپ اس کا ہے اندھے پن سے مجہول
مطلوب بکاولی کا ہے پھول
دل داغ اس کا براے گل ہے


نرگس کے لیے ہواے گل ہے
ساعی تھی بہ دل یہ کہنے والی
راہ اس نے سرنگ کی نکالی
دیووں کہا کہ چوہے بن جاؤ


تا باغ ارم سرنگ پہنچاؤ
سن حاجت نقب بہر گل گشت
کترا چوہوں نے دامن دشت
پوشیدہ زمیں کے دل میں کی راہ


حد باندھ کے، خوش پھرے اسی راہ
جب مہر تہ زمیں سمایا
اس نقب کی رہ وہ آدم آیا
صحن چمن ارم میں اک جا


بوٹا سا تہ زمیں سے نکلا
کھٹکا جو نگاہ بانوں کا تھا
دھڑکا یہی دل کا کہہ رہا تھا
گوشے میں کوئی لگا نہ ہووے!


خوشہ کوئی تاکتا نہ ہووے!
گو باغ کے پاسباں غضب تھے
خوابیدہ بہ رنگ سبزہ سب تھے
نرگس کی کھلی نہ آنکھ یک چند


سو سن کی زباں خدانے کی بند
خوش قدر وہ چلا گل وہ سمن میں
شمشاد رواں ہوا چمن میں
ایوان بکاولی جدھر تھا


حوض آئنہ دار بام و در تھا
رکھتا تھا وہ آب سے سوا تاب
چندے خورشید، چندے مہتاب
پھول اس کا، اندھے کی دوا تھا


رشک جام جہاں نما تھا
پانی کے جو بلبلوں میں تھا گل
پہنچا لب حوض سے نہ چنگل
پوشاک اتار، اتر کے لایا


پھولا نہ وہ جامے میں سمایا
گل لے کے بڑھا ایاغ برکف
چوری سے چلا چراغ برکف
بالا دری واں جو سوتے کی تھی


سو خواب گہہ بکاولی تھی
گول اس کے ستوں: تھے ساعد حور
چلمن: مژگان چشم مخمور
دکھلاتا تھا وہ مکان جادو


محراب سے ، درسے چشم و ابرو
پردہ جو حجاب سا اٹھایا
آرام میں اس پری کو پایا
بند اس کی وہ چشم نرگسی تھی


چھاتی کچھ کچھ کھلی ہوئی تھی
سمٹی تھی جو محرم اس قمر کی
برجوں پہ سے چاندنی تھی سر کی
لپٹے تھے جو بال کروٹوں میں


بل کھا گئی تھی کمر، لٹوں میں
چاہا کہ بلا گلے لگائے
سوتے ہوئے فتنے کو جگائے
سوچا کہ یہ زلف کف میں لینی


ہے سانپ کے منہ میں انگلی دینی
یہ پھول، انھی اژدہوں کا ہے من
یہ کالے، چراغ کے ہیں دشمن
گل چھن کے، ہنسی نہ ہوئے بلکل


خندہ نہ ہو برق حاصل گل
پھر سمجھیں گے، ہے جو زندگانی
کچھ نام کو رکھ چلو نشانی
انگشتری اپنی اس سے بدلی


مہر خط عاشقی سندلی
آہستہ پھر وہ سر و بالا
سایہ بھی نہ اس پری پہ ڈالا
ہیبت سا زمیں کے دل میں آیا


اندیشے کی طرح سے سمایا
جب نقب افق سے مہر تاباں
نکلا، تو وہ ماہ روشتاباں
گل ہاتھ میں مثل دست انساں


دونوں تھیں اس کی منتظرواں
گل لے کے جب آملا وہ گل چیں
اس نقب کی رخنہ بندیاں کیں
آوارہ ہونا بکاولی کا تاج الملوک گل چیں کی تلاش میں


گل کا جو الم چمن چمن ہے
یوں بلبل خامہ نعرہ زن ہے
کل چیں نے وہ پھول جب اڑایا
اور غنچہ صبح کھل کھلایا


وہ سبزہ باغ خواب آرام
یعنی وہ بکاولی گل اندام
جاگی مرغ سحر کے غل سے
اٹھی نکہت سی فرش گل سے


منہ دھونے جو آنکھ ملتی آئی
پرآب وہ چشم حوض پائی
دیکھا، تو وہ گل ہوا ہوا ہے
کچھ اور ہی گل کھلا ہوا ہے


گھبرائی کہ ہیں! کدھر گیا گل!
جھنجلائی کہ کون دے گیا جل
ہے ہے مرا پھول لے گیا کون!
ہے ہے مجھے خار دے گیا کون


ہاتھ اس پہ اگر پڑا نہیں ہے
بو ہو کے تو پھول اڑا نہیں ہے
نرگس! تو دکھا کدھر گیا گل؟
سوسن! تو بتا کدھر گیا گل؟


سنبل! مرا تازیانہ لانا
شمشاد! انھیں سولی پر چڑھانا
تھرائیں خواصیں صورت بید
ایک ایک سے پوچھنے لگی بھید


نرگس نے نگاہ بازیاں کیں
سوسن نے زباں درازیاں کیں
پتا بھی پتے کو جب نہ پایا
کہنے لگیں: کیا ہوا خدایا!


اپنوں میں سے پھول لے گیا کون
بیگانہ تھا سبزے کو سوا کون!
شبنم کے سوا چرانے والا
اوپر کا تھا کون آنے والا


جس کف میں وہ گل ہو، داغ ہو جائے
جس گھر میں ہو، گل چراغ ہو جائے
بولی وہ بکاولی کہ افسوس!
غفلت سے یہ پھول پر پڑی اوس


آنکھوں سے عزیز گل مرا تھا
پتلی وہی چشم حوض کا تھا
نام اس کا صبا! نہ لیتی تھی میں
اس گل کو ہوا نہ دیتی تھی میں


گل چیں کا جو ہائے ہاتھ ٹوٹا
غنچے کے بھی منہ سے کچھ نہ پھوٹا
اوخار! پڑا نہ تیرا چنگل
مشکیں کس لیں نہ تو نے سنبل!


او باد صبا! ہوا نہ بتلا
خوش بو ہی سنگھا، پتا نہ بتلا
بلبل! تو چہک، اگر خبر ہے
گل! تو ہی مہک، بتا کدھر ہے؟


لرزاں تھی زمیں یہ دیکھ کہرام
تھی سبزے سے راست مو بر اندام
انگلی لب جو پہ رکھ کے شمشاد
تھا دم بہ خود، اس کی سن کے فریاد


جو نخل تھا، سوچ میں کھڑا تھا
جو برگ تھا، ہاتھ مل رہا تھا
رنگ اس کا عرض لگا بدلنے
گل برگ سے کف لگی ہو ملنے


بدلے کی انگوٹھی ڈھیلی پائی
دست آویز اس کے ہاتھ آئی
خاتم، تھی نام کی نشانی
انسان کی دست برد جانی


ہاتھوں کو ملا، کہا کہ ہیہات!
خاتم بھی بدل گیا ہے بدذات
جس نے مجھے ہاتھ ہے لگایا
وہ ہاتھ لگے کہیں خدایا!


عریاں مجھے دیکھ کر گیا ہے
کھال اس کی جو کھینچے، سزا ہے
یہ کہہ کے، جنون میں غضب ناک
خوں روئی، لباس کو کیا چاک


گل کا سا لہو بھرا گریباں
سبزے کا سا تار تار داماں
دکھلا کے کہا سمن پری کو
اب چین کہاں بکاولی کو


تھی بس کہ غبار سے بھری وہ
آندھی سی اٹھی، ہوا ہوئی وہ
کہتی تھی پری کہ اڑکے جاتی
گل چیں کا کہیں پتا لگاتی


ہر باغ میں پھولتی پھری وہ
ہر شاخ پہ جھولتی پھری وہ
جس تختے میں مثل باد جاتی
اس رنگ کے گل کی بو نہ پاتی


بے وقت کسی کو کچھ ملا ہے!
پتا کہیں حکم بن ہلا ہے!
پہنچنا تاج الملوک کا ایک اندھے فقیر کے تکیے پر اور آزمانا گل کا
پھر نا جو وطن کا، مدعا ہے


اب صفحے پہ یو ں قلم پھرا ہے
وہ گلشن مدعا کا گل چیں
یعنی تاج الملوک حق بیں
جس وقت گل اس چمن سے لایا


محمودہ خوش ہوئی کہ آیا
کہنے لگی: لو مراد پائی
بولا وہ: جو یاں سے ہو رہائی
گل کی وہ عرض کر آشکارا


جوبن کی طرح اسے ابھارا
جب دیو سیاہ شب سے ماہتاب
رخصت ہوا، جیسے چشم سے خواب
اور گل لیے آفتاب تاباں


ہنگام سحر ہوا شتاباں
وہ مہر وش اور اوہ ماہ پیکر
اس دیونی پاس آتے مضطر
گل کی وہ عرض جتائی اس کو


رخصت کی طلب سنائی اس کو
کیا کہتی وہ دیونی، کہا: جاؤ
دیووں سے کہا کہ تخت لے آؤ
بولے کہ کدھر چلو گے، کہہ دو


فردوس کے رخ، کہا، ادھر کو
وہ مڑ کے، ادھر کو اڑاکے آئے
گلزار میں بیسوا کے لائے
وقت سحر اور خنک ہوا تھی


گل گشت چمن مین بیسوا تھی
چار آنکھیں ہوئیں تو تھی شناسا
قدموں پہ گری وہ سایہ آسا
صدقے ہو کر کہا: خوش آئے


جس گل کی ہوا لگی تھی، لائے؟
ہمراہ یہ کون دوسری ہے؟
سایہ ہے کہ ہم قدم پری ہے!
بولا شہ زادہ: شکر ہے، ہاں


پر ہے گل آرزو سے داماں
محمودہ نام یہ جو ہیں ساتھ
پھول ان کے سبب سے آگیا ہاتھ
جیتا جو پھرا وہ رشک شمشاد


قیدی کیے بیسوا نے آزاد
جھوٹوں اس نے تھا ان کو تایا
سچوں، کھوٹوں نے داغ کھایا
دغا، تو چلے تفنگ سے وہ


چھوٹے قید فرنگ سے وہ
چھوڑا ہوس گل و چمن کو
چاروں داغی پھرے وطن کو
بندوں کو کشتیوں پہ کر بار


سونپا سب ناخدا کو گھر بار
جب متصل آگیا وطن کے
خندے یاد آئے مرد و زن کے
سوچا کہ میں خود ہوں خانہ برباد


کیا جانیے کیا پڑے گی افتاد
لازم ہے گل اپنے ہاتھ رکھیے
موقع نہیں بھیڑ ساتھ رکھیے
لنگر کا انہیں کیا اشارہ


خود کشتی سے کر گیا کنارہ
وہ پوربی، کر کے جو گیا بھیس
جنگلے کی راہ سے چلا دیس
تکیے پہ فقیر، پیر، اندھا


اک گوشے میں آنکھیں مانگتا تھا
تھا نقش قدم سا خاک رہ پر
ٹھہرا وہ مسافر اس جگہ پر
بے تجربہ تھی نمایش گل


واجب تھی آزمایش گل
پتلی پہ زر گل آزمایا
سونے کو کسوٹی پر چڑھایا
گل سے ہوئیں چشم کور تاباں


ہو جیسے چراغ سے چراغاں
منہ دیکھ کے اس نے دیں دعائیں
پنجے سے مژہ کے لیں بلائیں
گل کے جو اثرسے شادماں تھا


گل چیں وہ ہوا سے ہم عناں تھا
ملنا چاروں شہ زادوں کا اور چھن جانا گل بکاولی کا
تاج الملوک سے اور بینا ہونا چشم زین الملوک کا
ہے بس کہ یہ چرخ جور پیشہ


یوں خار رہ قلم ہے ریشہ
یہ جا کے، اسی جگہ پہ ناگاہ
آپہنچے وہ چاروں غول گم راہ
کہتے تھے کہ واہ رے مقدر!


کس شک سے پھر کے جاتے ہیں گھر

کیا رنگ زمانے نے دکھائے!
گل لینے گئے تھے، داغ لائے


کس منہ سے پدر کے آگے جائیں
کیوں کر بے پھول منہ دکھائیں
ٹھہرائی کہ اور پھول لے جایئں
کحال کو بے وقوف بنایئں


اک باد ہوائی توڑ کر پھول
کہنے لگے پھول پھول کر غول
کیا پھول ہے! کیا اثر ہے اس میں!
ہو جاتی ہیں روشن اندھی آنکھیں


وہ کور کہ ہو چکا تھا بینا
دیکھا اس نے جو یہ قرینا
بولا کہ یہ گل، وہ گل نہیں ہے
اس پھول کی اور گل زمیں ہے


وہ جوگی جو جاتے ہیں، اگر آئیں
دکھلائیں وہ گل، تو آنکھیں کھل جائیں
میں کور، ابھی ہو چکا ہوں بینا
اندھا نہیں اب ہوا ہوں بینا


چاروں کو تھی حسرت گل تر
چو بائی ہوا کی طرح چل کر
اس جوگی کے جب برابر آئے
باہم کہا: دیکھو پھول لائے


گل ہے کہ علاج نور ہے یہ!
گل ہے کہ چراغ طور ہے یہ!
جوگی، یعنی وہ شاہ زادہ
بولا کہ بکو نہیں زیادہ


پاتے اگر اس درخت کی چھاؤں
رکھتے ہی نہ تم زمین پر پاؤں
ڈینگ آپ کی سب فضول ہے یہ
وہ گل یہ نہیں، وہ پھول ہے یہ


یہ کہہ کے، جو جیب سے نکالا
ان مفت بروں نے ہاتھ ڈالا
قوت میں وہ چارتھے، یہ بے کس
شورش میں وہ چار، موج، یہ خس


غولوں نے بہ زور پھول اڑایا
اس خضر کو راستہ بتایا
گل پانے سے بس کہ سرخ رو تھے
گھوڑوں پہ ہوا کے مثل بو تھے


تعجیل سے رو بہ راہ آئے
گل لے کے حضور شاہ آئے
گل لائے جو نور دیدہ دل خواہ
آنکھوں کی طرح پھڑک گیا شاہ


پنجے سے پلک کے پھول اٹھایا
اندھے نے گل آنکھوں سے لگایا
نور آ گیا چشم آرزو میں
آیا پھر آب رفتہ جو میں


خورشید بصر گہن سے چھوٹا
خیرات کے در کا قفل ٹوٹا
دولت جو پاس تھی، لٹائی
زر بخشا گل کی رونمائی


ایک ایک کو اس قدر دیا زر
محتاج، گدا، ہوئے تو نگر
سجوائے طرب کے کار خانے
بجوائے خوشی کے شادیانے


پہنچنا بکاولی کا دارالخلافت زین الملوک میں اور وزیر ہو کر تاج الملوک کی تلاش میں رہنا
گل چیں کا جو اب پتا ملا ہے
یو شاخ قلم سے گل کھلا ہے
وہ باد چمن چمن خراماں


یعنی وہ بکاولی پریشاں
گلشن سے جو خاک اڑاتی آئی
اس شہر میں آتی آتی آئی
دیکھا تو خوشی کے چہچہے تھے


گل چیں کے شگوفے کھل رہے تھے
گلبانگ زناں تھا، جو جہاں تھا
ایک ایک، ہزار داستاں تھا
پاتے ہی پتا، خوشی سے پھولی


شاد ایسی ہوئی کہ رنج بھولی
جادو سے بنی وہ آدمی زاد
انسانوں میں آ ملی پری زاد
سلطاں کی سواری آرہی تھی


صورت جو نگاہ کی، پری تھی
پوچھا: اے آدم پری رو!
انساں ہے، پری ہے، کون ہے تو؟
کیا نام ہے اور وطن کدھر ہے؟


ہے کون سا گل، چمن کدھر ہے؟
دی اس نے دعا، کہا بہ صد سوز
فرخ ہو شہا! میں ابن فیروز
گل ہوں، تو کوئی چمن بتاؤں!


غربت زدہ کیا وطن بتاؤں!
گھر بار سے کیا فقیر کو کام
کیا لیجیے چھوڑے گاؤں کا نام
پوچھا کہ سبب؟ کہا کہ قسمت


پوچھا کہ طلب؟ کہا: قناعت
باتوں پہ فدا ہوا شہنشاہ
لایا بہ صد امتیاز ہمراہ
چہرے سے امیرزادہ پایا


گھر لا کے، وزیر اسے بنایا
نذریں لیے بندگان درگاہ
دستور سے آملے بہ صد جاہ
دربار میں چاروں شاہ زادے


دیکھے، تو کھلے وہ دل کے سادے
چاہا، گل چیں کا امتحاں لے
پوچھا کہ نگیں جو لے، کہاں لے؟
بتلانے لگے وہ چاروں ناداں


کوئی یمن اور کوئی بدخشاں
جانا کہ جو گل یہ لائے ہوتے
خاتم کے نگیں بتائے ہوتے
تجویز میں تھا یہ صاحب فکر


آیا تاج الملوک کا ذکر
نقش اس کو ہوا کہ بس وہی ہے
ان سادوں سے کندہ کب ہوئی ہے
ظاہر نہ کیا بطون اپنا


طالع سے لیا شگون اپنا
منزل گہ رہ رواں بنا کے
شام و سحر اس میں آپ آکے
رہ رو کو دیا بہ لطف و اکرام


آتے آرام، جاتے پیغام
آباد ہونا تاج الملوک کا گلشن نگاریں بنوا کے اور شہرہ ہونا
تعمیر مکاں کے ہیں جو آثار
یوں خامہ ہے بہر بیت، معمار


شہ زادہ کہ عازم وطن تھا
گل پانے سے خوش چمن چمن تھا
اندھے کو کیا جب اس نے بینا
اور داغیوں نے وہ پھول چھینا


سوچا کہ خوشی خدا کی، غم کھاؤ
حمالہ دیونی کو بلواؤ
نقل ارم ایک مکاں بنا کے
رکھوں پریوں کو اپنی لاکے


بال آگ پہ رکھتے، آندھی آئی
وہ دیونی بال باندھی آئی
تنہا اسے دیکھ کر کہا: ہیں!
محمودہ کیا ہوئیں؟ کہا: ہیں


دریا پہ ہوں ان کو چھوڑ آیا
مسکن کے لیے تمھیں بلایا
لیکن وہ مکاں، وہ حوض، وہ باغ
جو باغ بکاولی کو دے داغ


حمالہ نے دیووں کو کیا یاد
آئے تو کہا: یہ بن، ہو آباد
ویرانے کو گل زمیں بناؤ
گلزار جو اہریں بناؤ


صناع طلسم کار تھے وہ
گلشن کے لیے بہار تھے وہ
دیووں نے ادھر محل بنایا
کشتی سے وہ دخت رز کو لایا


حمالہ اس کی مادر پیر
محمودہ سے ہوئی بغل گیر
کچھ دیووں کو چھوڑ کر وہیں پر
رخصت ہو کر چلی گئی گھر


گلشن میں سمن بڑوں کو لایا
نسریں بدنوں سے گھر بسایا
دونوں کو محل میں لا کے رکھا
پھل نخل مواصلت کا چکھا


دیووں کو کہا کہ بہر تمکیں
آباد ہو گلشن نگاریں
دیو، آدمی بن کے بن میں آئے
آتے جاتے کو گھیر لائے


جو سن کے خبر، گیا ادھر کو
جنت سے وہ پھر پھرا نہ گھر کو
ازبس کہ قریب شہر تھا باغ
خورشید افق نظر پڑا باغ


مفلس، زردار، امیر، قلاش
نوکر، تاجر، فقیر، خوش باش
گھر چھوڑ کے چل بسے سب انساں
پھر تن میں نہ آئے صورت جاں


ملاقات ٹھہرنی زین الملوک اور تاج الملوک کی آپس میں
گلشن جو بنا جواہر آگیں
یوں صفحہ قلم سے ہے نگاریں
ساعد نام ایک مہ لقا تھا


دلبر کا غالام با وفا تھا
صحرا سے جو سیر کر کے آیا
لکڑی کے چکا کے بو جھ لایا
دلوائے ہر ایک کو پے قوت


الماس و عقیق و لعل و یاقوت
تھی بس کہ وہ جا خلاصہ دہر
کچھ ٹھہرے، کچھ آئے جانب شہر
کف میں جو وہ لعل بے بہا تھے


من پاتے ہی، لوگ اژدہا تھے
شحنے نے سنا، پکڑ بلایا
لے کر اظہار، ساتھ آیا
دیکھا تو وہ جلوہ گاہ امید


اک دائرہ تھا بہ رنگ خورشید
دروازے پہ دیووں کا تھا پہرا
بھجوا کے خبر، وہ شحنہ ٹھہرا
جب واں سے طلب ہوا، تو درباں


لائے اسے پیشگاہ سلطاں
آداب کیا، ادب سے ٹھہرا
ہیبت زدہ دور سب سے ٹھہرا
ان لوگوں کو لے گیا تھا ہمراہ


معروض کیا کہ یا شہنشاہ!
کم مایہ یہ لوگ ہیں بہ ظاہر
چوری کے تو یہ نہیں جواہر
ساعد نے کہا کہ ہے یہ حاسد


نیت ہوئی ہوگی اس کی فاسد
حضرت! یہ وہی تو تبردار
جا، ان سے نہ بولیو، خبردار!
پھر کر انھی پاؤں شحنہ بے آس


آیا زین الملوک کے پاس
کی عرض کہ باغ اک بنا ہے
یہ شہر اجڑا ہے، وہ بسا ہے
جو کوئی ہے اس جگہ پہ جاتا


ڈھیروں ہے جواہرات پاتا
حضرت نے کہا کہ بک نہ خیرہ
قاروں کا وہیں ہے کیا ذخیرہ!
فرخ کہ وزیر باخرد تھا


سلطاں مشیر نیک و بد تھا
بولا کہ شہا! یہ بات کیا ہے
نیرنگ و فسوں کا گھر بڑا ہے
ہر چند کہ طرفہ حال ہے یہ


کچھ دور نہیں، مثال ہے یہ
حکایت ایک عورت کے مرد بن جانے کی دیو کے جادو سے
اک ملک میں ایک صاحب فوج
رکھتا تھا محل میں بارور زوج


تھا داغ پسر مقدر اس کو
جننی تھی ہمیشہ دختر اس کو
از بس کہ وہ شاہ تھا بد اختر
کرتا تھا حسد سے قتل دختر


اک بار محل میں پھر حمل تھا
وہ شاہ کہ ظلم میں مثل تھا
کھا بیٹھا قسم کہ اب کی باری
بیٹا جو نہ دے جناب باری


اقبال کا کچھ نہ جانے اوج
کر ڈالیے ذبح دختر و زوج
کنیا تھی غرض کہ راس اس کی
پوری نہ ہوئی وہ آس اس کی


سلطاں کا جو عہد بے خلل تھا
گھر والوں کو خوف کا محل تھا
ملحوظ بہ دل تھا پردہ راز
سیارہ شناسوں سے کیا ساز


ہر چند ستارہ مال کا تھا ماند
تھی چاندنی، شہرہ کر دیا چان
بیٹے کا وہ زائچہ بنا کے
گویا ہوئے دست بستہ آ کے


حضرت! یہ پسر ہے نیک اختر
بدیمن مگر ہے ایک اختر
جب تک نہ چلے یہ اپنے پاؤں
حضرت نہ پسر کے سامنے ہوں


حلیہ کر کے چھپا کے یک چند
بے تاب ہوا جب آرزومند
وہ گندم جو نما تھی بالی
مردانہ لباس سے نکالی


خوش ہو کے پدر نے بہر شادی
ٹھہرائی کہیں کی شاہ زادی
بن ٹھن کے عروس شک داماد
شادی کو چلی بہ جان ناشاد


اک شب کسی دشت میں تھے ڈیرے
اور روز نکاح تھا سویرے
خیمے سے وہ بے قرار نکلی
اس چھالے سے مثل خار نکلی


دیکھا تو اندھیری رات سنسان
اک عالم ہو ہے اور بیابان
ایک دیو وہاں پہ گشت میں تھا
جویاے شکار دشت میں تھا


دیکھا تو کہا: خضر ملے، آؤ
منہ کھولو، عدم کی راہ بتلاؤ
بولا وہ کہ سن تو آدمی زاد!
کیوں تنگ ہے جی سے، کیا ہے بیداد؟


اے مرد خدا! خدا کی سوگند
کہہ، جس لیے تو ہے آرزو مند
بولی وہ کہ یہ خیال، ہے خام
خنجر کا ہو کیا نیام سے کام


کہہ کر کھلے بندوں جی کی تنگی
بے ننگ، ہوئی وہ شوخ، ننگی
آنکھیں جھپکا کے دیو بولا
تو کیا کھلی، پردہ تو نے کھولا


خاطر تری، لے طلسم دکھلاؤں
تو مجھ سی بنے، میں تجھ سا بن جاؤں
موند آنکھ کہا، تو موند لی آنکھ
کھول آنکھ کہا، تو کھول دی آنکھ


پائے مردانگی کے پر تو
دامن میں سے دی چراغ نے لو
تھا لے میں یہاں اگا صنوبر
واں شیشہ، رہا ترش کے، ساغر


اب یاں سے ہے قصہ مختصر طول
فرخ کہ وہ تھا وزیر معقول
بولا کہ شہا! جو یہ ہوا ہے
اس بات کا پھر وجود کیا ہے


شہ نے کہا: سن وزیر دانا
بے دیکھے، سنے کو کس نے مانا
یاد آئی مجھے بھی اک روایت
یہ کہہ کے، بیان کی حکایت


حکایت نصیحت گری مرغ اسیر و نافہمی صیاد کی
اک مرغ ہوا اسیر صیاد
دانا تھا وہ طاہر چمن زاد
بولا جب اس نے باندھے بازو


کھلتا نہیں کس طمع پہ ہے تو
بیجا، تو ٹکے کا جانور ہوں
گر ذبح کیا، تو مشت پر ہوں
پالا، تو مفارقت ہے انجام


دانا ہو، تو مجھ سے لے مرے دام
بازو میں نہ تو مرے گرہ باندھ
سمجھاؤں جو پند، اسے گرہ باندھ
سن، کوئی ہزار کچھ سنائے


کیجے وہی جو سمجھ میں آئے
قابو ہو، تو کیجئے نہ غفلت
عاجز ہو، تو ہاریے نہ ہمت
آتا ہو، تو ہاتھ سے نہ دیجے


جاتا ہو، تو اس کا غم نہ کیجے
طائر کے یہ سن کلام، صیاد
بن داموں ہوا غلام صیاد
بازو کے جو بند کھول ڈالے


طائر نے تڑپ کے پر نکالے
اک شاخ پہ جا، چہک کے بولا
کیوں، پر مرا کیا سمجھ کے کھولا؟
ہمت نے مری، تجھے اڑایا


غفلت نے تری، مجھے چھڑایا
دولت نہ نصیب میں تھی تیرے
تھا لعل نہاں شگم میں میرے
دے کر صیاد نے دلاسا


چاہا، پھر کچھ لگائے لاسا
بولا وہ کہ دیکھ، کر گیا جعل
طائر بھی کہیں نگلتے ہیں لعل!
ارباب عرض کی بات سن کر


کر لیجیے یک بہ یک نہ باور
فرخ! یہ وہی مثل نہ ہوئے!
دیکھ آ، جو تجھے دہل نہ ہوئے
مشتاق تو تھا، چلا وہ دستور


دکھلائی دیا وہ بقعہ نور
نقشے میں وہ گلشن نگاریں
گلزار ارم سے تھا خوش آئیں
حیرت تھی کہ یہ طلسم کیا ہے!


پردیس میں ہوں کہ گھر مرا ہے!
اس سوچ میں تخت گہ تک آیا
حیراں وہ وزیر، شہ تک آیا
آداب اک کر کے حسب دستور


ٹھہرا، تو وہ بادشاہ مستور
سمجھا کہ حسین آدمی ہے
کیا جانے کہ خود بکاولی ہے
پوچھا کہ کدھر سے آئے، کیا نام؟


بولا وہ کہ نام سے ہے کیا کام
انسان ہوں، بندہ خدا ہوں
بھیجا زین الملوک کا ہوں
گستاخی معاف، آپ آئے


بن گھیر لیا، مکاں بنائے
بہکا کے بسائے مردم شہر
حضرت کا بڑا ہے آپ پر قہر
دعویٰ یہ ہے، یاں زمیں دابی


آبادی میں آئی ہے خرابی
خیر، اب بھی رفع شر جو چاہو
سر آنکھوں سے چل کے جبہہ سا ہو
بولا وہ کہ فتنہ گر نہیں ہم


شرجن سے ہو، وہ بشر نہیں ہم
درویشی میں دل کے بادشا ہیں
مسند کے تکیے پر گدا ہیں
دستور کہ عرض کر چکا تھا


مثل دل بد گماں رکا تھا
بولا: چلو صلح درمیاں ہو
باہم مہ و مہر کا قراں ہو
بولا وہ: فقیر کی بلا جائے


مشتاق جو ہو، وہ شوق سے آئے
بولا وہ کہ خیر، تابہ فردا
اٹھ جائے گا درمیاں سے پردا
یہ کہہ کے پھرا وزیر، آیا


پہنچا تو وہ شہر خالی پایا
شہ زادہ و شہ محل میں تھے واں
بر ہم زدہ بزم کے چراغاں
شہ نے جو وزیر آتے دیکھا


فرخ، فرخ پکار اٹھا
سلطاں کے نثار ہو کے دستور
بولا کہ بلاے شاہ ہو دور!
دیکھ آیا میں وہ مکان یاقوت


ہے معدن لعل و کان یاقوت
تختہ ہے زمردیں کہ مینو!
گلشن ہے جواہریں کہ جادو!
نقشہ کہوں کیا، نگار خانہ!


جادو کا تمام کار خانہ!
دیووں کی بنائی ہے وہ بنیاد
رہنے والے ہیں آدمی زاد
واں صاحب تاج و تخت جو ہے


درویش ہے، شاہ نام کو ہے
دیو اس کے عمل میں آگئے ہیں
جادو کے محل بنا گئے ہیں
کل آپ بھی چل کے کیجئے سیر


وعدہ کر آیا ہوں، کہا: خیر
بھید کھلنا چھپے ہوؤں کا ایک ایک پر
اب خامے سے وا شگاف یوں ہے
دل ملنے کی راہ صاف یوں ہے


فرخ جو گیا، تو شاہ زادہ
سوچا کہ ہوں ٹھاٹھ کل زیادہ
رکھا آتش پہ دوسرا بال
حاضر ہوئی دیونی قوی بال


دعوت کی اسے خبر سنائی
دیووں کے رخ اس نے آنکھ اٹھائی
ہم چشموں نے چتون اس کی تاڑی
پلکوں سے زمین بن کی جھاڑی


غولوں سے بھرا جو تھا بیاباں
پھولوں سے بنا دیا خیاباں
صناعی انھوں نے رات بھر کی
مشتاق نے واں وہ شب سحر کی


بجتے ہی گجر وہ شاہ ذی جاہ
چاروں شہ زادے لے کے ہمراہ
جو جو امرا تھے، سب بلا کے
فرخ کو خواصی میں بٹھا کے


مشرق سے رواں ہوا دلاور
جس طرح افق سے شاہ خاور
بجلی سے جو زرق برق آئے
فرش، ابر کی طرح بچھتے پائے


دیکھا تو تمام دشت گلزار
دائیں بائیں دورستہ بازار
شہ کہتے تھے: دشت پر خسک تھا
فرخ کہتا تھا: کل تلک تھا


غافل تھے کہ سبز باغ ہے یہ
اپنے ہی جگر کا داغ ہے یہ
تجویز رہے تھے سب کے سب دنگ
جادو، افسوں، طلسم، نیرنگ


کیا لشکر اور کیا شہنشاہ
سناٹے میں تھے کہ اللہ اللہ!
دیکھے جو جواہرات کے ڈھیر
سب من کی ہوس سے ہو گئے سیر


شہ زادے نے آمد ان کی پائی
کی تادر خانہ پیشوائی
دونوں میں ہوئیں جو چار آنکھیں
دولت کی کھلی ہزار آنکھیں


ایوان جواہریں میں آئے
الماس کی شبہ نشیں میں آئے
وہ چتر کے زیر سایہ بیٹھے
افسر سب پایہ پایہ بیٹھے


جو جو کہ تو اضعات ہیں عام
لے آئے خواص نازک اندام
چکنی ڈلی، عطر، الائچی، پان
نقل و مے و جام و خوان انوان


رغبت سے انہیں کھلا پلا کے
بولا شہ زادہ مسکرا کے
اس تاج شہی میں کے نگیں ہیں؟
کے نام و نشان دل نشیں ہیں؟


سلطاں نے کہا بہ صد لطافت
یہ چار ہیں عنصر خلافت
ایک اور ہوا تھا قابل خشم
وہ نور بصر، تھا دشمن چشم


جب لائے یہ گل بکاولی کا
نکلا تب خار روشنی کا
پوچھا اس نے: وہ اب کدھر ہے؟
سلطاں نے کہا کہ کیا خبر ہے!


ایک ان میں سے چشم آشنا تھا
کو کہ اسی شاہ زادے کا تھا
بولا کہ حضور ادھر تو دیکھیں
دیکھا، تو کہا: مری نظر میں


صورت وہی، رنگ رو وہی ہے
لہجہ وہی، گفتگو وہی ہے
یہ سنتے ہی، اس نے خندہ کر کے
سر، پاؤں پہ رکھ دیا پدر کے


سر، قدموں سے شاہ نے اٹھایا
فرزند کو چھاتی سے لگایا
لے لے کے بلائیں کاکلوں کی
پیشانی چومی، پیٹھ ٹھونکی


عرض اس نے کیا کہ دو پرستار
پا بوسی شہ کی ہیں طلب گار
حضرت نے کہا: بلائیے خیر
اٹھ جائیں، جو بیٹھے ہوں یہاں غیر


شہ زادے نے اک مکاں بتایا
ایک ایک اٹھا، ادھر کو آیا
سب اٹھ گئے، پر وہ چاروں باغی
بیٹھے رہے فرش گل پہ داغی


شہ زادہ اٹھا، محل میں آیا
پردے تلک ان کو ساتھ لایا
دلبر سے کہا: میں جب کہوں، آؤ
تو کہیو، یہ چاروں داغی اٹھواؤ


درپردہ سکھا کے، باہر آیا
بے پردہ حضور شہ بلایا
دلبر نے کہا: لجاؤں گی میں
قربان گئی، نہ آؤں گی میں


اٹھ جائیں یہ چاروں سست بنیاد
داغے ہوئے ہیں غلام، آزاد
چاروں کا، جو سنتے ہی، اڑا رنگ
یک بار گی شاہ ہوگیا دنگ


دکھلائی دیے جو بیٹے بے رخ
دیکھا تاج الملوک کے رخ
یاں دل پہ تھے داغ، واں سریں پر
یاں نام پہ حرف، واں نگیں پر


وہ جعل، وہ ہار، وہ غلامی
وہ گھات، وہ جیتنا تمامی
وہ دسترس اور وہ پائے مردی
وہ بے کسی اور وہ دشت گردی


وہ دیو کی بھوک اور وہ تقریر
وہ حلوے کی چاٹ اور وہ تحریر
وہ سعی، وہ دیونی کی صحبت
محمودہ کی وہ آدمیت


تجویز کے وہ سرنگ کی راہ
اور موش دوانیاں وہ دل خواہ
وہ سیر چمن، وہ پھول لینا
وہ عزم وطن، وہ داغ دینا


وہ کور کے حق میں خضر ہونا
وہ غولوں سے مل کے پھول کھونا
وہ بال کو آگ کا دکھانا
وعدے پہ وہ دیونی کا آنا


وہ نزہت گلشن نگاریں
وہ دعوت بادشا، وہ تمکیں
گزرا تھا جو کچھ، بیاں کیا سب
پنہاں تھا جو کچھ، عیاں کیا سب


انگشتری پری دکھا کر
کھلوئی سریں کی مہر محضر
پہلے تو بہت وہ منہ چڑھے ڈھیٹھ
آخر داغی دکھا گئے پیٹھ


اٹھوا کے انہیں، وہ دو خوشی آئیں
پا بوسی شہ کو سر سے آئیں
حضرت نے سمجھ کے حسن خدمت
دونوں کو دیے خطاب و خلعت


نذریں ان دونوں نے دکھائیں
رخصت ہو کر محل میں آئیں
مسند سے شہ اٹھ کے بے محابا
بولا بیٹے سے: جان بابا!


روشن کیا دیدہ ٔپدر کو
مادر کے بھی چل کے آنسو پوچھو
مشتاق کو روبہ راہ پایا
ہمراہ اسے تابہ خانہ لایا


ماں نے دیکھا جو وہ دلاور
اشکوں کے گہر کیے نچھاور
وہ طفل بھی گر پڑا قدم پر
مانند سر شک چشم مادر


ہر خویش ویگانہ سے ملا وہ
پھر اپنی جگہ پہ آگیا وہ
غائب ہو جانا فرخ یعنی بکاولی کا اور بلوانا تاج الملوک
کو گلشن نگاریں سے اور متفق ہو کر گلزار ارم میں رہنا


کھلنے پہ جو ہے طلسم تقدیر
اب خامے نے یو کیا ہے تحریر
فرخ، وہ بادشا کا دستور
یعنی وہ بکاولی مستور


مطلوب کا سن سمجھ کے سب حال
چاہی کہ نکالے کچھ پر وبال
سوچی کو دلا! شتاب کیا ہے
پھر سمجھیں گے، اضطراب کیا ہے


اس وضع کا پاس کر گئی وہ
تغیر لباس کر گئی وہ
فرخ کہنے تک آدمی تھی
پھر وہ ہی بکاولی پری تھی


غربت سے چلی، وطن میں آئی
صحرا سے اڑی، چمن میں آئی
پژ مردہ خواصوں پڑی جان
صدقے ہوئی کوئی، کوئی قربان


اس غنچے میں اک سمن پری تھی
وہ ہم نفس بکاولی تھی
بولی: کہو کیا کیا، کہا: خوب
بے کچھ کیے پھر بھی آئی، کیا خوب!


مانگا کاغذ، دوات، خامہ
لکھا گل چیں کے نام نامہ
اے یوسف چشم زخم یعقوب!
وے رشک برادران منکوب!


اے دل بر دلبرد غل باز!
وے دیو سوار عرش پرواز!
اے آب تہ زمین نیرنگ!
وے نقب دوان باغ گل رنگ!


اے پردہ کشاے بے حجابی!
وے دزد حناے دست یابی!
اے رہ رو رو بہ رہ نہادہ!
وے صر صر گل بہ باد دادہ!


اے بے سر و برگ گلشن آرا!
وے لعل نماے سنگ خارا!
اے بے خبر طلسم صورت!
وے بے بصر رخ ضرورت!


اے باعث عزم میہمانی!
وے صاحب بزم میزبانی!
اے آئنہ دار خود نمائی!
وے سرمہ چشم آشنائی!


اے پردہ کشاے روے پنہاں!
وے داغ نماے پشت اخواں!
تو باغ ارم سے لے گیا گل
تو مجھ سی پری کو دے گیا جل


بے رخ ترے واسطے ہوئی میں
فرخ ترے واسطے ہوئی میں
تجھ کو ترے باپ سے ملایا
مجھ کو یہ ملا کہ تجھ کو پایا


جو جو اسرار تھے نہانی
سب تجھ سے سنے تری زبانی
کیا لطف جو غیر پردہ کھولے
جادو ہو جو سر پہ چڑھ کے بولے


چاہا تھا، کروں سرے سے پامال
کر شکر، سمجھ کہ تھا خوش اقبال
کیا کہیے کہ صورت اور کچھ تھی
وقت اور، ضرورت اور کچھ تھی


اب تک ہیں وہ خارجی کے جی میں
جلد آ کہ ہے مصلحت اسی میں
آئے گا، تو در گذر کروں گی
ورنہ میں بہت ساشر کروں گی


داغوں پہ دیے ہیں داغ تو نے
دکھلائے ہیں سبز باغ تو نے
کانٹوں میں اگر نہ ہو الجھنا
تھوڑا لکھا بہت سمجھنا


پھر خط کی نہ ہو امیدواری
القط ہے قلم کی دوست واری
یہ لکھ کے، کہا سمن پری کو
چالاک ہے تو ہی قاصدی کو


یہ خط، یہ انگوٹھی لے، ابھی جا
پورب کی سمت کو چلی جا
رستے میں ہے گلشن نگاریں
رہتا ہے وہیں مرا وہ گل چیں


خاتم کے نشاں سے نامہ دیجو
ٹھہری رہیو، جواب لیجو
خط، خاتم لے کے وہ ہوائی
پتا ہوئی اور پتے پہ آئی


وہ باغ کہ تھا جواہر آگیں
ثابت ہوا گلشن نگاریں
وہ آدم حوروش، پری رو
یعنی تاج الملوک خوش خو


گل گشت میں تھا کسی روش پر
محمودہ دائیں، بائیں دلبر
قاصد نے جو رخ پری دکھایا
دھیان اس کو بکاولی کا آیا


پہچانتے ہی نگین خاتم
بے شبہ ہوا یقیں کا عالم
پر تو پہ وہ یوں چلا تڑپ کے
انگارے پہ جیسے کبک لپکے


دھوکا تھا فقط بکاولی کا
قاصد نے دیا وہ خط پری کا
گو سرمہ خموشی نے کھلایا
تحریر کو آنکھوں سے لگایا


قاصد سے کلام لطف بولا
خط صورت چشم شوق کھولا
وہ نامہ کہ عنبریں رقم تھا
قسمت کا نوشتہ یک قلم تھا


تحریر تھی سر گذشت ساری
کچھ یاس تھی، کچھ امیدواری
منگوا کے وہیں دوات و خامہ
تحریر کیا جواب نامہ


اے شاہ ارم کی دخت گل فام!
فرخ لقب و بکاولی نام
اس نام کے، اس لقب کے صدقے
اس نامے کے، اس طلب کے صدقے


میں نے جو غرض سے جی چرایا
تو نے کیوں آ کے منہ چھپایا؟
میری جو بدی ہوئی تھی کچھ یوں
تو نیک ہے، بے ملے گئی کیوں؟


تو جائے، تو کیوں نہ آئے افسوس
افسوس، افسوس، ہاے افسوس!
تقدیر پھری، پھری نہیں تو،
امید گئی، گئی نہیں تو


اے کاش! میں کچھ بھی سانس پاتا
جی کھول کے داغ دل دکھاتا
معلوم تو ہے کہ شوق کیا تھا
جو کھینچ کے یاں سے لے گیا تھا


اب مجھ میں وہ دم اجی کہاں ہے
وہ دل، وہ جگر، وہ جی کہاں ہے
مر جاؤں اگر طلب میں تیری
میں کیا، کہ خبر نہ پہنچے میری


قابل واں آنے کے کہاں ہوں
یاں بھی جو رہا، تو نیم جاں ہوں
تجھ سے میری خاطر اب کہاں جمع
تو نشتر شعلہ، میں رگ شمع


تو برق دماں، میں خرمن خار
تو سیل رواں، میں خستہ دیوار
تو جوشش یم، میں مور بے پر
میں نقش قدم، تو باد صرصر


دھڑکا ہے یہی، تو جان دوں گا
مرجاؤں گا، اب نہ میں جیوں گا
ہو تجھ سی پری جو خصم جانی
انساں کی ہے مرگ، زندگانی


منظور جو ہو حیات میری
تو مان لے ایک بات میری
حمالہ کو بھیج، آ کے لے جائے
شاید مجھے زندہ پا کے پہنچائے


بھیجا نہ اسے، تو جان لینا
آسان ہے یاں بھی جان دینا
یہ لکھ کے، جو خط سے ہاتھ اٹھایا
قاصد نے لیا جو اب، لایا


مطلوب کا خط وہ پڑھ رہی تھی
دیکھا تو وہ دیونی کھڑی تھی
پوچھا کہ اری! تجھے خبر ہے
گل چیں مرا کون سا بشر ہے؟


وہ صدقے ہوئی، کہا: بلا لوں
بے دیکھے کسی کا نام کیا لوں!
یہ سن کے، وہ شعلہ، ہو بھبوکا
بولی کہ تجھے لگاؤں لوکا


تیرا ہی تو ہے فساد مردار!
داماد کو گل دیا، مجھے خار
گل نقب کی راہ لے گیا چور
زندہ کروں اس موئے کو درگور


حمالہ! جلی ہوں، کیا کہوں میں
داماد کو لا، تو ٹھنڈی ہوں میں
آگاہی جو دیونی نے پائی
بگڑی ہوئی بات یوں بنائی


محمودہ ہے کنیز زادی
انساں سے ہوئی ہے اس کی شا

کروں پہلے توحید یزداں رقم
جھکا جس کے سجدے کو اول قلم
سر لوح پر رکھ بیاض جبیں
کہا: دوسرا کوئی تجھ سا نہیں


قلم پھر شہادت کی انگلی اٹھا
ہوا حرف زن یوں کہ: رب العلا!
نہیں کوئی تیرا، نہ ہوگا شریک
تری ذات ہے وحدہٗ لا شریک


پرستش کے قابل ہے تواے کریم!
کہ ہے ذات تیری غفور رحیم
رہ حمد میں تیری عزّ و جل!
تجھے سجدہ کرتا چلوں سر کے بل


وہ، الحق کہ ایسا ہی معبود ہے
قلم جو لکھے، اس سے افزود ہے
سبھوں کا وہی دین و ایمان ہے
یے دل ہیں تمام اور وہی جان ہے


تر و تازہ ہے اس سے گلزار خلق
وہ ابر کرم، ہے ہوا دار خلق
اگرچہ وہ بے فکر و غیّور ہے
ولے پرورش سب کی منظور ہے


کسی سے بر آوے نہ کچھ کام جاں
جو وہ مہرباں ہو، تو گل مہرباں
اگرچہ یہاں کیا ہے اور کیا نہیں
پر، اس بن تو کوئی کسی کا نہیں


موئے پر نہیں اس سے رفت و گزشت
اسی کی طرف سب کی ہے بازگشت
رہا کون اور کس کی بابت رہی
موئے اور جیتے وہی ہے وہی


نہاں سب میں، اور سب میں ہے آشکار
یہ سب اس کے عالم ہیں ہژدہ ہزار
ڈرے سب ہیں اس سے، وہی سب سے پیش
ہمیشہ سے ہے اور رہے گا ہمیش


چمن میں، ہے وحدت کے، یکتا وہ گل
کہ مشتاق ہیں اس کے سب جز و کُل
اسی سے ہے کعبہ، اسی سے کنشت
اسی کا ہے دوزخ، اسی کا بہشت


جسے چاہے جنت میں دیوے مقام
جسے چاہے دوزخ میں رکھے مدام
وہ ہے مالکُ الملک دنیا و دیں
ہے قبضے میں اس کے زمان و زمیں


سدا بے نمودوں کی اس سے نمود
دل بستگاں کی ہے اس سے کشود
اسی کی نظر سے ہے ہم سب کی دید
اسی کے سخن پر ہے سب کی شنید


وہی نور، ہے سب طرف جلوہ گر
اسی کے یہ ذرے ہیں شمس و قمر
نہیں اس سے خالی غرض کوئی شے
وہ کچھ شے نہیں، پر ہر اک شے میں ہے


نہ گوہر میں ہے وہ، نہ ہے سنگ میں
و لیکن چمکتا ہے ہر اک رنگ میں
وہ ظاہر میں ہر چند ظاہر نہیں
پہ، ظاہر کوئی، اس سے باہر نہیں


تامل سے کیجے اگر غور کچھ
تو سب کچھ وہی ہے، نہیں اور کچھ
اسی گل کی بو سے ہے خوش بو گلاب
پھرے ہے لیے ساتھ دریا، حباب


پر، اس جوش میں آ کے، بہنا نہیں
سمجھنے کی ہے بات، کہنا نہیں
قلم، گو زباں لاوے اپنی ہزار
لکھے کس طرح حمد پروردگار


کہ عاجز ہے یاں انبیا کی زباں
زبان قلم کو یہ قدرت کہاں!
اس عہدے سے کوئی بھی نکلا کہیں!
سوا عجز، درپیش یاں کچھ نہیں


وہ معبود یکتا، خدائے جہاں
کہ جس نے کیا ’’کن‘‘ میں کون و مکاں
دیا عقل و ادراک اس نے ہمیں
کیا خاک سے پاک اس نے ہمیں


پیمبر کو بھیجا ہمارے لیے
وصی اور امام اس نے پیدا کیے
جہاں کو انھوں نے دیا انتظام
برائی بھلائی سجھائی تمام


دکھائی انھوں نے ہمیں راہ راست
کہ تا، ہو نہ، اس راہ کی باز خواست
سو وہ کون سی راہ؟ شرع نبی
کہ رستے کو جنت کے سیدھی گئی


نعت حضرت رسالت پناہ کی
نبی کون، یعنی رسول کریم
نبوت کے دریا کا در یتیم
ہوا گو کہ ظاہر میں امی لقب


پہ، علم لدنی کھلا دل پہ سب
بغیر از لکھے، اور کیے بے رقم
چلے حکم پر اس کے لوح و قلم
ہوا علم دیں اس کا جو آشکار


گزشتہ ہوئے حکم، تقویم پار
اٹھا کفر اسلام ظاہر کیا
بتوں کو خدائی سے باہر کیا
کیا حق نے نبیوں کا سردار اسے


بنایا نبوت کا حق دار اسے
نبوت جو کی اس پہ حق نے تمام
لکھا: اشرفُ الناس، خیرُ الانام
بنایا سمجھ بوجھ کر خوب اسے


خدا نے کیا اپنا محبوب اسے
کروں اس کے رتبے کا کیا میں بیاں
کھڑے ہوں جہاں باندھ صف مرسلاں
مسیح اس کی خر گاہ کا پارہ دوز


تجلیٔ طور اس کی مشعل فروز
خلیل اس کے گلزار کا باغباں
سلیماں سے کئی مہر دار اس کے یاں
خضر اس کی سرکار کا آبدار


زرہ ساز داؤد سے دس ہزار
محمد کی مانند جگ میں نہیں
ہوا ہے نہ ایسا، نہ ہو گا کہیں
یہ تھی رمز، جو اس کے سایہ نہ تھا


کہ رنگ دوئی واں تک آیا نہ تھا
نہ ہونے کا سایے کا تھا یہ سبب
ہوا صَرف پوشش میں کعبے کی سب
وہ قد اس لیے تھا نہ سایہ فگن


کہ تھا گل وہ اک معجزے کا بدن
بنا سایہ اس کا لطیف اس قدر
نہ آیا لطافت کے باعث نظر
عجب کیا جو اس گل کا سایہ نہ ہو


کہ تھا وہ، گل قدرت حق کی بو
خوش آیا نہ، سایے کو، ہونا جدا
اسی نور حق کے رہا زیر پا
نہ ڈالی کسی شخص پر اپنی چھانو


کسی کا نہ منہ دیکھا، دیکھ اس کے پانو
وہ ہوتا زمیں گیر کیا فرش پر
قدم اس کے سایے کا تھا عرش پر
نہ ہونے کی سایے کے اک وجہ اور


مجھے خوب سوجھی، پہ ہے شرط غور
جہاں تک کہ تھے یاں کے اہل نظر
سمجھ مایۂ نور، کحلُ البصر
سبھوں نے لیا پتلیوں پر اٹھا


زمیں پر نہ سایے کو گرنے دیا
سیاہی کا پتلی کی ہے یہ سبب
وہی سایہ پھرتا ہے آنکھوں میں اب
وگرنہ یہ تھی چشم اپنی کہاں


اسی سے یہ روشن ہے سارا جہاں
نظر سے جو غائب وہ سایا رہا
ملائک کے دل میں سمایا رہا
نہیں ہمسر اس کا کوئی، جو علی


کہ بھائی کا بھائی، وصی کا وصی
ہوئی جو نبوت نبی پر تمام
ہوئی نعمت اس کے وصی پر تمام
جہاں فیض سے ان کے ہے کام یاب


نبی آفتاب و علی ماہتاب
منقبت حضرت امیرالمومنین کی
علی دین و دنیا کا سردار ہے
کہ مختار کے گھر کا مختار ہے


دیار امامت کے گلشن کا گل
بہار ولایت کا باغ سبل
علی راز دار خدا و نبی
خبردار سر خفی و جلی


علی بندۂ خاص درگاہ حق
علی سالک و رہبر راہ حق
علیّ ولی، ابن عمّ رسول
لقب شاہ مردان و زوج بتول


کہے یوں جو چاہے کوئی بیر سے
پہ نسبت علی کو نہیں غیر سے
خدا نفس پیغبرش خداندہ است
دگر افضلیت بہ کس ماندہ است؟


یہاں بات کی بھی سمائی نہیں
نبی و علی میں جدائی نہیں
نبی و علی، ہر دو نسبت بہم
دُو تا و یکے، چوں زبان قلم


علی کا عدوٗ: دوزخی، دوزخی
علی کا محب: جنتی، جنتی
نبی اور علی، فاطمہ اور حسن
حسین ابن حیدر، یہ ہیں پنج تن


ہوئی ان پہ دو جگ کی خوبی تمام
انہوں پر درود اور انہوں پر سلام
علی سے لگا تا بہ مہدیٔ دیں
یہ ہیں ایک نور خدائے بریں


اُنہوں سے ہے قائم امامت کا گھر
کہ بارہ ستوں ہیں یہ اثنا عشر
صغیرہ، کبیرہ سے یہ پاک ہیں
حساب عمل سے یہ بے باک ہیں


ہوا یاں سے ظاہر کمال رسول
کہ بہتر ہوئی سب سے آل رسول
سلام ان پہ جو ان کے اصحاب ہیں
وہ اصحاب کیسے، کہ احباب ہیں


خدا نے انہوں کو کہا مومنیں
وہ ہیں زینت آسمان و زمیں
خدا ان سے راضی، رسول ان سے خوش
علی ان سے راضی، بتول ان سے خوش


ہوئی فرض ان کی ہمیں دوستی
کہ ہیں دل سے وہ جاں نثار نبی
مناجات
الٰہی! بہ حق رسول امیں


بہ حق علی و بہ اصحاب دیں
بہ حق بتول و بہ آل رسول
کروں عرض جو میں، سو ہوئے قبول
الٰہی! میں بندہ گنہگار ہوں


گناہوں میں اپنے گراں بار ہوں
مجھے بخشیو میرے پروردگار!
کہ ہے تو کریم اور آمرزگار
مری عرض یہ ہے کہ جب تک جیوں


شراب محبت کو تیری پیوں
سوا تیری الفت کے، اور سب ہے ہیچ
یہی ہو، نہ ہو اور کچھ ایچ پیچ
جو غم ہو، تو ہو آل احمد کا غم


سوا اس الم کے نہ ہو کچھ الم
رہے سب طرف سے مرے دل کو چین
بہ حق حسن اور بہ حق حسین
کسی سے نہ کرنی پڑے التجا


تو کر خود بہ خود میری حاجت روا
صحیح اور سالم سدا مجھ کو رکھ
خوشی سے ہمیشہ خدا! مجھ کو رکھ
مری آل اولاد کو شاد رکھ


مرے دوستوں کو تو آباد رکھ
میں کھاتا ہوں جس کا نمک اے کریم!
سدا رحم کر اس پہ تو اے رحیم!
جیوں آبرو اور حرمت کے ساتھ


رہوں میں عزیزوں میں عزت کے ساتھ
بر آویں مرے دین و دنیا کے کام
بہ حق محمد علیہ السلام
تعیریف سخن کی


پلا مجھ کو ساقی! شراب سخن
کہ مفتوح ہو جس سے باب سخن
سخن کی مجھے فکر دن رات ہے
سخن ہی تو ہے، اور کیا بات ہے


سخن کے طلب گار ہیں عقل مند
سخن سے ہے نام نکو یاں بلند
سخن کی کریں قدر مردان کار
سخن، نام ان کا رکھے برقرار


سخن سے وہی شخص رکھتے ہیں کام
جنہیں چاہیے ساتھ نیکی کے نام
سخن سے سلف کی بھلائی رہی
زبان قلم سے بڑائی رہی


کہاں رستم و گیو و افراسیاب
سخن سے رہی یاد یہ نقل خواب
سخن کا صلہ یار دیتے رہے
جواہر سدا مول لیتے رہے


سخن کا سدا گرم بازار ہے
سخن سنج اس کا خریدار ہے
رہے جب تلک داستان سخن
الٰہی! رہے قدردان سخن


مدح شاہ عالم بادشاہ کی
خدیو فلک شاہ عالی گہر
زمیں بوس ہوں جس کے شمس و قمر
جہاں اس کے پرتو سے ہے کام یاب


وہ ہے برج اقلیم میں آفتاب
اسی مہر سے ہے منور یہ ماہ
جہاں ہووے اور ہو جہاں دار شاہ
وہ مہر منور، یہ ماہ منیر


اور اس کا یہ نجم سعادت وزیر
مدح وزیر آصف الدولہ کی
فلک رتبہ نوّاب عالی جناب
کہ ہے آصف الدولہ جس کا خطاب


وزیر جہاں، حاکم عدل و داد
ہے آبادیٔ ملک جس کی مراد
جہاں، عدل سے اس کے آباد ہے
غریبوں، فقیروں کا دل شاد ہے


پھرے بھاگتا مور سے فیل مست
زبردست ظالم، پہ ہے زیردست
کتاں پر کرے مہ اگر بد نظر
تو آدھا ادھر ہووے آدھا ادھر


کسی کا اگر مفت لے زلف دل
تو کھایا کرے پیچ وہ متصل
وہ انصاف سے جو گزرتا نہیں
کسی پر کوئی شخص مرتا نہیں


تو ہو باگ، بکری میں کچھ گفتگو
اگر اس کا چیتا نہ ہووے کبھو
گر آواز سن صید کی، کچھ کہے
تو باز آئے چپّک کہ بہری رہے


پھرے شمع کے گرد گر آ کے چور
صبا کھینچ لے جاوے اس کو بہ زور
نہ لے جب تلک شمع پروانگی
پتنگے کے پر کو نہ چھیڑے کبھی


اگر آپ سے اس پہ وہ آ گرے
تو فانوس میں شمع چھپتی پھرے
گر احیاناً اس کے جلیں بال و پر
تو گل گیر، لے شمع کا کاٹ سر


اسے عدل کی جو طرح یاد ہے
کسے یاد ہے؟ یہ خدا داد ہے
ستم اس کے ہاتھو سے رویا کرے
سدا فتنۂ دہر سویا کرے


گھروں میں فراغت سے سوتے ہیں سب
پڑے گھر میں چور اپنے روتے ہیں سب
وہ ہے باعث امن خرد و کلاں
کہ ہے نام سے اس کے مشق اماں


بیان سخاوت کروں گر رقم
تو در ریز کاغذ پہ ہووے قلم
نظر سے توجہ کی دیکھا جدھر
دیا مثل نرگس اسے سیم و زر


سخاوت یہ ادنیٰ سی ایک اس کی ہے
کہ اک دں دو شالے دیے سات سے
سوا اس کے، ہے اور یہ داستاں
کہ ہو جس پہ قربان حاتم کی جاں


ہوئی کم جو اک بار کچھ برشگال
گرانی سی ہونے لگی ایک سال
غریبوں کا دم سا نکلنے لگا
توکل کا بھی پانو چلنے لگا


وزیرالممالک نے تدبیر کر
خدا کی دیا راہ پر مال و زر
محلے محلے کیا حکم یہ
کہ باڑے کی اس غم کے کھولیں گرہ


یہ چاہا کہ خلقت کسی ڈھب جیے
ٹکے لاکھ لاکھ ایک دن میں دیے
یہ لغزش پڑی ملک میں جو تمام
لیا ہاتھ نے اس کے گرتوں کو تھام


یہ بندہ نوازی، یہ جاں پروری
یہ آئین سرداری و سروری
ہوئے ذات پر اس سخی کی تمام
تکلف ہے آگے سخاوت کا نام


فقیروں کی بھی یاں تلک تو بنی
کہ اک اک یہاں ہو گیا ہے غنی
یہ کیا دخل آواز دے جو گدا
چٹکنے کی گل کے نہ ہووے صدا


قدح لے کے نرگس جو ہووے کھڑی
تو خجلت سے جاوے زمیں میں گڑی
نہ ہو اس کا شامل جو ابر کرم
اثر ابر نیساں سے ہووے عدم


ہر اک کام اس کا: جہاں کی مراد
فلاطوں طبیعت، ارسطو نژاد
جب ایسا وہ پیدا ہوا ہے بشر
تب اس کو دیا ہے یہ کچھ مال و زر


لکھوں گر شجاعت کا اس کی بیاں
قلم ہو مرا رستم داستاں
غضب سے وہ ہاتھ اپنا جس پر اٹھائے
اجل کا طمانچہ قسم اس کی کھائے


کرے جس جگہ زور اس کا نمود
دل آہن کا اس جا پہ ہووے گبود
چلے تیغ گر اس کی زور مصاف
نظر آوے دشمن کا میدان صاف


اگر بے حیائی سے کوئی عدو
ملا دیوے اس تیغ سے منہ کبھو
تو ایسے ہی کھا کر گرے سر کے بل
کہ سر پر کھڑی اس کے رووے اجل


نہ ہو کیونکے وہ تیغ برق غضب
کہ برش کی تشدید، جوہر ہیں سب
لگاوے اگر کوہ پر ایک بار
گزر جائے یوں، جیسے صابن میں تار


ہوئی ہم قسم اس سے تیغ اجل
نکل آئے یہ، گر پڑے وہ اگل
غضب سے، غضب، اس کے کانپا کرے
تہور بھی ہیبت سے اس کی ڈرے


اور اس زور پر ہے یہ علم و حیا
کہ ہے خلق کا جیسے دریا بہا
جہاں تک کہ ہیں علم و نسب و کمال
ہر اک فن میں ماہر ہے وہ خوش خصال


سخن داں، سخن سنج، شیریں زباں
وزیر جہان و وحید زماں
سخن کی نہیں اس سے پوشیدہ بات
غوامض ہیں سب سہل اس کے نکات


سلیقہ ہر اک فن میں، ہر بات میں
نکلتی نئی بات دن رات میں
سدا سیر پر اور تماشے پہ دل
کشادہ دلی اور خوشی متصل


نہ ہو اس کو کیوں کر ہواے شکار
تہور شعاروں کا ہے یہ شعار
دلیروں کے تئیں، ہے دلیروں سے کام
کہ رہتا ہے شیروں کو شیروں سے کام


شہاں را ضروراست مشق شکار
کہ آید پئے صید دل ہا بہ کار
کھلے، بند جتنے ہیں صحرا میں صید
ہیں نواب کے دام الفت میں قید


زمہرش دل آہواں سوختہ
بہ فتراک او چشمہا دوختہ
شجاعت کا، ہمت کا یہ، کام ہے
درم ہاتھ میں ہے کہ یا دام ہے


نہ ہوتا اگر اس کو عزم شکار
درندوں سے بچتا نہ شہر و دیار
نہ بچتے جہاں بیچ خرد و بزرگ
یہ ہو جاتے سب لقمۂ شیر و گرگ


یہ انسان پر اس کا احسان ہے
کہ بے خوف انسان کی جان ہے
بنائی جہاں اس نے نخچیر گاہ
رہے صید واں آکے شام و پگاہ


رکھا صید بحری پہ جس دم خیال
لیا پشت پر اپنی ماہی نے جال
مگر اپنا دیتے ہیں جی جان کر
کہ ٹاپو پہ گرتے ہیں آن آن کر


نہ سمجھو نکلتے ہیں دریا میں سوس
خوشی سے اچھلتے ہیں دریا میں سوس
چرندوں کا دل اس طرف ہے لگا
پرندوں کو رہتی ہے اس کی ہوا


پلنگوں کا ہے بلکہ چیتا یہی
کمر آ بندھاوے ہماری وہی
کھڑے اَرنے ہوتے ہیں سر جوڑ جوڑ
کہ جی کون دیتا ہے بد بد کے ہوڑ


خبر اس کی سن کر نہ گینڈا چلے
کہ ہاتھی بھی ہو مست، اینڈا چلے
جو کچھ دل میں گینڈے کے آوے خیال
تو بھاگے اس آگے سپر اپنی ڈال


اطاعت کے حلقے سے بھاگے جو فیل
پلک، اس کی آنکھوں میں، ہو تفتہ میل
سو وہ تو اطاعت میں یک دست ہیں
نشے میں محبت کے سب مست ہیں


اسی کے لیے گو کہ ہیں وے پہاڑ
قدم اپنے رکھتے ہیں سب گاڑ گاڑ
کہ شاید مشرف سواری سے ہوں
سر افراز چل کر عماری سے ہوں


چلن جب یہ کچھ ہوویں حیوان کے
تو پھر حق بہ جانب ہے انسان کے
کسے ہو نہ صحبت کی اس کی ہوس
ولے کیا کرے، جو نہ ہو دسترس


فلک بار گاہا، ملک در گہا!
جدا میں جو قدموں سے تیرے رہا
نہ کچھ عقل نے اور نہ تدبیر نے
رکھا مجھ کو محروم تقدیر نے


پراب عقل نے میرے کھولے ہیں گوش
دیا ہے مدد سے تری مجھ کو ہوش
سو میں، اک کہانی بنا کر نئی
در فکر سے گوندھ لڑیاں کئی


لے آیا ہوں خدمت میں بہر نیاز
یہ امید ہے پھر، کہ ہوں سرفراز
مرے عذر تقصیر ہوویں قبول
بہ حق علی و بہ آل رسول


رہے جاہ و حشمت یہ تیری مدام
بہ حق محمد، علیہ السلام
رہیں شاد و آباد کل خیر خواہ
پھریں اس گھرانے کے دشمن تباہ


اب آگے کہانی کی ہے داستاں
ذرا سنیو دل دے کے اس کا بیاں
آغاز داستاں
کسی شہر میں تھا کوئی بادشاہ


کہ تھا وہ شہنشاہ گیتی پناہ
ملک خو، ملک شاہ رکھتا تھا نام
فلک پر مہ و مہر اس کے غلام
بہت حشمت و جاہ و مال و منال


بہت فوج سے اپنی فرخندہ حال
کئی بادشاہ اس کو دیتے تھے باج
خطا اور ختن سے وہ لیتا خراج
کوئی دیکھتا آ کے جب اس کی فوج


تو کہتا کہ: ہے بحر ہستی کی موج
طویلے کے اس کے جو ادنی تھے خر
انھیں نعل بندی میں ملتا تھا زر
جہاں تک کہ سرکش تھے اطراف کے


وہ اس شہ کے رہتے تھے قدموں لگے
رعیت تھی آسودہ و بے خطر
نہ غم مفلسی کا، نہ چوری کا ڈر
عجب شہر تھا اس کا مینو سواد


کہ قدرت خدائی کی آتی تھی یاد
لگے تھے ہر اک جا پہ وہاں سنگ و خشت
ہر اک کوچہ اس کا، تھا رشک بہشت
زمیں سبز و سیراب عالم تمام


نظر کو طراوت وہاں صبح و شام
کہیں چاہ و منبع، کہیں حوض و نہر
ہر اک جا پہ آب لطافت کی لہر
عمارت تھی گچ کی وہاں پیش تر


کہ گزرے صفائی سے جس پر نظر
کروں اس کی وسعت کا کیا میں بیاں
کہ جوں اصفہاں، تھا وہ نصف جہاں
ہنر مند واں اہل حرفہ تمام


ہر اک نوع کی خلق کا ازدحام
یہ دل چسپ بازار تھا چوک کا
کہ ٹھہرے جہاں، بس وہیں دل لگا
جہاں تک یہ رستے تھے بازار کے


کہے تو کہ تختے تھے گلزار کے
صفا پر جو اس کی نظر کر گئے
اسے دیکھ کر سنگ مرمر گئے
کہوں قلعے کی اس کے کیا میں شکوہ


گئے دب، بلندی کو دیکھ اس کی، کوہ
وہ دولت سرا خانۂ نور تھا
سدا عیش و عشرت سے معمور تھا
ہمیشہ خوشی، رات دن سیر باغ


نہ دیکھا کسی دل پہ، جز لالہ، داغ
سدا عیش و عشرت، سدا راگ و رنگ
نہ تھا زیست سے کوئی اپنی بہ تنگ
غنی وہاں وا، جو کہ آیا تباہ


عجب شہر تھا وہ عجب بادشاہ
نہ دیکھا کسی نے کوئی واں فقیر
ہوئے اس کی دولت سے گھر گھر امیر
کہاں تک کہوں اس کا جاہ و حشم


محل و مکاں اس کا رشک ارم
ہزاروں پری پیکر اس کے غلام
کمر بستہ خدمت میں حاضر مدام
سدا ماہ رویوں سے صحبت اسے


سدا جامہ زیبوں سے رغبت اسے
کسی طرف سے وہ نہ رکھتا تھا غم
مگر ایک اولاد کا تھا الم
اسی بات کا اس کے تھا دل پہ داغ


نہ رکھتا تھا وہ اپنے گھر کا چراغ
دنوں کا عجب اس کے یہ پھیر تھا
کہ اس روشنی پہ یہ اندھیر تھا
وزیروں کو اک روز اس نے بلا


جو کچھ دل کا احوال تھا، سو کہا
کہ میں کیا کروں گا یہ مال و منال
فقیری کا ہے میرے دل کو خیال
فقیر اب نہ ہوں، تو کروں کیا علاج


نہ پیدا ہوا وارث تخت و تاج
جوانی مری ہو گئی سب بسر
نمودار پیری ہوئی سر بہ سر
دریغا کہ عہد جوانی گذشت


جوانی مگو، زندگانی گذشت
بہت ملک پر جان کھویا کیا
بہت فکر دنیا میں رویا کیا
زہے بے تمیزی و بے حاصلی


کہ از فکر دنیا، ز دیں غافلی
وزیروں نے کی عرض کہ اے آفتاب!
نہ ہو تجھ کو ذرہ کبھی اضطراب
فقیری جو کیجے تو دنیا کے ساتھ


نہیں خوب، جانا ادھر خالی ہاتھ
کرو سلطنت، لے کے اعمال نیک
کہ تا دو جہاں میں رہے حال نیک
جو عاقل ہوں، وے سوچ میں ٹک رہیں


کہ ایسا نہ ہووے کہ پھر سب کہیں
تو کار زمیں را نکو ساختی
کہ بر آسماں نیز پرداختی
یہ دنیا جو ہے مزرع آخرت


فقیری میں ضائع کرو اس کو مت
عبادت سے اس کشت کو آب دو
وہاں جا کے خرمن ہی تیار لو
رکھو یاد عدل و سخاوت کی بات


کہ اس فیض سے ہے تمہاری نجات
مگر ہاں، یہ اولاد کا ہے جو غم
سو اس کا تردد بھی کرتے ہیں ہم
عجب کیا کہ ہووے تمہارے خلف


کرو تم نہ اوقات اپنی تلف
نہ لاؤ کبھی یاس کی گفتگو
کہ قرآں میں آیا ہے: لا تقنطو
بلاتے ہیں ہم اہل تنجیم کو


نصیبوں کو اپنے ذرا دیکھ لو
تسلی تو دی شاہ کو اس نمط
ولے اہل تنجیم کو بھیجے خط
نجومی و رَمّال اور برہمن


غرض یاد تھا جن کو اس ڈھب کا فن
بلا کر انہیں شہ کنے لے گئے
جوں ہی رو بہ رو شہ کے سب وے گئے
پڑا جب نظر وہ شہ تاج و تخت


دعا دی کہ ہوں شہ کے بیدار بخت
کیا قاعدے سے نہڑ کر سلام
کہا شہ نے: میں تم سے رکھتا ہوں کام
نکالو ذرا اپنی اپنی کتاب


مرا ہے سوال، اس کا لکھو جواب
نصیبوں میں دیکھو تو میرے کہیں
کسی سے بھی اولاد ہے یا نہیں
یہ سن کر، وے رمال طالع شناس


لگے کھینچنے زائچے بے قیاس
دھرے تختے آگے، لیا قرعہ ہاتھ
لگا دھیان اولاد کا اس کے ساتھ
جو پھینکیں، تو شکلیں کئی بیٹھیں مل


کئی شکل سے دل گیا ان کا کھل
جماعت نے رمال کی عرض کی
کہ ہے گھر میں امید کے کچھ خوشی
یہ سن ہم سے اے عالموں کے شفیق


بہت ہم نے تکرار کی ہر طریق
بیاض اپنی دیکھی جو اس رَمل کی
تو ایک ایک نکتہ، ہے فرد خوشی
ہے اس بات پر اجتماع تمام


کہ طالع میں فرزند ہے تیرے نام
زن و زوج کے گھر میں ہے گی فرح
پیا کر مے وصل کا تو قدح
نجومی بھی کہنے لگے در جواب


کہ ہم نے بھی دیکھی ہے اپنی کتاب
نحوست کے دن سب گئے ہیں نکل
عمل اپنا سب کر چکا ہے زحل
ستارے نے طالع کے، بدلے ہیں طور


خوشی کا کوئی دن میں آتا ہے دور
نظر کی جو تسدیس و تثلیث پر
تو دیکھا کہ ہے نیک سب کی نظر
کیا پنڈتوں نے جو اپنا بچار


تو کچھ انگلیوں پر کیا پھر شمار
جنم پترا شاہ کا دیکھ کر
تُلا اور بِرچھک پہ کر کر نظر
کہا: رام جی کی ہے تم پر دیا


چندرما سا بالک ترے ہووے گا
نکلتے ہیں اب تو خوشی کے بچن
نہ ہو گر خوشی، تو نہ ہوں برہمن
مہاراج کے ہوں گے مقصد شتاب


کہ آیا ہے اب پانچواں آفتاب
نصیبوں نے کی آپ کے یاوری
کہ آئی ہے اب ساتویں مشتری
مقرر ترے، چاہیے، ہو پسر


کہ دیتی ہے یوں اپنی پوتھی خبر
وہ لیکن مقدر ہے کچھ اور بھی
کہ ہیں اس بھلے میں، برے طور بھی
یہ لڑکا تو ہو گا، ولے کیا کہیں


خطر ہے اسے بارھویں برس میں
نہ آوے یہ خورشید بالائے بام
بلندی سے خطرہ ہے اس کو تمام
نہ نکلے یہ بارہ برس رشک مہ


رہے برج میں یہ مہ چاردہ
کہا شہ نے یہ سن کے، ان کے تئیں
کہو، جی کا خطرہ تو اس کو نہیں؟
کہا: جان کی سب طرح خیر ہے


مگر دشت غربت کی کچھ سیر ہے
کوئی اس پہ عاشق ہو جن و پری
کوئی اس کی معشوق ہو استری
کچھ ایسا نکلتا ہے پوتھی میں اب


خرابی ہو اس پر کسی کے سبب
ہوئی کچھ خوشی شہ کو اور کچھ الم
کہ دنیا میں توام ہیں شادی و غم
کہا شہ نے: اس پر نہیں اعتبار


جو چاہے کرے میرا پروردگار
یہ فرما، محل میں در آمد ہوئے
منجم وہاں سے بر آمد ہوئے
خدا پر زبس اس کا تھا اعتقاد


لگا مانگنے اپنی حق سے مراد
خدا سے لگا کرنے وہ التجا
لگا آپ مسجد میں رکھنے دیا
نکالا مرادوں کا آخر سراغ


لگائی ادھر لَو، تو پایا چراغ
سحاب کرم نے کیا جو اثر
ہوئی کشت امید کی بارور
اسی سال میں، یہ تماشا سنو


رہا حمل اک زوجۂ شاہ کو
جو کچھ دل پہ گزرے تھے رنج و تعب
مبدّل ہوئے وے خوشی ساتھ سب
خوشی سے پلا مجھ کو ساقی! شراب


کوئی دم میں بجتا ہے چنگ و رباب
کروں نغمۂ تنہنیت کو شروع
کہ اک نیک اختر کرے ہے طلوع
داستان تولد ہونے کی شاہ زادہ بے نظیر کے


گئے نو مہینے جب اس پر گزر
ہوا گھر میں شہ کے تولد پسر
عجب صاحب حسن پیدا ہوا
جسے مہرومہ دیکھ شیدا ہوا


نظر کو نہ ہو حسن پر اُس کے تاب
اسے دیکھ، بے تاب ہو آفتاب
ہوا وہ جو اُس شکل سے دل پذیر
رکھا نام اس کا شہ بے نظیر


خواصوں نے، خواجہ سراؤں نے جا
کئی نذریں گزرانیاں اور کہا
مبارک تجھے اے شہ نیک بخت!
کہ پیدا ہوا وارث تاج و تخت


سکندر نژاد اور دارا حشم
فلک مرتبت اور عطارد رقم
رہے اس کے اقلیم زیر نگیں
غلامی کریں اس کی خاقان چیں


یہ سنتے ہی مژدہ، بچھا جا نماز
کیے لاکھ سجدے، کہ اے بے نیاز!
تجھے فضل کرتے نہیں لگتی بار
نہ ہو تجھ سے مایوس، امید دار


دوگانہ غرض شکر کا کر ادا
تہیہ کیا شاہ نے جشن کا
وے نذریں خواصوں کی، خوجوں کی لے
انہیں خلعت و زر کا انعام دے


کہا: جاؤ، جو کچھ کہ درکار ہو
کہو خانساماں سے تیار ہو
نقیبوں کو بلوا کے یہ کہ دیا
کہ نقار خانے میں دو حکم جا


کہ نوبت خوشی کی بجاویں تمام
خبر سن کے یہ شاد ہوں خاص و عام
یہ مژدہ جو پہنچا، تو نقارچی
لگا ہر جگہ بادلا اور زری


بنا ٹھاٹھ نقار خانے کا سب
مہیا کر اسباب عیش و طرب
غلاف اس پہ بانات پر زر کے ٹانک
شتابی سے نقاروں کو سینک سانک


دیا چوب کو پہلے بم سے ملا
لگی پھیلنے ہر طرف کو صدا
کہا زیر سے بم نے بہر شگوں
کہ دوں دوں خوشی کی خبر کیوں نہ دوں


بجے شادیانے جو واں اس گھڑی
ہوئی گرد و پیش آ کے خلقت کھڑی
بہم مل کے بیٹھے جو شہنا نواز
بنا منہ سے پھرکی، لگا اس پہ ساز


سروں پر وے سر پیچ معمول کے
خوشی سے، ہوئے گال گل، پھول کے
لگے لینے اپجیں خوشی سے نئی
اڑانا لگا بجنے اور سگھڑئی


ٹکوروں میں نوبت کے شہنا کی دھن
سگھڑ سننے والوں کو کرتی تھی سن
ترھی اور قرنائے شادی کے دم
لگے بھرنے زیل اور کھرج میں بہم


سنی جھانجھ نے جو خوشی کی نوا
تھرکنے لگا، تالیوں کو بجا
نئے سر سے عالم کو عشرت ہوئی
کہ لڑکے کے ہونے کی نوبت ہوئی


محل سے لگا تابہ دیوان عام
عجب طرح کا اک ہوا ازدحام
چلے لے کے نذریں وزیر و امیر
لگے کھینچنے زر کے تودے فقیر


دیے شاہ نے شاہزادے کے نانو
مشائخ کو اور پیر زادوں کو گانو
امیروں کو جاگیر، لشکر کو زر
وزیروں کو الماس و لعل و گہر


خواصوں کو، خوجوں کو جوڑے دیے
پیادے جو تھے، ان کو گھوڑے دیے
خوشی سے کیا یاں تلک زر نثار
جسے ایک دینا تھا، بخشے ہزار


کیا بھانڈ اور بھکتیوں نے ہجوم
ہوئی ’’آہے آہے مبارک‘‘ کی دھوم
لگا کنچنی، چونا پزنی تمام
کہاں تک میں لوں نرت کاروں کا نام


جہاں تک کہ سازندے تھے ساز کے
دھنی دست کے اور آواز کے
جہاں تک کہ تھے گایک اور تنت کار
لگے گانے اور ناچنے ایک بار


لگے بجنے قانون و بین و رباب
بہا ہر طرف جوئے عشرت کا آب
لگی تھاپ طبلوں پہ مردنگ کی
صدا اونچی ہونے لی چنگ کی


کمانچوں کو، سارنگیوں کو بنا
خوشی سے ہر اک ان کی تربیں ملا
لگا تار پر موم مرچنگ کے
ملا سر طنبوروں کے یک رنگ کے


ستاروں کے پردے بنا کر درست
بجانے لگے سب وے چالاک و چست
گئی بائیں کی آسماں پر گمک
اٹھا گنبد چرخ سارا دھمک


خوشی کی زبس ہر طرف تھی بساط
لگے ناچنے اس پہ اہل نشاط
کناری کے جوڑے چمکتے ہوئے
دو پانوں میں گھنگرو جھنکتے ہوئے


وہ گھٹنا، وہ بڑھنا اداؤں کے ساتھ
دکھانا وہ رکھ رکھ کے چھاتی پہ ہاتھ
دو بالے چمکتے ہوئے کان میں
پھڑکنا وہ نتھنے کا ہر آن میں


کبھی دل کو پاؤں سے مل ڈالنا
نظر سے کبھی دیکھنا بھالنا
دکھانا کبھی اپنی چھب مسکرا
کبھی اپنی انگیا کو لینا چھپا


کسی کے وہ مکھڑے پہ نتھ کی پھبن
کسی کے چمکتے ہوئے نورتن
وہ دانتوں کی مسی، وہ گل برگ تر
شفق میں عیاں جیسے شام و سحر


وہ گرمی کے چہرے، کہ جوں آفتاب
جسے دیکھ کر دل کو ہو اضطراب
چمکنا گلوں کا صفا کے سبب
وہ گردن کے ڈورے قیامت، غضب


کبھی منہ کے تئیں پھیر لینا ادھر
کبھی چوری چوری سے کرنا نظر
دوپٹے کو کرنا کبھی منہ کی اوٹ
کہ پردے میں ہو جائیں دل لوٹ پوٹ


ہر اک تان میں ان کو ارمان یہ
کہ دل لیجئے تان کی جان یہ
کوئی فن میں سنگیت کے شعلہ رو
برم، جوگ، لچھمی کی لے، پر ملو


کوئی ڈیڑھ گت ہی میں پانوں تلے
کھڑی عاشقوں کے دلوں کو ملے
کوئی دائرے میں بجا کر پرن
کوئی ڈھمڈھمی میں دکھا اپنا فن


غرض ہر طرح دل کو لینا انہیں
نئی طرح سے داغ دینا انہیں
کبھی مار ٹھوکر، کریں قتل عام
کبھی ہاتھ اٹھا، لیویں گرتے کو تھام


کہیں دھرپت اور گیت کا شور و غل
کہیں قول و قلبانہ و نقش و گل
کہیں بھانڈ کے ولولوں کا سماں
کہیں ناچ کشمیریوں کا وہاں


منجیرا، پکھاوج، گلے ڈال ڈھول
بجاتے تھے اس جا کھڑے، باندھ غول
محل میں جو دیکھو تو اک ازدحام
مبارک سلامت کی تھی دھوم دھام


وہاں بھی تو تھی عیش و عشرت کی دھوم
پری پیکروں کا ہر اک جا ہجوم
چھٹی تک غرض تھی خوشی ہی کی بات
کہ دن عید اور رات تھی شب برات


بڑھے ابر ہی ابر میں جوں ہلال
محل میں لگا پلنے وہ نو نہال
برس گانٹھ جس سال اس کی ہوئی
دل بستگاں کی گرہ کھل گئی


وہ گل جب کہ چوتھے برس میں لگا
بڑھایا گیا دودھ اس ماہ کا
ہوئی تھی جو کچھ پہلے شادی کی دھوم
اسی طرح سے پھر ہوا وہ ہجوم


طوائف وہی اور وہی راگ و رنگ
ہوئی بلکہ دونی خوشی کی ترنگ
وہ گل پانو سے اپنے جس جا چلا
وہاں آنکھ کو نرگسوں نے ملا


لگا پھرنے وہ سرو جب پانو پانو
کیے بَردے آزاد تب اس کے نانو
داستان تیاری میں باغ کی
مے ارغوانی پلا ساقیا!


کہ تعمیر کو باغ کی دل چلا
دیا شہ نے ترتیب اک خانہ باغ
ہوا رشک سے جس کے، لالے کو داغ
عمارت کی خوبی، دروں کی وہ شان


لگے جس میں زر بفت کے سا یبان
چقیں اور پردے بندھے زر نگار
دروں پر کھڑی دست بستہ بہار
کوئی دور سے در پر اٹکا ہوا


کوئی زہ پہ خوبی سے لٹکا ہوا
وہ مقیش کی ڈوریاں سر بہ سر
کہ مہ کا بندھا جس میں تار نظر
چقوں کا تماشا، تھا انکھوں کا جال


نگہ کو وہاں سے گزرنا محال
سنہری، مغرق چھتیں ساریاں
وہ دیوار اور در کی گل کاریاں
دیے چار سو آئنے جو لگا


گیا چوگنا لطف اس میں سما
وہ مخمل کا فرش اس میں ستھرا کہ بس
بڑھے جس کے آگے نہ پاے ہوس
رہیں لخلخے اس میں روشن مدام


معطر شب و روز جس سے مشام
چھپر کھٹ مرصع کا دالان میں
چمکتا تھا اس طرح ہر آن میں
زمیں پر تھی اس طور اس کی جھلک


ستاروں کی جیسے فلک پر چمک
زمیں کا کروں دھاں کی کیا میں بیا ں
کہ صندل کا اک پارچہ تھا عیاں
بنی سنگ مر مر سے چو پڑ کی نہر


گئی چارسو، اس کے پانی کی لہر
قرینے سے گرد اس کے سروسہی
کچھ اک دور دور اس سے سیب و بہی
کہوں کیا میں کیفیت دار بست


لگائے رہیں تاک وہاں مے پرست
ہواے بہاری سے گل لہلہے
چمن سارے شاداب اور ڈہڈ ہے
زمرد کی مانند سبزے کا رنگ


روش کا، جواہر ہوا جس سے سنگ
روش کی صفائی پہ بے اختیار
گل اشرفی نے کیا زر نثار
چمن سے بھرا باغ، گل سے چمن


کہیں نرگس و گل، کہیں یاسمن
چنبیلی کہیں اور کہیں موتیا
کہیں راے بیل اور کہیں موگرا
کھڑے شاخ شبو کے ہر جانشان


مدن بان کی اور ہی آن بان
کہیں ارغواں اور کہیں لالہ زار
جدی اپنے موسم میں سب کی بہار
کہیں چاندنی میں گلوں کی بہار


ہر اک گل سفیدی سے مہتاب وار
کھڑے سرو کی طرح چمپے کے جھاڑ
کہے تو کہ خوش بوئیوں کے پہاڑ
کہیں زرد نسریں، کہیں نسترن


عجب رنگ پر زعفرانی چمن
پڑی آبجو، ہر طرف کو بہے
کریں قمریاں سرو پر چہچہے
گلوں کا لب نہر پر جھومنا


اسی اپنے عالم میں منہ چومنا
وہ جھک جھک کے گرنا خیابان پر
نشے کا سا عالم گلستان پر
لیے بیلچے ہاتھ میں مالنے


چمن کو لگیں دیکھنے بھالنے
کہیں تخم پاشی کریں کھود کر
پنیری جماویں کہیں گود کر
کھڑے شاخ در شاخ باہم نہال


رہیں ہاتھ جوں مست گردن پہ ڈال
لب جو کے آئینے میں دیکھ قد
اکڑنا کھڑے سرو کا جد نہ تد
خراماں صبا صحن میں چار سو


دماغوں کو دیتی پھرے گل کی بو
کھڑے نہر پر قاز اور قر قرے
لیے ساتھ مرغابیوں کے پرے
صدا قر قروں کی، بطوں کا وہ شور


درختوں پہ بگلے، منڈیروں پہ مور
چمن آتش گل سے دہکا ہوا
ہوا کے سبب باغ مہکا ہوا
صبا جو گئی ڈھیریاں کر کے بھول


پڑے ہر طرف مونسریوں کے پھول
وہ کیلوں کی اور مونسریوں کی چھانو
لگی جائیں آنکھیں لیے جن کا نانو
خوشی سے گلوں پر سدا بلبلیں


تعشق کی آپس میں باتیں کریں
درختوں نے برگوں کے کھولے ورق
کہ لیں طوطیاں بوستاں کا سبق
سماں قمریاں دیکھ اس آن کا


بڑھیں باب پنجم گلستان کا
دوا، دائیاں اور مغلانیاں
پھریں ہر طرف اس میں جلوہ کناں
خواصوں کا اور لونڈیوں کا ہجوم


محل کی وہ چہلیں، وہ آپس کی دھوم
تکلف کے پہنے پھریں سب لباس
رہیں رات دن شاہ زادے کے پاس
کنیزان مہ رو کی ہر طرف ریل


چنبیلی کوئی اور کوئی راے بیل
شگوفہ کوئی اور کوئی کام روپ
کوئی چت لگن اور کوئی سیام روپ
کوئی کیتکی اور کوئی گلاب


کوئی مہ رتن اور کوئی ماہتاب
کوئی سیوتی اور ہنس مکھ کوئی
کوئی دل لگن اور تن سکھ کوئی
ادھر اور ادھر آتیاں جاتیاں


پھریں اپنے جوبن میں اتراتیاں
کہیں چٹکیاں اور کہیں تالیاں
کہیں قہقہے اور کہیں گالیاں
کہیں اپنی پٹی سنوارے کوئی


اری اور تری کہہ پکارے کوئی
بجاتی پھرے کوئی اپنے کڑے
کہیں ’’ہوئے رے‘‘ اور کہیں ’’واچھڑے‘‘
دکھاوے کوئی گو کھرو موڑ موڑ


کہیں سوت بونٹی، کہیں تار توڑ
ادا سے کوئی بیٹھی حقہ پیے
دم دوستی کوئی بھر بھر جیے
کوئی حوض میں جاکے غوطہ لگائے


کوئی نہر پر پانو بیٹھی ہلائے
کوئی اپنے توتے کی لیوے خبر
کوئی اپنی مینا پہ رکھے نظر
کسی کو کوئی دھول مارے کہیں


کوئی جان کو اپنی وارے کہیں
کوئی آرسی اپنے آگے دھرے
ادا سے کہیں بیٹھی کنگھی کرے
مقابا کوئی کھول مسی لگائے


لبوں پر دھڑی کوئی بیٹھی جمائے
ہوا ان گلوں سے دوبالا سماں
اسی باغ میں یہ بھی باغ رواں
غرض لوگ تھے یہ جو ہر کام کے


سو سب واسطے اس کے آرام کے
پلا جب وہ اس ناز و نعمت کے ساتھ
پدر اور مادر کی شفقت کے ساتھ
ہوئی اس کے مکتب کی شادی عیاں


ہوا پھر انہیں شادیوں کا سماں
معلم، اتالیق، منشی، ادیب
ہر اک فن کے استاد بیٹھے قریب
کیا قاعدے سے شروع کلام


پڑھانے لگے علم اس کو تمام
دیا تھا زبس حق نے ذہن رسا
کئی برس میں علم سب پڑھ چکا
معانی و منطق، بیان و ادب


پڑھے اس نے منقول و معقول سب
خبردار حکمت کے مضمون سے
غرض جو پڑھا اس نے، قانون سے
لگا ہیئت و ہندسہ تا نجوم


زمیں آسماں میں پڑی اس کی دھوم
کیے علم نوک زباں حرف حرف
اسی نحوسے عمر کی اس نے صرف
عطارد کو اس کی لگی آنے ریس


ہوا سادہ لوحی میں وہ خوش نویس
ہوا جب کہ نو خط وہ شیریں رقم
بڑھا کر لکھے سات سے، نو قلم
لیا ہاتھ جب خامۂ مشک بار


لکھا نسخ و ریحان و خط غبار
عروس الخطوط اور ثلث و رقاع
خفی و جلی مثل خط شعاع
شکستہ لکھا اور تعلیق جب


رہے دیکھ، حیراں، اتالیق سب
کیا خط گلزار سے جب فراغ
ہوا صفحۂ قطعہ، گلزار باغ
کروں علم کو اس کے کیا میں عیاں


کروں مختصر یاں سے اب یہ بیاں
کماں کے جو درپے ہوا بے نظیر
لیا کھینچ چلے میں سب فن تیر
صفائی میں سو فار، پیکاں کیا


گیا جب کہ تودے پہ، طوفاں کیا
رکھا چھوٹتے ہی جو لکڑی پہ من
لیا اپنے قبضے میں سب اس کا فن
ہوئیں دست و بازو کی سر سائیاں


اڑائیں کئی ہاتھ میں گھائیاں
رکھا موسیقی پر بھی کچھ جو خیال
کیے قید سب اس نے ہاتھوں میں تال
طبیعت گئی کچھ جو تصویر پر


رکھے رنگ سب اس نے مد نظر
کئی دن میں سیکھا یہ کسب تفنگ
کہ حیراں ہوئے دیکھ، اہل فرنگ
سو ان کمالوں کے، کتنے کمال


مروت کی خو، آدمیت کی چال
رذالوں سے، نفروں سے نفرت اسے
غرض قابلوں ہی سے صحبت اسے
گیا نام پر اپنے وہ دل پذیر


ہر اک فن میں سچ مچ ہوا بے نظیر
داستان سواری کی تیاری کے حکم میں
پلا ساقیا! مجھ کو اک جام مل
جوانی پر آیا ہے ایام گل


غنیمت شمر صحبت دوستاں
کہ گل پنج روز است در بوستاں
ثمر لے بھلائی کا، گر ہو سکے
شتابی سے بو لے، جو کچھ بو سکے


کہ رنگ چمن پر نہیں اعتبار
یہاں چرخ میں ہے خزان و بہار
پڑی جب گرہ بارہویں سال کی
کھلی گل جھڑی غم کے جنجال کی


کہا شہ نے بلوا نقیبوں کو شام
کہ ہوں صبح حاضر سبھی خاص و عام
سواری تکلف سے تیار ہو
مہیا کریں، جو کہ درکار ہو


کریں شہر کو مل کے آئینہ ہند
سواری کا ہو لطف جس سے دو چند
رعیت کے خوش ہوں صغیر و کبیر
کہ نکلے گا کل شہر میں بے نظیر


یہ فرما، محل میں گئے بادشاہ
نقیبوں نے سن حکم، لی اپنی راہ
ہوئی شب، لیا مہ نے جام شراب
گیا سجدۂ شکر میں آفتاب


خوشی سے گئی جلد جو شب گزر
ہوئی سامنے سے نمایاں سحر
عجب شب تھی وہ جوں سحر روسپید
عجب روز تھا مثل روز امید


گیا مژدۂ صبح لے ماہتاب
اٹھا سورج آنکھوں کو ملتا شتاب
کہا شاہ نے اپنے فرزند کو
کہ بابا! نہا دھو کے تیار ہو


داستان حمام کے نہانے کی لطافت میں
پلا آتشیں آب پیر مغاں!
کہ بھولے مجھے گرم و سرد جہاں
اگر چاہتا ہے مرے دل کا چین


نہ دینا وہ ساغر جو ہو قلتین
کدورت مرے دل کی دھو ساقیا
ذرا شیشئہ مے کو دھو دھا کے لا
کہ سر گرم حمام ہے بے نظیر


گیا ہے نہانے کو ماہ منیر
ہوا جب کہ داخل وہ حمام میں
عرق آ گیا اس کے اندام میں
تن نازنیں نم ہوا س کا گل


کہ جس طرح ڈوبے ہے شبنم میں گل
پرستار، باندھے ہوئے لنگیاں
مہ و مہر سے طاس لے کر وہاں
لگے ملنے اس گل بدن کا بدن


ہوا ڈہڈہا آب سے وہ چمن
نہانے میں یوں تھی بدن کی دمک
برسنے میں بجلی کی جیسے چمک
لبوں پر جو پانی پھرا سر بہ سر


نظر آئے، جیسے دو گل برگ تر
ہوا قطرۂ آب یوں چشم بوس
کہے تو، پڑے جیسے نرگس پہ اوس
لگا ہونے ظاہر جو اعجاز حسن


ٹپکنے لگا اس سے انداز حسن
گیا حوض میں جو شہ بے نظیر
پڑا آب میں عکس ماہ منیر
وہ گورا بدن اور بال اس کے تر


کہے تو کہ ساون کی شام و سحر
نمی کا تھا بالوں کی عالم عجب
نہ دیکھی کوئی خوب تر اس سے شب
کہوں اس کی خوبی کی کیا تجھ سے بات


کہ جوں بھیگتی جاوے صحبت میں رات
زمیں پر تھا اک موجۂ نور خیز
ہوا جب وہ فوارہ ساں آب ریز
زمرد کے لے ہاتھ میں سنگ پا


کیا خادموں نے جو آہنگ پا
ہنسا کھلکھلا وہ گل نو بہار
لیا کھینچ پانوں کو بے اختیار
عجب عالم اس نازنیں پر ہوا


اثر گد گدی کا جبیں پر ہوا
ہنسا اس ادا سے کہ سب ہنس پڑے
ہوئے جی سے قربان چھوٹے بڑے
دعائیں لگے دینے بے اختیار


کہا: خوش رکھے تجھ کو پرور دگار
کہ تیری خوشی سے، ہے سب کی خوشی
مبارک تجھے روز و شب کی خوشی!
نہ آوے کبھی تیری خاطر پہ میل


چمکتا رہے یہ فلک کا سہیل
کیا غسل جب اس لطافت کے ساتھ
اڑھا کھیس، لائے اسے ہاتھوں ہاتھ
نہا دھو کے نکلا وہ گل اس طرح


کہ بدلی سے نکلے ہے مہ جس طرح
غرض شاہ زادے کو نہلا دھلا
دیا خلعت خسروانہ پنہا
جواہر سراسر پنہایا اسے


جواہر کا دریا بنایا اسے
لڑی، لٹکن اور کلغی اور نورتن
عدد ایک سے ایک زیب بدن
مرصع کا سر پیچ جوں موج آب


مصفّا بہ شکل گل آفتاب
وہ موتی کے مالے بہ صد زیب و زین
کہیں جس کو آرام جاں، دل کا چین
جواہر کا تن پر عجب تھا ظہور


کہ ایک ایک عدد اس کا، تھا کوہ طور
غرض ہو کے اس طرح آراستہ
خراماں ہوا سرو نوخاستہ
نکل گھر سے جس دم ہوا وہ سوار


کیے خوان گوہر کے اس پر نثار
زبس تھا سواری کا باہر ہجوم
ہوا جب کہ ڈنکا، پڑی سب میں دھوم
برابر برابر کھڑے تھے سوار


ہزاروں ہی تھی ہاتھیوں کی قطار
سنہری، رپہری تھیں عماریاں
شب و روز کی سی طرح داریاں
چمکتے ہوئے بادلوں کے نشان


سواروں کے غٹ اور بھالوں کی شان
ہزاروں تھی اطراف میں پالکی
جھلا بور کی جگمگی نالکی
کہاروں کی زر بفت کی کرتیاں


اور ان کے دبے پانو کی پھرتیاں
بندھیں پگڑیاں تاش کی سر اوپر
چکا چوندھ میں جس سے آوے نظر
وہ ہاتھوں میں سونے کے موٹے کڑے


جھلک جس کی ہر ہر قدم پر پڑے
وہ ماہی مراتب، وہ تخت رواں
وہ نوبت، کہ دولھا کا جس سے سماں
وہ شہنائیوں کی صدا خوش نوا


سہانی وہ نوبت کی اس میں صدا
وہ آہستہ گھوڑوں پہ نقارچی
قدم با قدم بالباس زری
بجاتے ہوئے شادیا نے تمام


چلے آگے آگے ملے، شاد کام
سوار اور پیادے، صغیر و کبیر
جلو میں تمامی امیر و وزیر
وے نذریں کہ جس جس نے تھیں ٹھانیاں


شہ و شاہ زادے کو گزرانیاں
ہوئے حکم سے شاہ کے پھر سوار
چلے سب قرینے سے باندھے قطار
سجے اور سجائے سبھی خاص و عام


لباس زری میں ملبس تمام
طرق کے طرق اورپرے کے پرے
کچھ ایدھر ادھر، کچھ ورے، کچھ پرے
مرصع کے سازوں سے کوتل سمند


کہ خوبی میں روح الفرس سے دو چند
وہ فیلوں کی اور میگ ڈمبر کی شان
جھلکتے وہ مقیش کے سایبان
چلی پایۂ تخت کے ہو قریب


بہ دستور شاہانہ نپتی جریب
سواری کے آگے کیے اہتمام
لیے سونے روپے کے عاصے تمام
نقیب اور جلو دار اور چوبدار


یہ آپس میں کہتے تھے ہر دم پکار
اسی اپنے معمول و دستور سے
ادب سے تفاوت سے اور دور سے
یلو! نوجوانو! بڑھے جائیو


دو جانب سے باگیں لیے آئیو
بڑھے جائیں آگے سے، چلتے قدم
بڑھے عمر و دولت قدم با قدم
غرض اس طرح سے سواری چلی


کہے تو کہ باد بہاری چلی
تماشائیوں کا جدا تھا ہجوم
ہر اک طرف تھی ایک عالم کی دھوم
لگا قلعے سے شہر کی حد تلک


دکانوں پہ تھی بادلے کی جھلک
کیا تھا زبس شہر آئینہ بند
ہوا چوک کا لطف واں چار چند
منڈھے تھے تمامی سے دیوار و در


تمامی وہ تھا شہر، سونے کا گھر
رعیت کی کثرت، ہجوم سپاہ
گزرتی تھی رک رک کے ہر جانگاہ
ہوئے جمع کھوٹھوں پہ جو مردوزن


ہر اک سطح تھی جوں زمین چمن
یہ خالق کی سن قدرت کا ملہ
تماشے کو نکلی زن حاملہ
لگا لنج سے تا ضعیف و نحیف


تماشے کو نکلے وضیع و شریف
وحوشوں، طیوروں تلک بے خلل
پڑے آشیانوں سے اپنے نکل
نہ پہنچا جو اک مرغ قبلہ نما


سو وہ آشیانے میں تڑپھا کیا
زبس شاہ زادہ بہت تھا حسیں
ہوئے دیکھ عاشق کہین و مہیں
نظر جس کو آیا وہ ماہ تمام


کیا اس نے جھک جھک کے اس کو سلام
دعا شاہ کو دی کہ بار الٰہ!
سدا یہ سلامت رہے مہر و ماہ
یہ خوش اپنے مہ سے رہے شہر یار


کہ روشن رہے شہر، پروردگار!
غرض شہر سے باہر اک سمت کو
کوئی باغ تھا شہ کا، اس میں سے ہو
گھڑی چار تک خوب سی سیر کر


رعیت کو دکھلا کے اپنا پسر
اسی کثرت فوج سے ہو سوار
پھر اشہر کی طرف وہ شہر یار
سواری کو پہنچا گئی فوج، ادھر


گئے اپنی منزل میں شمس و قمر
جہاں تک کہ تھیں خادمان محل
خوشی سے وہ ڈیوڑھی تک آئیں نکل
قدم اپنے حجروں سے باہر نکال


لیا سب نے، آپیشوا، حال حال
بلائیں لگیں لینے سب ایک بار
کیا جی کو یک دست سب نے نثار
گیا جب محل میں وہ سر و رواں


بندھا ناچ اور راگ کا پھر سماں
پہر رات تک، پہنے پوشاک وہ
رہا ساتھ سب کے طرب ناک وہ
قضارا وہ شب، تھی شب چار دہ


پڑا جلوہ لیتا تھا ہر طرف مہ
نظارے سے تھا اس کے، دل کو سرور
عجب عالم نور کا تھا ظہور
عجب جوش تھا نور مہتاب کا


کہے تو کہ دریا تھا سیماب کا
ہوا شاہ زادے کا دل بے قرار
یہ دیکھی جو واں چاندنی کی بہار
کچھ آئی جو اس مہ کے جی میں ترنگ


کہا: آج کوٹھے پہ بچھے پلنگ
خواصوں نے جا شاہ سے عرض کی
کہ شہ زادے کی آج یوں ہے خوشی
ارادہ ہے کوٹھے پر آرام کا


کہ بھایا ہے عالم لب بام کا
کہا شہ نے: اب تو گئے دن نکل
اگر یوں ہے مرضی تو کیا ہے خلل
پر اتنا ہے، اس سے خبردار ہوں


جنھوں کی ہے چوکی، وہ بیدار ہوں
لب بام پر جب یہ سووے صنم
کریں سورۂ نور کو اس پہ دم
تمھارا مرا بول بالا رہے


یہ اس گھر کا قائم اجالا رہے
کہا تب خواصوں نے: حق سے امید
یہی ہے کہ ہم بھی رہیں رو سفید
پھریں حکم لے وہاں سے پھر شاہ کا


بچھونا کیا جا کے اس ماہ کا
قضارا وہ دن تھا اسی سال کا
غلط وہم ماضی میں تھا حال کا
سخن مولوی کا یہ سچ ہے قدیم


کہ آگے قضا کے، ہو احمق حکیم
پڑے اپنے اپنے جو سب عیش بیچ
نہ سوجھی زمانے کی کچھ اونچ نیچ
یہ جانا کہ یوں ہی رہے گا یہ دور


زمانے کا سمجھا انہوں نے نہ طور
کہ اس بے وفا کی نئی ہے ترنگ
یہ گرگٹ بدلتا ہے ہر دم میں رنگ
کرا بادۂ عیش درجام ریخت


کہ صد شام بر فرق صبحش نہ پیخت
نداری تعجب ز نیرنگ دہر
کہ آرد زیک حقہ تریاک و زہر
داستان شاہ زادے کے کوٹھے پر سونے کی اور پری کے اڑا کر لے جانے کی


شتابی سے اٹھ ساقی بے خبر!
کہ چاروں طرف ماہ ہے جلوہ گر
بلوریں گلابی میں دے بھر کے جام
کہ آیا بلندی پہ ماہ تمام


جوانی کہاں اور کہاں پھر یہ سن
مثل ہےکہ ہے چاندنی چار دن
اگر مے کے دینے میں کچھ دیر ہے
تو پھر جان یہ تو کہ اندھیر ہے


وہ سونے کا جو تھا جڑاؤ پلنگ
کہ سیمیں تنوں کو ہو جس پر امنگ
کھنچی چادر ایک اس پہ شبنم کی صاف
کہ ہو چاندنی، جس صفا کی غلاف


دھرے اس پہ تکیے کئی نرم نرم
کہ مخمل کو ہو جس کے دیکھے سے شرم
کہاں تک کوئی اس کی خوبی کو پائے
جسے دیکھ، آنکھوں کو آرام آئے


کسے اس پہ کسنے وہ مقیش کے
کہ جھبوں میں تھے جس کے موتی لگے
سراسر ادقچے رزی باف کے
کہ تھے رشک آئینہ صاف کے


وہ گل تکیے اس کے جو تھے رشک ماہ
کہ ہر وجہ تھی ان کو خوبی میں راہ
کہوں اس کے گل تکیوں کا کیا بیاں
کہ بے وجہ رکھتا نہ تھا گال واں


کبھی نیند میں جب کہ ہوتا تھا وہ
تو رخسار رکھ اپنا، سوتا تھا وہ
چھپائے سے ہوتا نہ، حسن اس کا ماند
کہے تو، لگائے تھے مکھڑے پہ چاند


زبس نیند میں تھا جو وہ ہورہا
بچھونے پہ آتے ہی بس سورہا
وہ سویا جو اس آن سے بے نظیر
رہا پاسباں اس کا ماہ منیر


ہوا اس کے سونے پہ عاشق جو ماہ
لگا دی ادھر اپنی اس نے نگاہ
وہ مہ اس کے کوٹھے کا ہالا ہوا
غرض واں کا عالم دو بالا ہوا


وہ پھولوں کی خوش بو، وہ ستھرا پلنگ
جوانی کی نیند اور وہ سونے کا رنگ
جہاں تک کہ چوکی کے تھے باری دار
ہوا جو چلی، سو گئے ایک بار


غرض سب کو واں عالم خواب تھا
مگر جاگتا ایک مہتاب تھا
قضارا ہوا اک پری کا گزر
پڑی شاہ زادے پہ اس کی نظر


بھبھوکا سا دیکھا جو اس کا بدن
جلا آتش عشق سے اس کا تن
ہوئی حسن پر اس کے جی سے نثار
وہ تخت اپنا لائی ہوا سے اتار


جو دیکھا، تو عالم عجب ہے یہاں
منور ہے سارا زمیں آسماں
دوپٹے کو اس مہ کے منہ سے اٹھا
دیا گال سے گال اپنا م

فقط چند نسخوں کا ہے وہ سفینہ
چلے آئے ہیں جو کہ سینہ بہ سینہ
نہ ان کو نباتات سے آگہی ہے
نہ اصلاً خبر معدنیات کی ہے


نہ تشریح کی لے کسی پر کھلی ہے
نہ علم طبیعی نہ کیمسٹری ہے
نہ پانی کا علم اور نہ علم ہوا ہے
مریضوں کا ان کے نگہباں خدا ہے


نہ قانون میں ان کے کوئی خطا ہے
نہ مخزن میں انگشت رکھنے کی جا ہے
سیدی میں لکھا ہے جو کچھ بجا ہے
نفیسی کے ہر قول پر جاں فدا ہے


سلف لکھ گئے جو قیاس اور گماں سے
صحیفے ہیں اترے ہوئے آسماں سے
وہ شعر اور قصائد کا ناپاک دفتر
عفونت میں سنڈاس سے جو ہے بد تر


زمیں جس سے ہے زلزلہ میں برابر
ملک جس سے شرماتے ہیں آسماں پر
ہوا علم و دیں جس سے تاراج سارا
وہ علموں میں علم ادب ہے ہمارا


برا شعر کہنے کی گر کچھ سزا ہے
عبث جھوٹ بکنا اگر ناروا ہے
تو وہ محکمہ جس کا قاضی خدا ہے
مقرر جہاں نیک و بد کی سزا ہے


گنہ گار واں چھوٹ جائیں گے سارے
جہنم کو بھر دیں گے شاعر ہمارے

ہر شاخ میں ہے شگوفہ کاری
ثمرہ ہے قلم کا حمد باری
کرتا ہے یہ دو زباں سے یکسر
حمد حق و مدحت پیمبر


پانچ انگلیوں میں یہ حرف زن ہے
یعنی کہ مطیع پنج تن ہے
ختم اس پہ ہوئی سخن پرستی
کرتا ہے زباں کی پیش دستی


خواستگاری جناب باری سے مثنوی گلزار نسیم کی ترتیب کے واسطے
یارب! میرے خامے کو زباں دے
منقار ہزار داستاں دے
افسانہ گل بکاولی کا


افسوں ہو بہار عاشقی کا
ہر چند سنا گیا ہے اس کو
اردو کی زباں میں سخن گو
وہ نثر ہے، داد نظم دوں میں


اس مے کو دو آتشہ کروں میں
ہر چند اگلے جو اہل فن تھے
سلطان قلمروسخن تھے
آگے ان کے فروغ پانا:


سورج کو چراغ ہے دکھانا
پر، عجز سخن سدا ہے باقی
دریا نہیں کار بند ساقی
طعنے سے زبان نکتہ چیں روک


رکھ لے مری اہل خامہ میں نوک
خوبی سے کرے دلوں کو تسخیر
نیرنگ نسیم باغ کشمیر
نقطے، ہوں سپند خوش بیانی


جدول، ہو حصار بحر خوانی
جو نکتہ لکھوں کہیں نہ حرف آئے
مرکز پہ کشش مری پہنچ جائے
داستان تاج الملوک شاہ زادے اور زین الملوک باشاہ مشرق کی


روداد زمان پاستانی
یوں نقل ہے خامے کی زبانی
پورب میں ایک تھا شہنشاہ
سلطان زین الملوک ذی جاہ


لشکر کش و تاج دار تھا وہ
دشمن کش و شہر یار تھا وہ
خالق نے دیے تھے چار فرزند
دانا، عاقل، ذکی، خردمند


نقشہ ایک اور نے جمایا
پس ماندہ کا پیش خیمہ آیا
امید کے نخل نے دیا بار
خورشید حمل ہوا نمودار


وہ نور کہ صدقے مہرانور
وہ رخ کہ نہ ٹھہرے آنکھ جس پر
نور آنکھ کا کہتے ہیں پسر کو
چشمک تھی نصیب اس پدر کو


خوش ہوتے ہی طفل مہ جبیں سے
ثابت یہ ہوا ستارہ بیں سے
پیارا یہ وہ ہے کہ دیکھ اسی کو
پھر دیکھ نہ سکیے گا کسی کو


نظروں سے گرا وہ طفل ابتر
مانند سر شک دیدہ تر
پردے سے نہ دایہ نے نکالا
پتلی سا نگاہ رکھ کے پالا


تھا افسر خسرواں وہ گل فام
پالا، تاج الملوک رکھ نام
جب نام خدا جواں ہوا وہ
مانند نظرواں ہوا وہ


آتا تھا شکار گاہ سے شاہ
نظارہ کیا پدرنے ناگاہ
صاد آنکھوں کے دیکھ کے پسر کی
بینائی کے چہرے پر نظر کی


مہر لب شہ ہوئی خموشی
کی نور بصر سے چشمک پوشی
دی آنکھ جو شہ نے رونمائی
چشمک سے نہ بھائیوں کے بھائی


ہر چند کے بادشاہ نے ٹالا
اس ماہ کو شہر سے نکالا
گھر یہی ذکر تھا یہی شور
خارج ہوا نور دیدہ کور


آیا کوئی لے کے نسخہ نور
لایا کوئی جاکے سرمۂ طور
تقدیر سے چل سکا نہ کچھ زور
بینہ نہ ہوا وہ دیدہ کور


ہوتا ہے وہی خدا جو چاہے
مختار ہے، جس طرح نبا ہے
جانا چاروں شاہ زادوں کا بہ تجویز کحال تلاش گل بکاولی کو
پایا جو سفید چشم صفحا


یوں میل قلم نے سرمہ کھینچا
تھا اک کحال پیر دیریں
عیسی کی تھیں اس نے آنکھیں دیکھیں
وہ مرد خدا بہت کراہا


سلطاں سے ملا، کہا کہ شاہا!
ہے باغ بکاولی میں اک گل
پلکوں سے اسی پہ مار چنگل
خورشید میں یہ ضیا کرن کی


ہے مہر گیا اسی چمن کی
اس نے تو گل ارم بتایا
لوگوں کو شگوفہ ہاتھ آیا
شہ زادے ہوئے وہ چاروں تیار


رخصت کیے شہ نے چار ناچار
شاہانہ چلے وہ لے کے ہمراہ
لشکر، اسباب، خیمے، خرگاہ
وہ بادیہ گرد خانہ برباد


یعنی تاج الملوک ناشاد
میدان میں خاک اڑا رہا تھا
دیکھا تو وہ لشکر آرہا تھا
پوچھا تم لوگ خیل کے خیل


جاتے ہو کدھر کو صورت سیل؟
بولا لشکر کا اک سپاہی
جاتی ہے ارم کو فوج شاہی
سلطاں زین الملوک شہ زور


دیدار پسر سے ہوگیا کور
منظور علاج روشنی ہے
مطلوب گل بکاولی ہے
گل کی جو خبر سنائی اس نے


گلشن کی ہوا سمائی اس کو
ہمرہ کسی لشکری کے ہوکر
قسمت پہ چلا یہ نیک اختر
غلام ہونا چاروں شاہ زادوں کا چوسر کھیل کر دلبر بیسوا سے


نقطوں سے قلم کی مہر ہ بازی
یوں لاتی ہے رنگ بد طرازی

یک چند پھرا کیا وہ انبوہ


صحرا صحرا و کوہ در کوہ
بلبل ہوئے سب ہزار جی سے
گل کا نہ پتا لگا کسی سے
وارد ہوئے ایک جگہ سر شام


فردوس تھا اس مقام کا نام
اک نہر تھی شہر کے برابر
ٹھٹکے سیارے کہکشاں پر
اک باغ تھا نہر کے کنارے


جویاے گل اس طرف سدھارے
دلبر نام ایک بیسوا تھی
اس ماہ کی واں محل سرا تھی
دروازے سے فاصلے پہ گھر تھا


نقارہ چو بدار در تھا
بے جا و بجا نہ سمجھے ان جان
نقارہ بجا کے ٹھہرے نادان
آواز پہ وہ لگی ہوئی تھی


آپ آن کے ٹھاٹھ دیکھتی تھی
جس شخص کو مال دار پاتی
باہر سے اسے لگا کے لاتی
بٹھلا کے، جوے کا ذکر اٹھا کر


چوسر میں وہ لوٹتی سراسر
جیت اس کی تھی، ہاتھ جو کچھ آتا
اس کا کوئی ہتکھنڈا نہ پاتا
بلی کا سر چراغ داں تھا


چوہا پاسے کا پاسباں تھا
الٹاتے اڑی پہ، قسمت آسا
بلی، جو دیا موش، پاسا
جیتے ہوئے بندے تھے ہزاروں


قسمت نے پھنسائے یہ بھی چاروں
صیادنی لائی پھانس کر صید
کرسی پہ بٹھائے نقش امید
گھاتیں ہوئیں دل ربائیوں کی


باتیں ہوئیں آشانائیوں کی
رنگ اس کا جما، تو لا کے چوسر
کھیلی وہ کھلاڑ بازی بد کر
وہ چھوٹ پہ تھی، یہ میل سمجھے


بازی چوسر کی کھیل سمجھے
مغرور تھے مال و زر پہ کھیلے
ساماں ہارے تو سر پہ کھیلے
بدبختی سے آخر جوا تھا


بندہ ہونا بدا ہوا تھا
دو ہاتھ میں چاروں اس نے لوٹے
پنچے میں پھنسے تو چھکے چھوٹے
ایک ایک سے رات بھر نہ چھوٹا


پوپھٹتے ہی جگ ان کا ٹوٹا
زنداں کو چلے مچل مچل کر
نردوں کی طرح پھرے نہ چل کر
لشکر میں سے جوگیا سوئے شہر


پانی سا پھرا نہ جانب نہر
جیتنا تاج الملوک کا دلبر بیسوا کو اور چھوڑ کر روانہ ہونا تلاش گل بکاولی میں
لانا زر گل جو ہے ارم سے
یوں صفحے سے نقش ہے قلم سے


وہ ریگ رواں کا گرد لشکر
یعنی تاج الملوک ابتر
حیران ہوا کہ یا الٰہی!
لشکر پہ یہ کیا پڑی تباہی


اٹھا کہ خبر تو لیجے چل کر
گزرا در باغ بیسوا پر
حیران تھا یہ بلند پایہ
نکلی اندر سے ایک دایہ


لڑکا کوئی گھو گیا تھا اس کا
ہم شکل یہ مہ لقا تھا اس کا
بولی وہ کہ نام کیا ہے تیرا
فرزند اسی شکل کا تھا میرا


بولا وہ کہ نام تو نہیں یاد
طفلی میں ہوا ہوں خانہ برباد
لیکن یہ میں جانتا ہوں دل گیر
مادر تھی مری بھی ایسی ہی پیر


بیٹا وہ سمجھ کے جی سے اس کو
گھر لائی ہنسی خوشی سے اس کو
چلتے تھے ادھر سے دو جواری
ایک ایک کی کر رہا تھا خواری


کہتے تھے: فریب دو گے کیا تم
شہ زادے نہ ہم، نہ بیسوا تم
ذکر اپنے برادروں کا سن کر
بولا وہ عزیز، سن تو مادر!


کون ایسی کھلاڑ بیسوا ہے
شہ زادوں کو جس نے زچ کیا ہے؟
بولی وہ کہ ہاں جوا ہے بدکام
دلبر اک بیسوا ہے خود کام


بلی پہ چراغ رکھ کےشب کو
چوسر میں وہ لوٹتی ہے سب کو
پاسے کی ہے کل چراغ کے ساتھ
وہ بلی کے سر، یہ چوہے کے ہاتھ


شہ زادے کہیں کے تھے بد اقبال
بندے ہوئے، ہار کر زر و مال
بھائی، جوش خوں کہاں جائے
صدمہ ہوا، درد سے کہا ہائے!


پاسے کا، چراغ کا الٹ پھیر
سوجھا نہ اانھیں، یہ دیکھو اندھیر
سوچا وہ کہ اب تو ہم ہیں آگاہ
جیتے ہیں، تو جیت لیں گے ناگاہ


اک بلی جھپٹی چوہے کو بھانپ
نیولے تے بھگا دیا دکھا سانپ
سمجھا وہ کہ ہے شگوں نرالا
نیولا پکڑ آستیں میں پالا


چوسر ہی کے سیکھنے کو اکثر
گھوما وہ بہ رنگ نرد گھر گھر
اک روز اسے مل گیا امیر ایک
وہ صاحب جاہ دل سے تھا نیک


اشراف سجمھ کے لے گیا گھر
بخشا اسے اسپ و جامہ و زر
اس گل کے ہاتھ میں جو زر آیا
جاں بازی کو سوے دلبر آیا


ملتی تھی کھلاڑ ڈنکے کی چوٹ
نقارہ و چوب میں چلی چوٹ
آواز وہ سن کے در پر آئی
ہمرہ اسے لے کے اندر آئی


کام اس کا تھا بس کہ کھیل کھانا
چوسر کا جما وہ کارخانہ
وہ چشم و چراغ بیسوا کے
کرنے لگے تاک جھانک آ کے


نیولا، کہ وہ مار آستیں تھا
چٹکی کے بجاتے ہی وہیں تھا
بلی تو چراغ پا تھی خاموش
بل ہو گیا موش کو فراموش


ہنس ہنس کے حریف نے رلایا
مانند چراغ اسے جلایا
بارے بہ ہزار بددماغی
لی خضر نے غول سے چراغی


پا سے چلی نہ جعل سازی
اجڑی وہ، بسا بسا کے بازی
سب ہار کے نقد و جنس، بارے
جیتے ہوئے بندے بد کے ہارے


بنیاد جو کچھ تھی، جب گنوائی
تب خود وہ کھلاڑ، مہرے آئی
پھر پاسے کی نہ پاس داری
ہمت کی طرح وہ دل سے ہاری


پاسے کی بدی ہے آشکارا
راجانل سلطنت ہی ہارا
دانا تو کرے کب اس طرف میل
ہارا ہے جوے کے نام سے بیل


ہارے، دیکھا جو بیسوا نے
بندہ کیا غیر کا خدا نے
سوچی کہ نہ اب بھی چال رہیے
شادی کا مزہ نکال رہیے


بولی نہ ہزار عجز و زاری
تم جیتے میاں میں تم سے ہاری
لونڈی ہوں، نہیں عدول مجھ کو
خدمت میں کرو قبول مجھ کو


بولا وہ کہ سن، یہ ہتکھنڈے چھوڑ
نقارہ در کو چوب سے توڑ
یہ مال، یہ زر، یہ جیتے بندے
یوں ہی یہیں رکھ بجنس چندے


بالفعل ارم کو جاتے ہیں ہم
انشاء اللہ آتے ہیں ہم
بولی وہ۔ سنو تو بندہ پرور!
گلزار ارم ہے پریوں کا گھر


انسان و پری کا سامنا کیا!
مٹھی میں ہوا کا تھا منا کیا!
شہ زادہ ہنسا، کہا کہ دلبر!
کچھ بات نہیں، جو رکھیے دل پر


انسان کی عقل اگر نہ ہو گم
ہے چشم پری میں جاے مردم
یہ کہہ کے اٹھا، کہا کہ لو جان!
جاتے ہیں، کہا: خدا نگہ بان!


دولت تھی اگر چہ اختیاری
پا مردی سے اس پہ لات ماری
جز جیب، نہ مال پر پڑا ہاتھ
جز سایہ، نہ کوئی بھی لیا ساتھ


درویش تھا بندۂ خدا وہ
اللہ کے نام پر چلا ہو
پہنچنا تاج الملوک کا سرنگ کھدواکر باغ بکاولی میں اور گل لے کر پھرنا
کرتا ہے جو طے سواد نامہ


یوں حرف، ہیں نقش پاے خامہ
وہ دامن دشت شوق کا خار
یعنی تاج الملوک دل زار
اک جنگلے میں جا پڑا جہاں گرد


صحراے عدم بھی تھا جہاں، گرو
سایے کو پتا نہ تھا شجر کا
عنقا تھا، نام جانور کا
مرغان ہوا تھے ہوش راہی


نقش کف پا تھے ریگ ماہی
وہ دشت کہ جس میں پر تگ و دو
یا ریگ رواں تھی یا وہ رہ رو
ڈانڈا تھا ارم کے بادشاہ کا


اک دیو تھا پاسباں بلا کا
دانت اس کے: گور کن قضا کے
دو نتھنے: رہ عدم کے ناکے
سر پر پایا بلا کو اس نے


تسلیم کیا قضا کو اس نے
بھوکا کئی دن کا تھا وہ ناپاک
فاقوں سے رہا تھا پھانک کر خاک
بے ریشہ یہ طفل نوجواں تھا


حلوا بے دود بے گماں تھا
بولا کہ چھکوں گاہیں یہ انساں
اللہ اللہ! شکر، احساں!
شہ زادہ کہ منہ میں تھا اجل کے


اندیشے سے رہ گیا دہل کے
پل مارنے کی ہوئی جو دیری
سبحان اللہ شان تیری!
اشتر کئی جاتے تھے ادھر سے


پر آردو روغن و شکر سے
وہ دیو لپک کے مار لایا
غراتے ہوئے شکار لایا
اونٹوں کی جو لو تھیں دیو لایا


دم اس کا نہ اس گھڑی سمایا
تیورا کے وہیں وہ بار بر دوش
بیٹھا تو گرا، گرا تو بے ہوش
چاہا اس نے کہ مار ڈالو


یا بھاگ سکو تو راستہ لو
وہ اونٹ تھے کاروانیوں کے
سب ٹھاٹھ تھے میہانیوں کے
میدہ بھی، شکر بھی، گھی بھی پایا


خاطر میں یہ اس بشر کی آیا
میٹھا اس دیو کو کھلاؤ
گڑ سے جو مرے، تو زہر کیوں دو
حلوے کی پکا کے اک کڑھائی


شیرینی دیو کو چڑھائی
ہر چند کہ تھا وہ دیو کڑوا
حلوے سے کیا منہ اس کا میٹھا
کہنے لگا: کیا مزہ ہے دل خواہ!


اے آدمی زاد واہ وا واہ!
چیز اچھی کھلائی تو نے مجھ کو
کیا اس کے عوض میں دوں میں تجھ کو
بولا وہ کہ پہلے قول دیجے


پھر جو میں کہوں، قبول کیجے
وہ ہاتھ پر اس کے مار کر ہاتھ
بولا کہ ہے قول جان کے ساتھ
بولا وہ کہ قول اگر یہی ہے


بد عہدی کی پر نہیں سہی ہے
گلزار ارم کی ہے مجھے دھن
بولا وہ: ارے بشر وہ گلبن!
خورشید کے ہم نظر نہیں ہے


اندیشے کا واں گزر نہیں ہے
واں موج ہوا: ہوا پہ اژدر
واں ریگ زمیں: زمیں پہ اخگر
ہوتا نہ جو قول کا سہارا


بچتانہ یہیں تو خیر، ہارا
رہ جا، میرا بھائی ایک ہے اور
شاید کچھ اس سے بن پڑے طور
اک ٹیکرے پر گیا، بلایا


وہ مثل صدائے کوہ آیا
حال اس سے کہا کہ قول ہارا
ہے پیر، یہ نوجواں ہمارا
مشتاق ارم کی سیر کا ہے


کوشش کرو، کم خیر کا ہے
حمالہ نام دیونی ایک
چھوٹی بہن اس کی تھی بڑی نیک
خط اس کو لکھا بہ ایں عبارت


اے خواہر مہرباں! سلامت
پیارا ہے یہ میرا آدمی زاد
رکھیو اسے، جس طرح مری یاد
انسان ہے، چاہے کچھ جو سازش


مہمان ہے، کیجیو نوازش
خط لے کے، بشر کو لے اڑا دیو
پہنچا حمالہ پاس بے ریو
بھائی کا جو خط بہن نے پایا


بھیجے ہوئے کو گلے لگایا
اس دیونی پاس اک حسیں تھی
زنبور کے گھر میں انگبیں تھی
محمودہ نام، دخت آدم


لے ائی تھی دیونی دے کے دم
جوڑا ہم جنس کے ہاتھ آیا
محمودہ کے گلے لگایا
دن بھر تو الگ تھلگ ہی تھے وہ


دو وقت سے شام کو ملے وہ
تھے ضببط و حیا کے امتحاں میں
پردہ رہا ماہ میں، کتاں میں
آپس میں کھلے نہ شرم سے وہ


خاطر کی طرح گرہ رہے وہ
بولا وہ فسردہ دل سحر گاہ
کیا سرد ہوا ہے واہ وا واہ!
بولی وہ کہ ہونے کو ہوا ہے


جو غنچے کو گل کرے، صبا ہے
بولا وہ، یہی تو چاہتا ہوں
گل پاؤں، تو میں ابھی ہوا ہوں
پیراہن گل کی بو، تھی مطلوب


یوسف نے کہا وہ حال یعقوب
اول کہی بد نگاہی اپنی
بعد اس کے وہ سب تباہی اپنی
کھولی تھی زبان منہ اندھیرے


کہتے سنتے اٹھے سویرے
پوچھا حمالہ نے: میری جان!
ہم جنس ملا، نکالے ارمان
بولی وہ کہ کہتے آتی ہے شرم


دل سرد رہا، بغل ہوئی گرم
ناکامی کے جب وہ طور سمجھی
وہم اس کو ہوا، کچھ اور سمجھی
پوچھا کہ بتا تو درد، لیکن


تم چاہو، تو ہے دوا بھی ممکن
وہ بولی: جو تو کہے زباں سے
تارے لے آؤں آسماں سے
چہرے کو چھپا کے زیر چادر


محمودہ نے کہا کہ مادر!
باپ اس کا ہے اندھے پن سے مجہول
مطلوب بکاولی کا ہے پھول
دل داغ اس کا براے گل ہے


نرگس کے لیے ہواے گل ہے
ساعی تھی بہ دل یہ کہنے والی
راہ اس نے سرنگ کی نکالی
دیووں کہا کہ چوہے بن جاؤ


تا باغ ارم سرنگ پہنچاؤ
سن حاجت نقب بہر گل گشت
کترا چوہوں نے دامن دشت
پوشیدہ زمیں کے دل میں کی راہ


حد باندھ کے، خوش پھرے اسی راہ
جب مہر تہ زمیں سمایا
اس نقب کی رہ وہ آدم آیا
صحن چمن ارم میں اک جا


بوٹا سا تہ زمیں سے نکلا
کھٹکا جو نگاہ بانوں کا تھا
دھڑکا یہی دل کا کہہ رہا تھا
گوشے میں کوئی لگا نہ ہووے!


خوشہ کوئی تاکتا نہ ہووے!
گو باغ کے پاسباں غضب تھے
خوابیدہ بہ رنگ سبزہ سب تھے
نرگس کی کھلی نہ آنکھ یک چند


سو سن کی زباں خدانے کی بند
خوش قدر وہ چلا گل وہ سمن میں
شمشاد رواں ہوا چمن میں
ایوان بکاولی جدھر تھا


حوض آئنہ دار بام و در تھا
رکھتا تھا وہ آب سے سوا تاب
چندے خورشید، چندے مہتاب
پھول اس کا، اندھے کی دوا تھا


رشک جام جہاں نما تھا
پانی کے جو بلبلوں میں تھا گل
پہنچا لب حوض سے نہ چنگل
پوشاک اتار، اتر کے لایا


پھولا نہ وہ جامے میں سمایا
گل لے کے بڑھا ایاغ برکف
چوری سے چلا چراغ برکف
بالا دری واں جو سوتے کی تھی


سو خواب گہہ بکاولی تھی
گول اس کے ستوں: تھے ساعد حور
چلمن: مژگان چشم مخمور
دکھلاتا تھا وہ مکان جادو


محراب سے ، درسے چشم و ابرو
پردہ جو حجاب سا اٹھایا
آرام میں اس پری کو پایا
بند اس کی وہ چشم نرگسی تھی


چھاتی کچھ کچھ کھلی ہوئی تھی
سمٹی تھی جو محرم اس قمر کی
برجوں پہ سے چاندنی تھی سر کی
لپٹے تھے جو بال کروٹوں میں


بل کھا گئی تھی کمر، لٹوں میں
چاہا کہ بلا گلے لگائے
سوتے ہوئے فتنے کو جگائے
سوچا کہ یہ زلف کف میں لینی


ہے سانپ کے منہ میں انگلی دینی
یہ پھول، انھی اژدہوں کا ہے من
یہ کالے، چراغ کے ہیں دشمن
گل چھن کے، ہنسی نہ ہوئے بلکل


خندہ نہ ہو برق حاصل گل
پھر سمجھیں گے، ہے جو زندگانی
کچھ نام کو رکھ چلو نشانی
انگشتری اپنی اس سے بدلی


مہر خط عاشقی سندلی
آہستہ پھر وہ سر و بالا
سایہ بھی نہ اس پری پہ ڈالا
ہیبت سا زمیں کے دل میں آیا


اندیشے کی طرح سے سمایا
جب نقب افق سے مہر تاباں
نکلا، تو وہ ماہ روشتاباں
گل ہاتھ میں مثل دست انساں


دونوں تھیں اس کی منتظرواں
گل لے کے جب آملا وہ گل چیں
اس نقب کی رخنہ بندیاں کیں
آوارہ ہونا بکاولی کا تاج الملوک گل چیں کی تلاش میں


گل کا جو الم چمن چمن ہے
یوں بلبل خامہ نعرہ زن ہے
کل چیں نے وہ پھول جب اڑایا
اور غنچہ صبح کھل کھلایا


وہ سبزہ باغ خواب آرام
یعنی وہ بکاولی گل اندام
جاگی مرغ سحر کے غل سے
اٹھی نکہت سی فرش گل سے


منہ دھونے جو آنکھ ملتی آئی
پرآب وہ چشم حوض پائی
دیکھا، تو وہ گل ہوا ہوا ہے
کچھ اور ہی گل کھلا ہوا ہے


گھبرائی کہ ہیں! کدھر گیا گل!
جھنجلائی کہ کون دے گیا جل
ہے ہے مرا پھول لے گیا کون!
ہے ہے مجھے خار دے گیا کون


ہاتھ اس پہ اگر پڑا نہیں ہے
بو ہو کے تو پھول اڑا نہیں ہے
نرگس! تو دکھا کدھر گیا گل؟
سوسن! تو بتا کدھر گیا گل؟


سنبل! مرا تازیانہ لانا
شمشاد! انھیں سولی پر چڑھانا
تھرائیں خواصیں صورت بید
ایک ایک سے پوچھنے لگی بھید


نرگس نے نگاہ بازیاں کیں
سوسن نے زباں درازیاں کیں
پتا بھی پتے کو جب نہ پایا
کہنے لگیں: کیا ہوا خدایا!


اپنوں میں سے پھول لے گیا کون
بیگانہ تھا سبزے کو سوا کون!
شبنم کے سوا چرانے والا
اوپر کا تھا کون آنے والا


جس کف میں وہ گل ہو، داغ ہو جائے
جس گھر میں ہو، گل چراغ ہو جائے
بولی وہ بکاولی کہ افسوس!
غفلت سے یہ پھول پر پڑی اوس


آنکھوں سے عزیز گل مرا تھا
پتلی وہی چشم حوض کا تھا
نام اس کا صبا! نہ لیتی تھی میں
اس گل کو ہوا نہ دیتی تھی میں


گل چیں کا جو ہائے ہاتھ ٹوٹا
غنچے کے بھی منہ سے کچھ نہ پھوٹا
اوخار! پڑا نہ تیرا چنگل
مشکیں کس لیں نہ تو نے سنبل!


او باد صبا! ہوا نہ بتلا
خوش بو ہی سنگھا، پتا نہ بتلا
بلبل! تو چہک، اگر خبر ہے
گل! تو ہی مہک، بتا کدھر ہے؟


لرزاں تھی زمیں یہ دیکھ کہرام
تھی سبزے سے راست مو بر اندام
انگلی لب جو پہ رکھ کے شمشاد
تھا دم بہ خود، اس کی سن کے فریاد


جو نخل تھا، سوچ میں کھڑا تھا
جو برگ تھا، ہاتھ مل رہا تھا
رنگ اس کا عرض لگا بدلنے
گل برگ سے کف لگی ہو ملنے


بدلے کی انگوٹھی ڈھیلی پائی
دست آویز اس کے ہاتھ آئی
خاتم، تھی نام کی نشانی
انسان کی دست برد جانی


ہاتھوں کو ملا، کہا کہ ہیہات!
خاتم بھی بدل گیا ہے بدذات
جس نے مجھے ہاتھ ہے لگایا
وہ ہاتھ لگے کہیں خدایا!


عریاں مجھے دیکھ کر گیا ہے
کھال اس کی جو کھینچے، سزا ہے
یہ کہہ کے، جنون میں غضب ناک
خوں روئی، لباس کو کیا چاک


گل کا سا لہو بھرا گریباں
سبزے کا سا تار تار داماں
دکھلا کے کہا سمن پری کو
اب چین کہاں بکاولی کو


تھی بس کہ غبار سے بھری وہ
آندھی سی اٹھی، ہوا ہوئی وہ
کہتی تھی پری کہ اڑکے جاتی
گل چیں کا کہیں پتا لگاتی


ہر باغ میں پھولتی پھری وہ
ہر شاخ پہ جھولتی پھری وہ
جس تختے میں مثل باد جاتی
اس رنگ کے گل کی بو نہ پاتی


بے وقت کسی کو کچھ ملا ہے!
پتا کہیں حکم بن ہلا ہے!
پہنچنا تاج الملوک کا ایک اندھے فقیر کے تکیے پر اور آزمانا گل کا
پھر نا جو وطن کا، مدعا ہے


اب صفحے پہ یو ں قلم پھرا ہے
وہ گلشن مدعا کا گل چیں
یعنی تاج الملوک حق بیں
جس وقت گل اس چمن سے لایا


محمودہ خوش ہوئی کہ آیا
کہنے لگی: لو مراد پائی
بولا وہ: جو یاں سے ہو رہائی
گل کی وہ عرض کر آشکارا


جوبن کی طرح اسے ابھارا
جب دیو سیاہ شب سے ماہتاب
رخصت ہوا، جیسے چشم سے خواب
اور گل لیے آفتاب تاباں


ہنگام سحر ہوا شتاباں
وہ مہر وش اور اوہ ماہ پیکر
اس دیونی پاس آتے مضطر
گل کی وہ عرض جتائی اس کو


رخصت کی طلب سنائی اس کو
کیا کہتی وہ دیونی، کہا: جاؤ
دیووں سے کہا کہ تخت لے آؤ
بولے کہ کدھر چلو گے، کہہ دو


فردوس کے رخ، کہا، ادھر کو
وہ مڑ کے، ادھر کو اڑاکے آئے
گلزار میں بیسوا کے لائے
وقت سحر اور خنک ہوا تھی


گل گشت چمن مین بیسوا تھی
چار آنکھیں ہوئیں تو تھی شناسا
قدموں پہ گری وہ سایہ آسا
صدقے ہو کر کہا: خوش آئے


جس گل کی ہوا لگی تھی، لائے؟
ہمراہ یہ کون دوسری ہے؟
سایہ ہے کہ ہم قدم پری ہے!
بولا شہ زادہ: شکر ہے، ہاں


پر ہے گل آرزو سے داماں
محمودہ نام یہ جو ہیں ساتھ
پھول ان کے سبب سے آگیا ہاتھ
جیتا جو پھرا وہ رشک شمشاد


قیدی کیے بیسوا نے آزاد
جھوٹوں اس نے تھا ان کو تایا
سچوں، کھوٹوں نے داغ کھایا
دغا، تو چلے تفنگ سے وہ


چھوٹے قید فرنگ سے وہ
چھوڑا ہوس گل و چمن کو
چاروں داغی پھرے وطن کو
بندوں کو کشتیوں پہ کر بار


سونپا سب ناخدا کو گھر بار
جب متصل آگیا وطن کے
خندے یاد آئے مرد و زن کے
سوچا کہ میں خود ہوں خانہ برباد


کیا جانیے کیا پڑے گی افتاد
لازم ہے گل اپنے ہاتھ رکھیے
موقع نہیں بھیڑ ساتھ رکھیے
لنگر کا انہیں کیا اشارہ


خود کشتی سے کر گیا کنارہ
وہ پوربی، کر کے جو گیا بھیس
جنگلے کی راہ سے چلا دیس
تکیے پہ فقیر، پیر، اندھا


اک گوشے میں آنکھیں مانگتا تھا
تھا نقش قدم سا خاک رہ پر
ٹھہرا وہ مسافر اس جگہ پر
بے تجربہ تھی نمایش گل


واجب تھی آزمایش گل
پتلی پہ زر گل آزمایا
سونے کو کسوٹی پر چڑھایا
گل سے ہوئیں چشم کور تاباں


ہو جیسے چراغ سے چراغاں
منہ دیکھ کے اس نے دیں دعائیں
پنجے سے مژہ کے لیں بلائیں
گل کے جو اثرسے شادماں تھا


گل چیں وہ ہوا سے ہم عناں تھا
ملنا چاروں شہ زادوں کا اور چھن جانا گل بکاولی کا
تاج الملوک سے اور بینا ہونا چشم زین الملوک کا
ہے بس کہ یہ چرخ جور پیشہ


یوں خار رہ قلم ہے ریشہ
یہ جا کے، اسی جگہ پہ ناگاہ
آپہنچے وہ چاروں غول گم راہ
کہتے تھے کہ واہ رے مقدر!


کس شک سے پھر کے جاتے ہیں گھر

کیا رنگ زمانے نے دکھائے!
گل لینے گئے تھے، داغ لائے


کس منہ سے پدر کے آگے جائیں
کیوں کر بے پھول منہ دکھائیں
ٹھہرائی کہ اور پھول لے جایئں
کحال کو بے وقوف بنایئں


اک باد ہوائی توڑ کر پھول
کہنے لگے پھول پھول کر غول
کیا پھول ہے! کیا اثر ہے اس میں!
ہو جاتی ہیں روشن اندھی آنکھیں


وہ کور کہ ہو چکا تھا بینا
دیکھا اس نے جو یہ قرینا
بولا کہ یہ گل، وہ گل نہیں ہے
اس پھول کی اور گل زمیں ہے


وہ جوگی جو جاتے ہیں، اگر آئیں
دکھلائیں وہ گل، تو آنکھیں کھل جائیں
میں کور، ابھی ہو چکا ہوں بینا
اندھا نہیں اب ہوا ہوں بینا


چاروں کو تھی حسرت گل تر
چو بائی ہوا کی طرح چل کر
اس جوگی کے جب برابر آئے
باہم کہا: دیکھو پھول لائے


گل ہے کہ علاج نور ہے یہ!
گل ہے کہ چراغ طور ہے یہ!
جوگی، یعنی وہ شاہ زادہ
بولا کہ بکو نہیں زیادہ


پاتے اگر اس درخت کی چھاؤں
رکھتے ہی نہ تم زمین پر پاؤں
ڈینگ آپ کی سب فضول ہے یہ
وہ گل یہ نہیں، وہ پھول ہے یہ


یہ کہہ کے، جو جیب سے نکالا
ان مفت بروں نے ہاتھ ڈالا
قوت میں وہ چارتھے، یہ بے کس
شورش میں وہ چار، موج، یہ خس


غولوں نے بہ زور پھول اڑایا
اس خضر کو راستہ بتایا
گل پانے سے بس کہ سرخ رو تھے
گھوڑوں پہ ہوا کے مثل بو تھے


تعجیل سے رو بہ راہ آئے
گل لے کے حضور شاہ آئے
گل لائے جو نور دیدہ دل خواہ
آنکھوں کی طرح پھڑک گیا شاہ


پنجے سے پلک کے پھول اٹھایا
اندھے نے گل آنکھوں سے لگایا
نور آ گیا چشم آرزو میں
آیا پھر آب رفتہ جو میں


خورشید بصر گہن سے چھوٹا
خیرات کے در کا قفل ٹوٹا
دولت جو پاس تھی، لٹائی
زر بخشا گل کی رونمائی


ایک ایک کو اس قدر دیا زر
محتاج، گدا، ہوئے تو نگر
سجوائے طرب کے کار خانے
بجوائے خوشی کے شادیانے


پہنچنا بکاولی کا دارالخلافت زین الملوک میں اور وزیر ہو کر تاج الملوک کی تلاش میں رہنا
گل چیں کا جو اب پتا ملا ہے
یو شاخ قلم سے گل کھلا ہے
وہ باد چمن چمن خراماں


یعنی وہ بکاولی پریشاں
گلشن سے جو خاک اڑاتی آئی
اس شہر میں آتی آتی آئی
دیکھا تو خوشی کے چہچہے تھے


گل چیں کے شگوفے کھل رہے تھے
گلبانگ زناں تھا، جو جہاں تھا
ایک ایک، ہزار داستاں تھا
پاتے ہی پتا، خوشی سے پھولی


شاد ایسی ہوئی کہ رنج بھولی
جادو سے بنی وہ آدمی زاد
انسانوں میں آ ملی پری زاد
سلطاں کی سواری آرہی تھی


صورت جو نگاہ کی، پری تھی
پوچھا: اے آدم پری رو!
انساں ہے، پری ہے، کون ہے تو؟
کیا نام ہے اور وطن کدھر ہے؟


ہے کون سا گل، چمن کدھر ہے؟
دی اس نے دعا، کہا بہ صد سوز
فرخ ہو شہا! میں ابن فیروز
گل ہوں، تو کوئی چمن بتاؤں!


غربت زدہ کیا وطن بتاؤں!
گھر بار سے کیا فقیر کو کام
کیا لیجیے چھوڑے گاؤں کا نام
پوچھا کہ سبب؟ کہا کہ قسمت


پوچھا کہ طلب؟ کہا: قناعت
باتوں پہ فدا ہوا شہنشاہ
لایا بہ صد امتیاز ہمراہ
چہرے سے امیرزادہ پایا


گھر لا کے، وزیر اسے بنایا
نذریں لیے بندگان درگاہ
دستور سے آملے بہ صد جاہ
دربار میں چاروں شاہ زادے


دیکھے، تو کھلے وہ دل کے سادے
چاہا، گل چیں کا امتحاں لے
پوچھا کہ نگیں جو لے، کہاں لے؟
بتلانے لگے وہ چاروں ناداں


کوئی یمن اور کوئی بدخشاں
جانا کہ جو گل یہ لائے ہوتے
خاتم کے نگیں بتائے ہوتے
تجویز میں تھا یہ صاحب فکر


آیا تاج الملوک کا ذکر
نقش اس کو ہوا کہ بس وہی ہے
ان سادوں سے کندہ کب ہوئی ہے
ظاہر نہ کیا بطون اپنا


طالع سے لیا شگون اپنا
منزل گہ رہ رواں بنا کے
شام و سحر اس میں آپ آکے
رہ رو کو دیا بہ لطف و اکرام


آتے آرام، جاتے پیغام
آباد ہونا تاج الملوک کا گلشن نگاریں بنوا کے اور شہرہ ہونا
تعمیر مکاں کے ہیں جو آثار
یوں خامہ ہے بہر بیت، معمار


شہ زادہ کہ عازم وطن تھا
گل پانے سے خوش چمن چمن تھا
اندھے کو کیا جب اس نے بینا
اور داغیوں نے وہ پھول چھینا


سوچا کہ خوشی خدا کی، غم کھاؤ
حمالہ دیونی کو بلواؤ
نقل ارم ایک مکاں بنا کے
رکھوں پریوں کو اپنی لاکے


بال آگ پہ رکھتے، آندھی آئی
وہ دیونی بال باندھی آئی
تنہا اسے دیکھ کر کہا: ہیں!
محمودہ کیا ہوئیں؟ کہا: ہیں


دریا پہ ہوں ان کو چھوڑ آیا
مسکن کے لیے تمھیں بلایا
لیکن وہ مکاں، وہ حوض، وہ باغ
جو باغ بکاولی کو دے داغ


حمالہ نے دیووں کو کیا یاد
آئے تو کہا: یہ بن، ہو آباد
ویرانے کو گل زمیں بناؤ
گلزار جو اہریں بناؤ


صناع طلسم کار تھے وہ
گلشن کے لیے بہار تھے وہ
دیووں نے ادھر محل بنایا
کشتی سے وہ دخت رز کو لایا


حمالہ اس کی مادر پیر
محمودہ سے ہوئی بغل گیر
کچھ دیووں کو چھوڑ کر وہیں پر
رخصت ہو کر چلی گئی گھر


گلشن میں سمن بڑوں کو لایا
نسریں بدنوں سے گھر بسایا
دونوں کو محل میں لا کے رکھا
پھل نخل مواصلت کا چکھا


دیووں کو کہا کہ بہر تمکیں
آباد ہو گلشن نگاریں
دیو، آدمی بن کے بن میں آئے
آتے جاتے کو گھیر لائے


جو سن کے خبر، گیا ادھر کو
جنت سے وہ پھر پھرا نہ گھر کو
ازبس کہ قریب شہر تھا باغ
خورشید افق نظر پڑا باغ


مفلس، زردار، امیر، قلاش
نوکر، تاجر، فقیر، خوش باش
گھر چھوڑ کے چل بسے سب انساں
پھر تن میں نہ آئے صورت جاں


ملاقات ٹھہرنی زین الملوک اور تاج الملوک کی آپس میں
گلشن جو بنا جواہر آگیں
یوں صفحہ قلم سے ہے نگاریں
ساعد نام ایک مہ لقا تھا


دلبر کا غالام با وفا تھا
صحرا سے جو سیر کر کے آیا
لکڑی کے چکا کے بو جھ لایا
دلوائے ہر ایک کو پے قوت


الماس و عقیق و لعل و یاقوت
تھی بس کہ وہ جا خلاصہ دہر
کچھ ٹھہرے، کچھ آئے جانب شہر
کف میں جو وہ لعل بے بہا تھے


من پاتے ہی، لوگ اژدہا تھے
شحنے نے سنا، پکڑ بلایا
لے کر اظہار، ساتھ آیا
دیکھا تو وہ جلوہ گاہ امید


اک دائرہ تھا بہ رنگ خورشید
دروازے پہ دیووں کا تھا پہرا
بھجوا کے خبر، وہ شحنہ ٹھہرا
جب واں سے طلب ہوا، تو درباں


لائے اسے پیشگاہ سلطاں
آداب کیا، ادب سے ٹھہرا
ہیبت زدہ دور سب سے ٹھہرا
ان لوگوں کو لے گیا تھا ہمراہ


معروض کیا کہ یا شہنشاہ!
کم مایہ یہ لوگ ہیں بہ ظاہر
چوری کے تو یہ نہیں جواہر
ساعد نے کہا کہ ہے یہ حاسد


نیت ہوئی ہوگی اس کی فاسد
حضرت! یہ وہی تو تبردار
جا، ان سے نہ بولیو، خبردار!
پھر کر انھی پاؤں شحنہ بے آس


آیا زین الملوک کے پاس
کی عرض کہ باغ اک بنا ہے
یہ شہر اجڑا ہے، وہ بسا ہے
جو کوئی ہے اس جگہ پہ جاتا


ڈھیروں ہے جواہرات پاتا
حضرت نے کہا کہ بک نہ خیرہ
قاروں کا وہیں ہے کیا ذخیرہ!
فرخ کہ وزیر باخرد تھا


سلطاں مشیر نیک و بد تھا
بولا کہ شہا! یہ بات کیا ہے
نیرنگ و فسوں کا گھر بڑا ہے
ہر چند کہ طرفہ حال ہے یہ


کچھ دور نہیں، مثال ہے یہ
حکایت ایک عورت کے مرد بن جانے کی دیو کے جادو سے
اک ملک میں ایک صاحب فوج
رکھتا تھا محل میں بارور زوج


تھا داغ پسر مقدر اس کو
جننی تھی ہمیشہ دختر اس کو
از بس کہ وہ شاہ تھا بد اختر
کرتا تھا حسد سے قتل دختر


اک بار محل میں پھر حمل تھا
وہ شاہ کہ ظلم میں مثل تھا
کھا بیٹھا قسم کہ اب کی باری
بیٹا جو نہ دے جناب باری


اقبال کا کچھ نہ جانے اوج
کر ڈالیے ذبح دختر و زوج
کنیا تھی غرض کہ راس اس کی
پوری نہ ہوئی وہ آس اس کی


سلطاں کا جو عہد بے خلل تھا
گھر والوں کو خوف کا محل تھا
ملحوظ بہ دل تھا پردہ راز
سیارہ شناسوں سے کیا ساز


ہر چند ستارہ مال کا تھا ماند
تھی چاندنی، شہرہ کر دیا چان
بیٹے کا وہ زائچہ بنا کے
گویا ہوئے دست بستہ آ کے


حضرت! یہ پسر ہے نیک اختر
بدیمن مگر ہے ایک اختر
جب تک نہ چلے یہ اپنے پاؤں
حضرت نہ پسر کے سامنے ہوں


حلیہ کر کے چھپا کے یک چند
بے تاب ہوا جب آرزومند
وہ گندم جو نما تھی بالی
مردانہ لباس سے نکالی


خوش ہو کے پدر نے بہر شادی
ٹھہرائی کہیں کی شاہ زادی
بن ٹھن کے عروس شک داماد
شادی کو چلی بہ جان ناشاد


اک شب کسی دشت میں تھے ڈیرے
اور روز نکاح تھا سویرے
خیمے سے وہ بے قرار نکلی
اس چھالے سے مثل خار نکلی


دیکھا تو اندھیری رات سنسان
اک عالم ہو ہے اور بیابان
ایک دیو وہاں پہ گشت میں تھا
جویاے شکار دشت میں تھا


دیکھا تو کہا: خضر ملے، آؤ
منہ کھولو، عدم کی راہ بتلاؤ
بولا وہ کہ سن تو آدمی زاد!
کیوں تنگ ہے جی سے، کیا ہے بیداد؟


اے مرد خدا! خدا کی سوگند
کہہ، جس لیے تو ہے آرزو مند
بولی وہ کہ یہ خیال، ہے خام
خنجر کا ہو کیا نیام سے کام


کہہ کر کھلے بندوں جی کی تنگی
بے ننگ، ہوئی وہ شوخ، ننگی
آنکھیں جھپکا کے دیو بولا
تو کیا کھلی، پردہ تو نے کھولا


خاطر تری، لے طلسم دکھلاؤں
تو مجھ سی بنے، میں تجھ سا بن جاؤں
موند آنکھ کہا، تو موند لی آنکھ
کھول آنکھ کہا، تو کھول دی آنکھ


پائے مردانگی کے پر تو
دامن میں سے دی چراغ نے لو
تھا لے میں یہاں اگا صنوبر
واں شیشہ، رہا ترش کے، ساغر


اب یاں سے ہے قصہ مختصر طول
فرخ کہ وہ تھا وزیر معقول
بولا کہ شہا! جو یہ ہوا ہے
اس بات کا پھر وجود کیا ہے


شہ نے کہا: سن وزیر دانا
بے دیکھے، سنے کو کس نے مانا
یاد آئی مجھے بھی اک روایت
یہ کہہ کے، بیان کی حکایت


حکایت نصیحت گری مرغ اسیر و نافہمی صیاد کی
اک مرغ ہوا اسیر صیاد
دانا تھا وہ طاہر چمن زاد
بولا جب اس نے باندھے بازو


کھلتا نہیں کس طمع پہ ہے تو
بیجا، تو ٹکے کا جانور ہوں
گر ذبح کیا، تو مشت پر ہوں
پالا، تو مفارقت ہے انجام


دانا ہو، تو مجھ سے لے مرے دام
بازو میں نہ تو مرے گرہ باندھ
سمجھاؤں جو پند، اسے گرہ باندھ
سن، کوئی ہزار کچھ سنائے


کیجے وہی جو سمجھ میں آئے
قابو ہو، تو کیجئے نہ غفلت
عاجز ہو، تو ہاریے نہ ہمت
آتا ہو، تو ہاتھ سے نہ دیجے


جاتا ہو، تو اس کا غم نہ کیجے
طائر کے یہ سن کلام، صیاد
بن داموں ہوا غلام صیاد
بازو کے جو بند کھول ڈالے


طائر نے تڑپ کے پر نکالے
اک شاخ پہ جا، چہک کے بولا
کیوں، پر مرا کیا سمجھ کے کھولا؟
ہمت نے مری، تجھے اڑایا


غفلت نے تری، مجھے چھڑایا
دولت نہ نصیب میں تھی تیرے
تھا لعل نہاں شگم میں میرے
دے کر صیاد نے دلاسا


چاہا، پھر کچھ لگائے لاسا
بولا وہ کہ دیکھ، کر گیا جعل
طائر بھی کہیں نگلتے ہیں لعل!
ارباب عرض کی بات سن کر


کر لیجیے یک بہ یک نہ باور
فرخ! یہ وہی مثل نہ ہوئے!
دیکھ آ، جو تجھے دہل نہ ہوئے
مشتاق تو تھا، چلا وہ دستور


دکھلائی دیا وہ بقعہ نور
نقشے میں وہ گلشن نگاریں
گلزار ارم سے تھا خوش آئیں
حیرت تھی کہ یہ طلسم کیا ہے!


پردیس میں ہوں کہ گھر مرا ہے!
اس سوچ میں تخت گہ تک آیا
حیراں وہ وزیر، شہ تک آیا
آداب اک کر کے حسب دستور


ٹھہرا، تو وہ بادشاہ مستور
سمجھا کہ حسین آدمی ہے
کیا جانے کہ خود بکاولی ہے
پوچھا کہ کدھر سے آئے، کیا نام؟


بولا وہ کہ نام سے ہے کیا کام
انسان ہوں، بندہ خدا ہوں
بھیجا زین الملوک کا ہوں
گستاخی معاف، آپ آئے


بن گھیر لیا، مکاں بنائے
بہکا کے بسائے مردم شہر
حضرت کا بڑا ہے آپ پر قہر
دعویٰ یہ ہے، یاں زمیں دابی


آبادی میں آئی ہے خرابی
خیر، اب بھی رفع شر جو چاہو
سر آنکھوں سے چل کے جبہہ سا ہو
بولا وہ کہ فتنہ گر نہیں ہم


شرجن سے ہو، وہ بشر نہیں ہم
درویشی میں دل کے بادشا ہیں
مسند کے تکیے پر گدا ہیں
دستور کہ عرض کر چکا تھا


مثل دل بد گماں رکا تھا
بولا: چلو صلح درمیاں ہو
باہم مہ و مہر کا قراں ہو
بولا وہ: فقیر کی بلا جائے


مشتاق جو ہو، وہ شوق سے آئے
بولا وہ کہ خیر، تابہ فردا
اٹھ جائے گا درمیاں سے پردا
یہ کہہ کے پھرا وزیر، آیا


پہنچا تو وہ شہر خالی پایا
شہ زادہ و شہ محل میں تھے واں
بر ہم زدہ بزم کے چراغاں
شہ نے جو وزیر آتے دیکھا


فرخ، فرخ پکار اٹھا
سلطاں کے نثار ہو کے دستور
بولا کہ بلاے شاہ ہو دور!
دیکھ آیا میں وہ مکان یاقوت


ہے معدن لعل و کان یاقوت
تختہ ہے زمردیں کہ مینو!
گلشن ہے جواہریں کہ جادو!
نقشہ کہوں کیا، نگار خانہ!


جادو کا تمام کار خانہ!
دیووں کی بنائی ہے وہ بنیاد
رہنے والے ہیں آدمی زاد
واں صاحب تاج و تخت جو ہے


درویش ہے، شاہ نام کو ہے
دیو اس کے عمل میں آگئے ہیں
جادو کے محل بنا گئے ہیں
کل آپ بھی چل کے کیجئے سیر


وعدہ کر آیا ہوں، کہا: خیر
بھید کھلنا چھپے ہوؤں کا ایک ایک پر
اب خامے سے وا شگاف یوں ہے
دل ملنے کی راہ صاف یوں ہے


فرخ جو گیا، تو شاہ زادہ
سوچا کہ ہوں ٹھاٹھ کل زیادہ
رکھا آتش پہ دوسرا بال
حاضر ہوئی دیونی قوی بال


دعوت کی اسے خبر سنائی
دیووں کے رخ اس نے آنکھ اٹھائی
ہم چشموں نے چتون اس کی تاڑی
پلکوں سے زمین بن کی جھاڑی


غولوں سے بھرا جو تھا بیاباں
پھولوں سے بنا دیا خیاباں
صناعی انھوں نے رات بھر کی
مشتاق نے واں وہ شب سحر کی


بجتے ہی گجر وہ شاہ ذی جاہ
چاروں شہ زادے لے کے ہمراہ
جو جو امرا تھے، سب بلا کے
فرخ کو خواصی میں بٹھا کے


مشرق سے رواں ہوا دلاور
جس طرح افق سے شاہ خاور
بجلی سے جو زرق برق آئے
فرش، ابر کی طرح بچھتے پائے


دیکھا تو تمام دشت گلزار
دائیں بائیں دورستہ بازار
شہ کہتے تھے: دشت پر خسک تھا
فرخ کہتا تھا: کل تلک تھا


غافل تھے کہ سبز باغ ہے یہ
اپنے ہی جگر کا داغ ہے یہ
تجویز رہے تھے سب کے سب دنگ
جادو، افسوں، طلسم، نیرنگ


کیا لشکر اور کیا شہنشاہ
سناٹے میں تھے کہ اللہ اللہ!
دیکھے جو جواہرات کے ڈھیر
سب من کی ہوس سے ہو گئے سیر


شہ زادے نے آمد ان کی پائی
کی تادر خانہ پیشوائی
دونوں میں ہوئیں جو چار آنکھیں
دولت کی کھلی ہزار آنکھیں


ایوان جواہریں میں آئے
الماس کی شبہ نشیں میں آئے
وہ چتر کے زیر سایہ بیٹھے
افسر سب پایہ پایہ بیٹھے


جو جو کہ تو اضعات ہیں عام
لے آئے خواص نازک اندام
چکنی ڈلی، عطر، الائچی، پان
نقل و مے و جام و خوان انوان


رغبت سے انہیں کھلا پلا کے
بولا شہ زادہ مسکرا کے
اس تاج شہی میں کے نگیں ہیں؟
کے نام و نشان دل نشیں ہیں؟


سلطاں نے کہا بہ صد لطافت
یہ چار ہیں عنصر خلافت
ایک اور ہوا تھا قابل خشم
وہ نور بصر، تھا دشمن چشم


جب لائے یہ گل بکاولی کا
نکلا تب خار روشنی کا
پوچھا اس نے: وہ اب کدھر ہے؟
سلطاں نے کہا کہ کیا خبر ہے!


ایک ان میں سے چشم آشنا تھا
کو کہ اسی شاہ زادے کا تھا
بولا کہ حضور ادھر تو دیکھیں
دیکھا، تو کہا: مری نظر میں


صورت وہی، رنگ رو وہی ہے
لہجہ وہی، گفتگو وہی ہے
یہ سنتے ہی، اس نے خندہ کر کے
سر، پاؤں پہ رکھ دیا پدر کے


سر، قدموں سے شاہ نے اٹھایا
فرزند کو چھاتی سے لگایا
لے لے کے بلائیں کاکلوں کی
پیشانی چومی، پیٹھ ٹھونکی


عرض اس نے کیا کہ دو پرستار
پا بوسی شہ کی ہیں طلب گار
حضرت نے کہا: بلائیے خیر
اٹھ جائیں، جو بیٹھے ہوں یہاں غیر


شہ زادے نے اک مکاں بتایا
ایک ایک اٹھا، ادھر کو آیا
سب اٹھ گئے، پر وہ چاروں باغی
بیٹھے رہے فرش گل پہ داغی


شہ زادہ اٹھا، محل میں آیا
پردے تلک ان کو ساتھ لایا
دلبر سے کہا: میں جب کہوں، آؤ
تو کہیو، یہ چاروں داغی اٹھواؤ


درپردہ سکھا کے، باہر آیا
بے پردہ حضور شہ بلایا
دلبر نے کہا: لجاؤں گی میں
قربان گئی، نہ آؤں گی میں


اٹھ جائیں یہ چاروں سست بنیاد
داغے ہوئے ہیں غلام، آزاد
چاروں کا، جو سنتے ہی، اڑا رنگ
یک بار گی شاہ ہوگیا دنگ


دکھلائی دیے جو بیٹے بے رخ
دیکھا تاج الملوک کے رخ
یاں دل پہ تھے داغ، واں سریں پر
یاں نام پہ حرف، واں نگیں پر


وہ جعل، وہ ہار، وہ غلامی
وہ گھات، وہ جیتنا تمامی
وہ دسترس اور وہ پائے مردی
وہ بے کسی اور وہ دشت گردی


وہ دیو کی بھوک اور وہ تقریر
وہ حلوے کی چاٹ اور وہ تحریر
وہ سعی، وہ دیونی کی صحبت
محمودہ کی وہ آدمیت


تجویز کے وہ سرنگ کی راہ
اور موش دوانیاں وہ دل خواہ
وہ سیر چمن، وہ پھول لینا
وہ عزم وطن، وہ داغ دینا


وہ کور کے حق میں خضر ہونا
وہ غولوں سے مل کے پھول کھونا
وہ بال کو آگ کا دکھانا
وعدے پہ وہ دیونی کا آنا


وہ نزہت گلشن نگاریں
وہ دعوت بادشا، وہ تمکیں
گزرا تھا جو کچھ، بیاں کیا سب
پنہاں تھا جو کچھ، عیاں کیا سب


انگشتری پری دکھا کر
کھلوئی سریں کی مہر محضر
پہلے تو بہت وہ منہ چڑھے ڈھیٹھ
آخر داغی دکھا گئے پیٹھ


اٹھوا کے انہیں، وہ دو خوشی آئیں
پا بوسی شہ کو سر سے آئیں
حضرت نے سمجھ کے حسن خدمت
دونوں کو دیے خطاب و خلعت


نذریں ان دونوں نے دکھائیں
رخصت ہو کر محل میں آئیں
مسند سے شہ اٹھ کے بے محابا
بولا بیٹے سے: جان بابا!


روشن کیا دیدہ ٔپدر کو
مادر کے بھی چل کے آنسو پوچھو
مشتاق کو روبہ راہ پایا
ہمراہ اسے تابہ خانہ لایا


ماں نے دیکھا جو وہ دلاور
اشکوں کے گہر کیے نچھاور
وہ طفل بھی گر پڑا قدم پر
مانند سر شک چشم مادر


ہر خویش ویگانہ سے ملا وہ
پھر اپنی جگہ پہ آگیا وہ
غائب ہو جانا فرخ یعنی بکاولی کا اور بلوانا تاج الملوک
کو گلشن نگاریں سے اور متفق ہو کر گلزار ارم میں رہنا


کھلنے پہ جو ہے طلسم تقدیر
اب خامے نے یو کیا ہے تحریر
فرخ، وہ بادشا کا دستور
یعنی وہ بکاولی مستور


مطلوب کا سن سمجھ کے سب حال
چاہی کہ نکالے کچھ پر وبال
سوچی کو دلا! شتاب کیا ہے
پھر سمجھیں گے، اضطراب کیا ہے


اس وضع کا پاس کر گئی وہ
تغیر لباس کر گئی وہ
فرخ کہنے تک آدمی تھی
پھر وہ ہی بکاولی پری تھی


غربت سے چلی، وطن میں آئی
صحرا سے اڑی، چمن میں آئی
پژ مردہ خواصوں پڑی جان
صدقے ہوئی کوئی، کوئی قربان


اس غنچے میں اک سمن پری تھی
وہ ہم نفس بکاولی تھی
بولی: کہو کیا کیا، کہا: خوب
بے کچھ کیے پھر بھی آئی، کیا خوب!


مانگا کاغذ، دوات، خامہ
لکھا گل چیں کے نام نامہ
اے یوسف چشم زخم یعقوب!
وے رشک برادران منکوب!


اے دل بر دلبرد غل باز!
وے دیو سوار عرش پرواز!
اے آب تہ زمین نیرنگ!
وے نقب دوان باغ گل رنگ!


اے پردہ کشاے بے حجابی!
وے دزد حناے دست یابی!
اے رہ رو رو بہ رہ نہادہ!
وے صر صر گل بہ باد دادہ!


اے بے سر و برگ گلشن آرا!
وے لعل نماے سنگ خارا!
اے بے خبر طلسم صورت!
وے بے بصر رخ ضرورت!


اے باعث عزم میہمانی!
وے صاحب بزم میزبانی!
اے آئنہ دار خود نمائی!
وے سرمہ چشم آشنائی!


اے پردہ کشاے روے پنہاں!
وے داغ نماے پشت اخواں!
تو باغ ارم سے لے گیا گل
تو مجھ سی پری کو دے گیا جل


بے رخ ترے واسطے ہوئی میں
فرخ ترے واسطے ہوئی میں
تجھ کو ترے باپ سے ملایا
مجھ کو یہ ملا کہ تجھ کو پایا


جو جو اسرار تھے نہانی
سب تجھ سے سنے تری زبانی
کیا لطف جو غیر پردہ کھولے
جادو ہو جو سر پہ چڑھ کے بولے


چاہا تھا، کروں سرے سے پامال
کر شکر، سمجھ کہ تھا خوش اقبال
کیا کہیے کہ صورت اور کچھ تھی
وقت اور، ضرورت اور کچھ تھی


اب تک ہیں وہ خارجی کے جی میں
جلد آ کہ ہے مصلحت اسی میں
آئے گا، تو در گذر کروں گی
ورنہ میں بہت ساشر کروں گی


داغوں پہ دیے ہیں داغ تو نے
دکھلائے ہیں سبز باغ تو نے
کانٹوں میں اگر نہ ہو الجھنا
تھوڑا لکھا بہت سمجھنا


پھر خط کی نہ ہو امیدواری
القط ہے قلم کی دوست واری
یہ لکھ کے، کہا سمن پری کو
چالاک ہے تو ہی قاصدی کو


یہ خط، یہ انگوٹھی لے، ابھی جا
پورب کی سمت کو چلی جا
رستے میں ہے گلشن نگاریں
رہتا ہے وہیں مرا وہ گل چیں


خاتم کے نشاں سے نامہ دیجو
ٹھہری رہیو، جواب لیجو
خط، خاتم لے کے وہ ہوائی
پتا ہوئی اور پتے پہ آئی


وہ باغ کہ تھا جواہر آگیں
ثابت ہوا گلشن نگاریں
وہ آدم حوروش، پری رو
یعنی تاج الملوک خوش خو


گل گشت میں تھا کسی روش پر
محمودہ دائیں، بائیں دلبر
قاصد نے جو رخ پری دکھایا
دھیان اس کو بکاولی کا آیا


پہچانتے ہی نگین خاتم
بے شبہ ہوا یقیں کا عالم
پر تو پہ وہ یوں چلا تڑپ کے
انگارے پہ جیسے کبک لپکے


دھوکا تھا فقط بکاولی کا
قاصد نے دیا وہ خط پری کا
گو سرمہ خموشی نے کھلایا
تحریر کو آنکھوں سے لگایا


قاصد سے کلام لطف بولا
خط صورت چشم شوق کھولا
وہ نامہ کہ عنبریں رقم تھا
قسمت کا نوشتہ یک قلم تھا


تحریر تھی سر گذشت ساری
کچھ یاس تھی، کچھ امیدواری
منگوا کے وہیں دوات و خامہ
تحریر کیا جواب نامہ


اے شاہ ارم کی دخت گل فام!
فرخ لقب و بکاولی نام
اس نام کے، اس لقب کے صدقے
اس نامے کے، اس طلب کے صدقے


میں نے جو غرض سے جی چرایا
تو نے کیوں آ کے منہ چھپایا؟
میری جو بدی ہوئی تھی کچھ یوں
تو نیک ہے، بے ملے گئی کیوں؟


تو جائے، تو کیوں نہ آئے افسوس
افسوس، افسوس، ہاے افسوس!
تقدیر پھری، پھری نہیں تو،
امید گئی، گئی نہیں تو


اے کاش! میں کچھ بھی سانس پاتا
جی کھول کے داغ دل دکھاتا
معلوم تو ہے کہ شوق کیا تھا
جو کھینچ کے یاں سے لے گیا تھا


اب مجھ میں وہ دم اجی کہاں ہے
وہ دل، وہ جگر، وہ جی کہاں ہے
مر جاؤں اگر طلب میں تیری
میں کیا، کہ خبر نہ پہنچے میری


قابل واں آنے کے کہاں ہوں
یاں بھی جو رہا، تو نیم جاں ہوں
تجھ سے میری خاطر اب کہاں جمع
تو نشتر شعلہ، میں رگ شمع


تو برق دماں، میں خرمن خار
تو سیل رواں، میں خستہ دیوار
تو جوشش یم، میں مور بے پر
میں نقش قدم، تو باد صرصر


دھڑکا ہے یہی، تو جان دوں گا
مرجاؤں گا، اب نہ میں جیوں گا
ہو تجھ سی پری جو خصم جانی
انساں کی ہے مرگ، زندگانی


منظور جو ہو حیات میری
تو مان لے ایک بات میری
حمالہ کو بھیج، آ کے لے جائے
شاید مجھے زندہ پا کے پہنچائے


بھیجا نہ اسے، تو جان لینا
آسان ہے یاں بھی جان دینا
یہ لکھ کے، جو خط سے ہاتھ اٹھایا
قاصد نے لیا جو اب، لایا


مطلوب کا خط وہ پڑھ رہی تھی
دیکھا تو وہ دیونی کھڑی تھی
پوچھا کہ اری! تجھے خبر ہے
گل چیں مرا کون سا بشر ہے؟


وہ صدقے ہوئی، کہا: بلا لوں
بے دیکھے کسی کا نام کیا لوں!
یہ سن کے، وہ شعلہ، ہو بھبوکا
بولی کہ تجھے لگاؤں لوکا


تیرا ہی تو ہے فساد مردار!
داماد کو گل دیا، مجھے خار
گل نقب کی راہ لے گیا چور
زندہ کروں اس موئے کو درگور


حمالہ! جلی ہوں، کیا کہوں میں
داماد کو لا، تو ٹھنڈی ہوں میں
آگاہی جو دیونی نے پائی
بگڑی ہوئی بات یوں بنائی


محمودہ ہے کنیز زادی
انساں سے ہوئی ہے اس کی شا

کروں پہلے توحید یزداں رقم
جھکا جس کے سجدے کو اول قلم
سر لوح پر رکھ بیاض جبیں
کہا: دوسرا کوئی تجھ سا نہیں


قلم پھر شہادت کی انگلی اٹھا
ہوا حرف زن یوں کہ: رب العلا!
نہیں کوئی تیرا، نہ ہوگا شریک
تری ذات ہے وحدہٗ لا شریک


پرستش کے قابل ہے تواے کریم!
کہ ہے ذات تیری غفور رحیم
رہ حمد میں تیری عزّ و جل!
تجھے سجدہ کرتا چلوں سر کے بل


وہ، الحق کہ ایسا ہی معبود ہے
قلم جو لکھے، اس سے افزود ہے
سبھوں کا وہی دین و ایمان ہے
یے دل ہیں تمام اور وہی جان ہے


تر و تازہ ہے اس سے گلزار خلق
وہ ابر کرم، ہے ہوا دار خلق
اگرچہ وہ بے فکر و غیّور ہے
ولے پرورش سب کی منظور ہے


کسی سے بر آوے نہ کچھ کام جاں
جو وہ مہرباں ہو، تو گل مہرباں
اگرچہ یہاں کیا ہے اور کیا نہیں
پر، اس بن تو کوئی کسی کا نہیں


موئے پر نہیں اس سے رفت و گزشت
اسی کی طرف سب کی ہے بازگشت
رہا کون اور کس کی بابت رہی
موئے اور جیتے وہی ہے وہی


نہاں سب میں، اور سب میں ہے آشکار
یہ سب اس کے عالم ہیں ہژدہ ہزار
ڈرے سب ہیں اس سے، وہی سب سے پیش
ہمیشہ سے ہے اور رہے گا ہمیش


چمن میں، ہے وحدت کے، یکتا وہ گل
کہ مشتاق ہیں اس کے سب جز و کُل
اسی سے ہے کعبہ، اسی سے کنشت
اسی کا ہے دوزخ، اسی کا بہشت


جسے چاہے جنت میں دیوے مقام
جسے چاہے دوزخ میں رکھے مدام
وہ ہے مالکُ الملک دنیا و دیں
ہے قبضے میں اس کے زمان و زمیں


سدا بے نمودوں کی اس سے نمود
دل بستگاں کی ہے اس سے کشود
اسی کی نظر سے ہے ہم سب کی دید
اسی کے سخن پر ہے سب کی شنید


وہی نور، ہے سب طرف جلوہ گر
اسی کے یہ ذرے ہیں شمس و قمر
نہیں اس سے خالی غرض کوئی شے
وہ کچھ شے نہیں، پر ہر اک شے میں ہے


نہ گوہر میں ہے وہ، نہ ہے سنگ میں
و لیکن چمکتا ہے ہر اک رنگ میں
وہ ظاہر میں ہر چند ظاہر نہیں
پہ، ظاہر کوئی، اس سے باہر نہیں


تامل سے کیجے اگر غور کچھ
تو سب کچھ وہی ہے، نہیں اور کچھ
اسی گل کی بو سے ہے خوش بو گلاب
پھرے ہے لیے ساتھ دریا، حباب


پر، اس جوش میں آ کے، بہنا نہیں
سمجھنے کی ہے بات، کہنا نہیں
قلم، گو زباں لاوے اپنی ہزار
لکھے کس طرح حمد پروردگار


کہ عاجز ہے یاں انبیا کی زباں
زبان قلم کو یہ قدرت کہاں!
اس عہدے سے کوئی بھی نکلا کہیں!
سوا عجز، درپیش یاں کچھ نہیں


وہ معبود یکتا، خدائے جہاں
کہ جس نے کیا ’’کن‘‘ میں کون و مکاں
دیا عقل و ادراک اس نے ہمیں
کیا خاک سے پاک اس نے ہمیں


پیمبر کو بھیجا ہمارے لیے
وصی اور امام اس نے پیدا کیے
جہاں کو انھوں نے دیا انتظام
برائی بھلائی سجھائی تمام


دکھائی انھوں نے ہمیں راہ راست
کہ تا، ہو نہ، اس راہ کی باز خواست
سو وہ کون سی راہ؟ شرع نبی
کہ رستے کو جنت کے سیدھی گئی


نعت حضرت رسالت پناہ کی
نبی کون، یعنی رسول کریم
نبوت کے دریا کا در یتیم
ہوا گو کہ ظاہر میں امی لقب


پہ، علم لدنی کھلا دل پہ سب
بغیر از لکھے، اور کیے بے رقم
چلے حکم پر اس کے لوح و قلم
ہوا علم دیں اس کا جو آشکار


گزشتہ ہوئے حکم، تقویم پار
اٹھا کفر اسلام ظاہر کیا
بتوں کو خدائی سے باہر کیا
کیا حق نے نبیوں کا سردار اسے


بنایا نبوت کا حق دار اسے
نبوت جو کی اس پہ حق نے تمام
لکھا: اشرفُ الناس، خیرُ الانام
بنایا سمجھ بوجھ کر خوب اسے


خدا نے کیا اپنا محبوب اسے
کروں اس کے رتبے کا کیا میں بیاں
کھڑے ہوں جہاں باندھ صف مرسلاں
مسیح اس کی خر گاہ کا پارہ دوز


تجلیٔ طور اس کی مشعل فروز
خلیل اس کے گلزار کا باغباں
سلیماں سے کئی مہر دار اس کے یاں
خضر اس کی سرکار کا آبدار


زرہ ساز داؤد سے دس ہزار
محمد کی مانند جگ میں نہیں
ہوا ہے نہ ایسا، نہ ہو گا کہیں
یہ تھی رمز، جو اس کے سایہ نہ تھا


کہ رنگ دوئی واں تک آیا نہ تھا
نہ ہونے کا سایے کا تھا یہ سبب
ہوا صَرف پوشش میں کعبے کی سب
وہ قد اس لیے تھا نہ سایہ فگن


کہ تھا گل وہ اک معجزے کا بدن
بنا سایہ اس کا لطیف اس قدر
نہ آیا لطافت کے باعث نظر
عجب کیا جو اس گل کا سایہ نہ ہو


کہ تھا وہ، گل قدرت حق کی بو
خوش آیا نہ، سایے کو، ہونا جدا
اسی نور حق کے رہا زیر پا
نہ ڈالی کسی شخص پر اپنی چھانو


کسی کا نہ منہ دیکھا، دیکھ اس کے پانو
وہ ہوتا زمیں گیر کیا فرش پر
قدم اس کے سایے کا تھا عرش پر
نہ ہونے کی سایے کے اک وجہ اور


مجھے خوب سوجھی، پہ ہے شرط غور
جہاں تک کہ تھے یاں کے اہل نظر
سمجھ مایۂ نور، کحلُ البصر
سبھوں نے لیا پتلیوں پر اٹھا


زمیں پر نہ سایے کو گرنے دیا
سیاہی کا پتلی کی ہے یہ سبب
وہی سایہ پھرتا ہے آنکھوں میں اب
وگرنہ یہ تھی چشم اپنی کہاں


اسی سے یہ روشن ہے سارا جہاں
نظر سے جو غائب وہ سایا رہا
ملائک کے دل میں سمایا رہا
نہیں ہمسر اس کا کوئی، جو علی


کہ بھائی کا بھائی، وصی کا وصی
ہوئی جو نبوت نبی پر تمام
ہوئی نعمت اس کے وصی پر تمام
جہاں فیض سے ان کے ہے کام یاب


نبی آفتاب و علی ماہتاب
منقبت حضرت امیرالمومنین کی
علی دین و دنیا کا سردار ہے
کہ مختار کے گھر کا مختار ہے


دیار امامت کے گلشن کا گل
بہار ولایت کا باغ سبل
علی راز دار خدا و نبی
خبردار سر خفی و جلی


علی بندۂ خاص درگاہ حق
علی سالک و رہبر راہ حق
علیّ ولی، ابن عمّ رسول
لقب شاہ مردان و زوج بتول


کہے یوں جو چاہے کوئی بیر سے
پہ نسبت علی کو نہیں غیر سے
خدا نفس پیغبرش خداندہ است
دگر افضلیت بہ کس ماندہ است؟


یہاں بات کی بھی سمائی نہیں
نبی و علی میں جدائی نہیں
نبی و علی، ہر دو نسبت بہم
دُو تا و یکے، چوں زبان قلم


علی کا عدوٗ: دوزخی، دوزخی
علی کا محب: جنتی، جنتی
نبی اور علی، فاطمہ اور حسن
حسین ابن حیدر، یہ ہیں پنج تن


ہوئی ان پہ دو جگ کی خوبی تمام
انہوں پر درود اور انہوں پر سلام
علی سے لگا تا بہ مہدیٔ دیں
یہ ہیں ایک نور خدائے بریں


اُنہوں سے ہے قائم امامت کا گھر
کہ بارہ ستوں ہیں یہ اثنا عشر
صغیرہ، کبیرہ سے یہ پاک ہیں
حساب عمل سے یہ بے باک ہیں


ہوا یاں سے ظاہر کمال رسول
کہ بہتر ہوئی سب سے آل رسول
سلام ان پہ جو ان کے اصحاب ہیں
وہ اصحاب کیسے، کہ احباب ہیں


خدا نے انہوں کو کہا مومنیں
وہ ہیں زینت آسمان و زمیں
خدا ان سے راضی، رسول ان سے خوش
علی ان سے راضی، بتول ان سے خوش


ہوئی فرض ان کی ہمیں دوستی
کہ ہیں دل سے وہ جاں نثار نبی
مناجات
الٰہی! بہ حق رسول امیں


بہ حق علی و بہ اصحاب دیں
بہ حق بتول و بہ آل رسول
کروں عرض جو میں، سو ہوئے قبول
الٰہی! میں بندہ گنہگار ہوں


گناہوں میں اپنے گراں بار ہوں
مجھے بخشیو میرے پروردگار!
کہ ہے تو کریم اور آمرزگار
مری عرض یہ ہے کہ جب تک جیوں


شراب محبت کو تیری پیوں
سوا تیری الفت کے، اور سب ہے ہیچ
یہی ہو، نہ ہو اور کچھ ایچ پیچ
جو غم ہو، تو ہو آل احمد کا غم


سوا اس الم کے نہ ہو کچھ الم
رہے سب طرف سے مرے دل کو چین
بہ حق حسن اور بہ حق حسین
کسی سے نہ کرنی پڑے التجا


تو کر خود بہ خود میری حاجت روا
صحیح اور سالم سدا مجھ کو رکھ
خوشی سے ہمیشہ خدا! مجھ کو رکھ
مری آل اولاد کو شاد رکھ


مرے دوستوں کو تو آباد رکھ
میں کھاتا ہوں جس کا نمک اے کریم!
سدا رحم کر اس پہ تو اے رحیم!
جیوں آبرو اور حرمت کے ساتھ


رہوں میں عزیزوں میں عزت کے ساتھ
بر آویں مرے دین و دنیا کے کام
بہ حق محمد علیہ السلام
تعیریف سخن کی


پلا مجھ کو ساقی! شراب سخن
کہ مفتوح ہو جس سے باب سخن
سخن کی مجھے فکر دن رات ہے
سخن ہی تو ہے، اور کیا بات ہے


سخن کے طلب گار ہیں عقل مند
سخن سے ہے نام نکو یاں بلند
سخن کی کریں قدر مردان کار
سخن، نام ان کا رکھے برقرار


سخن سے وہی شخص رکھتے ہیں کام
جنہیں چاہیے ساتھ نیکی کے نام
سخن سے سلف کی بھلائی رہی
زبان قلم سے بڑائی رہی


کہاں رستم و گیو و افراسیاب
سخن سے رہی یاد یہ نقل خواب
سخن کا صلہ یار دیتے رہے
جواہر سدا مول لیتے رہے


سخن کا سدا گرم بازار ہے
سخن سنج اس کا خریدار ہے
رہے جب تلک داستان سخن
الٰہی! رہے قدردان سخن


مدح شاہ عالم بادشاہ کی
خدیو فلک شاہ عالی گہر
زمیں بوس ہوں جس کے شمس و قمر
جہاں اس کے پرتو سے ہے کام یاب


وہ ہے برج اقلیم میں آفتاب
اسی مہر سے ہے منور یہ ماہ
جہاں ہووے اور ہو جہاں دار شاہ
وہ مہر منور، یہ ماہ منیر


اور اس کا یہ نجم سعادت وزیر
مدح وزیر آصف الدولہ کی
فلک رتبہ نوّاب عالی جناب
کہ ہے آصف الدولہ جس کا خطاب


وزیر جہاں، حاکم عدل و داد
ہے آبادیٔ ملک جس کی مراد
جہاں، عدل سے اس کے آباد ہے
غریبوں، فقیروں کا دل شاد ہے


پھرے بھاگتا مور سے فیل مست
زبردست ظالم، پہ ہے زیردست
کتاں پر کرے مہ اگر بد نظر
تو آدھا ادھر ہووے آدھا ادھر


کسی کا اگر مفت لے زلف دل
تو کھایا کرے پیچ وہ متصل
وہ انصاف سے جو گزرتا نہیں
کسی پر کوئی شخص مرتا نہیں


تو ہو باگ، بکری میں کچھ گفتگو
اگر اس کا چیتا نہ ہووے کبھو
گر آواز سن صید کی، کچھ کہے
تو باز آئے چپّک کہ بہری رہے


پھرے شمع کے گرد گر آ کے چور
صبا کھینچ لے جاوے اس کو بہ زور
نہ لے جب تلک شمع پروانگی
پتنگے کے پر کو نہ چھیڑے کبھی


اگر آپ سے اس پہ وہ آ گرے
تو فانوس میں شمع چھپتی پھرے
گر احیاناً اس کے جلیں بال و پر
تو گل گیر، لے شمع کا کاٹ سر


اسے عدل کی جو طرح یاد ہے
کسے یاد ہے؟ یہ خدا داد ہے
ستم اس کے ہاتھو سے رویا کرے
سدا فتنۂ دہر سویا کرے


گھروں میں فراغت سے سوتے ہیں سب
پڑے گھر میں چور اپنے روتے ہیں سب
وہ ہے باعث امن خرد و کلاں
کہ ہے نام سے اس کے مشق اماں


بیان سخاوت کروں گر رقم
تو در ریز کاغذ پہ ہووے قلم
نظر سے توجہ کی دیکھا جدھر
دیا مثل نرگس اسے سیم و زر


سخاوت یہ ادنیٰ سی ایک اس کی ہے
کہ اک دں دو شالے دیے سات سے
سوا اس کے، ہے اور یہ داستاں
کہ ہو جس پہ قربان حاتم کی جاں


ہوئی کم جو اک بار کچھ برشگال
گرانی سی ہونے لگی ایک سال
غریبوں کا دم سا نکلنے لگا
توکل کا بھی پانو چلنے لگا


وزیرالممالک نے تدبیر کر
خدا کی دیا راہ پر مال و زر
محلے محلے کیا حکم یہ
کہ باڑے کی اس غم کے کھولیں گرہ


یہ چاہا کہ خلقت کسی ڈھب جیے
ٹکے لاکھ لاکھ ایک دن میں دیے
یہ لغزش پڑی ملک میں جو تمام
لیا ہاتھ نے اس کے گرتوں کو تھام


یہ بندہ نوازی، یہ جاں پروری
یہ آئین سرداری و سروری
ہوئے ذات پر اس سخی کی تمام
تکلف ہے آگے سخاوت کا نام


فقیروں کی بھی یاں تلک تو بنی
کہ اک اک یہاں ہو گیا ہے غنی
یہ کیا دخل آواز دے جو گدا
چٹکنے کی گل کے نہ ہووے صدا


قدح لے کے نرگس جو ہووے کھڑی
تو خجلت سے جاوے زمیں میں گڑی
نہ ہو اس کا شامل جو ابر کرم
اثر ابر نیساں سے ہووے عدم


ہر اک کام اس کا: جہاں کی مراد
فلاطوں طبیعت، ارسطو نژاد
جب ایسا وہ پیدا ہوا ہے بشر
تب اس کو دیا ہے یہ کچھ مال و زر


لکھوں گر شجاعت کا اس کی بیاں
قلم ہو مرا رستم داستاں
غضب سے وہ ہاتھ اپنا جس پر اٹھائے
اجل کا طمانچہ قسم اس کی کھائے


کرے جس جگہ زور اس کا نمود
دل آہن کا اس جا پہ ہووے گبود
چلے تیغ گر اس کی زور مصاف
نظر آوے دشمن کا میدان صاف


اگر بے حیائی سے کوئی عدو
ملا دیوے اس تیغ سے منہ کبھو
تو ایسے ہی کھا کر گرے سر کے بل
کہ سر پر کھڑی اس کے رووے اجل


نہ ہو کیونکے وہ تیغ برق غضب
کہ برش کی تشدید، جوہر ہیں سب
لگاوے اگر کوہ پر ایک بار
گزر جائے یوں، جیسے صابن میں تار


ہوئی ہم قسم اس سے تیغ اجل
نکل آئے یہ، گر پڑے وہ اگل
غضب سے، غضب، اس کے کانپا کرے
تہور بھی ہیبت سے اس کی ڈرے


اور اس زور پر ہے یہ علم و حیا
کہ ہے خلق کا جیسے دریا بہا
جہاں تک کہ ہیں علم و نسب و کمال
ہر اک فن میں ماہر ہے وہ خوش خصال


سخن داں، سخن سنج، شیریں زباں
وزیر جہان و وحید زماں
سخن کی نہیں اس سے پوشیدہ بات
غوامض ہیں سب سہل اس کے نکات


سلیقہ ہر اک فن میں، ہر بات میں
نکلتی نئی بات دن رات میں
سدا سیر پر اور تماشے پہ دل
کشادہ دلی اور خوشی متصل


نہ ہو اس کو کیوں کر ہواے شکار
تہور شعاروں کا ہے یہ شعار
دلیروں کے تئیں، ہے دلیروں سے کام
کہ رہتا ہے شیروں کو شیروں سے کام


شہاں را ضروراست مشق شکار
کہ آید پئے صید دل ہا بہ کار
کھلے، بند جتنے ہیں صحرا میں صید
ہیں نواب کے دام الفت میں قید


زمہرش دل آہواں سوختہ
بہ فتراک او چشمہا دوختہ
شجاعت کا، ہمت کا یہ، کام ہے
درم ہاتھ میں ہے کہ یا دام ہے


نہ ہوتا اگر اس کو عزم شکار
درندوں سے بچتا نہ شہر و دیار
نہ بچتے جہاں بیچ خرد و بزرگ
یہ ہو جاتے سب لقمۂ شیر و گرگ


یہ انسان پر اس کا احسان ہے
کہ بے خوف انسان کی جان ہے
بنائی جہاں اس نے نخچیر گاہ
رہے صید واں آکے شام و پگاہ


رکھا صید بحری پہ جس دم خیال
لیا پشت پر اپنی ماہی نے جال
مگر اپنا دیتے ہیں جی جان کر
کہ ٹاپو پہ گرتے ہیں آن آن کر


نہ سمجھو نکلتے ہیں دریا میں سوس
خوشی سے اچھلتے ہیں دریا میں سوس
چرندوں کا دل اس طرف ہے لگا
پرندوں کو رہتی ہے اس کی ہوا


پلنگوں کا ہے بلکہ چیتا یہی
کمر آ بندھاوے ہماری وہی
کھڑے اَرنے ہوتے ہیں سر جوڑ جوڑ
کہ جی کون دیتا ہے بد بد کے ہوڑ


خبر اس کی سن کر نہ گینڈا چلے
کہ ہاتھی بھی ہو مست، اینڈا چلے
جو کچھ دل میں گینڈے کے آوے خیال
تو بھاگے اس آگے سپر اپنی ڈال


اطاعت کے حلقے سے بھاگے جو فیل
پلک، اس کی آنکھوں میں، ہو تفتہ میل
سو وہ تو اطاعت میں یک دست ہیں
نشے میں محبت کے سب مست ہیں


اسی کے لیے گو کہ ہیں وے پہاڑ
قدم اپنے رکھتے ہیں سب گاڑ گاڑ
کہ شاید مشرف سواری سے ہوں
سر افراز چل کر عماری سے ہوں


چلن جب یہ کچھ ہوویں حیوان کے
تو پھر حق بہ جانب ہے انسان کے
کسے ہو نہ صحبت کی اس کی ہوس
ولے کیا کرے، جو نہ ہو دسترس


فلک بار گاہا، ملک در گہا!
جدا میں جو قدموں سے تیرے رہا
نہ کچھ عقل نے اور نہ تدبیر نے
رکھا مجھ کو محروم تقدیر نے


پراب عقل نے میرے کھولے ہیں گوش
دیا ہے مدد سے تری مجھ کو ہوش
سو میں، اک کہانی بنا کر نئی
در فکر سے گوندھ لڑیاں کئی


لے آیا ہوں خدمت میں بہر نیاز
یہ امید ہے پھر، کہ ہوں سرفراز
مرے عذر تقصیر ہوویں قبول
بہ حق علی و بہ آل رسول


رہے جاہ و حشمت یہ تیری مدام
بہ حق محمد، علیہ السلام
رہیں شاد و آباد کل خیر خواہ
پھریں اس گھرانے کے دشمن تباہ


اب آگے کہانی کی ہے داستاں
ذرا سنیو دل دے کے اس کا بیاں
آغاز داستاں
کسی شہر میں تھا کوئی بادشاہ


کہ تھا وہ شہنشاہ گیتی پناہ
ملک خو، ملک شاہ رکھتا تھا نام
فلک پر مہ و مہر اس کے غلام
بہت حشمت و جاہ و مال و منال


بہت فوج سے اپنی فرخندہ حال
کئی بادشاہ اس کو دیتے تھے باج
خطا اور ختن سے وہ لیتا خراج
کوئی دیکھتا آ کے جب اس کی فوج


تو کہتا کہ: ہے بحر ہستی کی موج
طویلے کے اس کے جو ادنی تھے خر
انھیں نعل بندی میں ملتا تھا زر
جہاں تک کہ سرکش تھے اطراف کے


وہ اس شہ کے رہتے تھے قدموں لگے
رعیت تھی آسودہ و بے خطر
نہ غم مفلسی کا، نہ چوری کا ڈر
عجب شہر تھا اس کا مینو سواد


کہ قدرت خدائی کی آتی تھی یاد
لگے تھے ہر اک جا پہ وہاں سنگ و خشت
ہر اک کوچہ اس کا، تھا رشک بہشت
زمیں سبز و سیراب عالم تمام


نظر کو طراوت وہاں صبح و شام
کہیں چاہ و منبع، کہیں حوض و نہر
ہر اک جا پہ آب لطافت کی لہر
عمارت تھی گچ کی وہاں پیش تر


کہ گزرے صفائی سے جس پر نظر
کروں اس کی وسعت کا کیا میں بیاں
کہ جوں اصفہاں، تھا وہ نصف جہاں
ہنر مند واں اہل حرفہ تمام


ہر اک نوع کی خلق کا ازدحام
یہ دل چسپ بازار تھا چوک کا
کہ ٹھہرے جہاں، بس وہیں دل لگا
جہاں تک یہ رستے تھے بازار کے


کہے تو کہ تختے تھے گلزار کے
صفا پر جو اس کی نظر کر گئے
اسے دیکھ کر سنگ مرمر گئے
کہوں قلعے کی اس کے کیا میں شکوہ


گئے دب، بلندی کو دیکھ اس کی، کوہ
وہ دولت سرا خانۂ نور تھا
سدا عیش و عشرت سے معمور تھا
ہمیشہ خوشی، رات دن سیر باغ


نہ دیکھا کسی دل پہ، جز لالہ، داغ
سدا عیش و عشرت، سدا راگ و رنگ
نہ تھا زیست سے کوئی اپنی بہ تنگ
غنی وہاں وا، جو کہ آیا تباہ


عجب شہر تھا وہ عجب بادشاہ
نہ دیکھا کسی نے کوئی واں فقیر
ہوئے اس کی دولت سے گھر گھر امیر
کہاں تک کہوں اس کا جاہ و حشم


محل و مکاں اس کا رشک ارم
ہزاروں پری پیکر اس کے غلام
کمر بستہ خدمت میں حاضر مدام
سدا ماہ رویوں سے صحبت اسے


سدا جامہ زیبوں سے رغبت اسے
کسی طرف سے وہ نہ رکھتا تھا غم
مگر ایک اولاد کا تھا الم
اسی بات کا اس کے تھا دل پہ داغ


نہ رکھتا تھا وہ اپنے گھر کا چراغ
دنوں کا عجب اس کے یہ پھیر تھا
کہ اس روشنی پہ یہ اندھیر تھا
وزیروں کو اک روز اس نے بلا


جو کچھ دل کا احوال تھا، سو کہا
کہ میں کیا کروں گا یہ مال و منال
فقیری کا ہے میرے دل کو خیال
فقیر اب نہ ہوں، تو کروں کیا علاج


نہ پیدا ہوا وارث تخت و تاج
جوانی مری ہو گئی سب بسر
نمودار پیری ہوئی سر بہ سر
دریغا کہ عہد جوانی گذشت


جوانی مگو، زندگانی گذشت
بہت ملک پر جان کھویا کیا
بہت فکر دنیا میں رویا کیا
زہے بے تمیزی و بے حاصلی


کہ از فکر دنیا، ز دیں غافلی
وزیروں نے کی عرض کہ اے آفتاب!
نہ ہو تجھ کو ذرہ کبھی اضطراب
فقیری جو کیجے تو دنیا کے ساتھ


نہیں خوب، جانا ادھر خالی ہاتھ
کرو سلطنت، لے کے اعمال نیک
کہ تا دو جہاں میں رہے حال نیک
جو عاقل ہوں، وے سوچ میں ٹک رہیں


کہ ایسا نہ ہووے کہ پھر سب کہیں
تو کار زمیں را نکو ساختی
کہ بر آسماں نیز پرداختی
یہ دنیا جو ہے مزرع آخرت


فقیری میں ضائع کرو اس کو مت
عبادت سے اس کشت کو آب دو
وہاں جا کے خرمن ہی تیار لو
رکھو یاد عدل و سخاوت کی بات


کہ اس فیض سے ہے تمہاری نجات
مگر ہاں، یہ اولاد کا ہے جو غم
سو اس کا تردد بھی کرتے ہیں ہم
عجب کیا کہ ہووے تمہارے خلف


کرو تم نہ اوقات اپنی تلف
نہ لاؤ کبھی یاس کی گفتگو
کہ قرآں میں آیا ہے: لا تقنطو
بلاتے ہیں ہم اہل تنجیم کو


نصیبوں کو اپنے ذرا دیکھ لو
تسلی تو دی شاہ کو اس نمط
ولے اہل تنجیم کو بھیجے خط
نجومی و رَمّال اور برہمن


غرض یاد تھا جن کو اس ڈھب کا فن
بلا کر انہیں شہ کنے لے گئے
جوں ہی رو بہ رو شہ کے سب وے گئے
پڑا جب نظر وہ شہ تاج و تخت


دعا دی کہ ہوں شہ کے بیدار بخت
کیا قاعدے سے نہڑ کر سلام
کہا شہ نے: میں تم سے رکھتا ہوں کام
نکالو ذرا اپنی اپنی کتاب


مرا ہے سوال، اس کا لکھو جواب
نصیبوں میں دیکھو تو میرے کہیں
کسی سے بھی اولاد ہے یا نہیں
یہ سن کر، وے رمال طالع شناس


لگے کھینچنے زائچے بے قیاس
دھرے تختے آگے، لیا قرعہ ہاتھ
لگا دھیان اولاد کا اس کے ساتھ
جو پھینکیں، تو شکلیں کئی بیٹھیں مل


کئی شکل سے دل گیا ان کا کھل
جماعت نے رمال کی عرض کی
کہ ہے گھر میں امید کے کچھ خوشی
یہ سن ہم سے اے عالموں کے شفیق


بہت ہم نے تکرار کی ہر طریق
بیاض اپنی دیکھی جو اس رَمل کی
تو ایک ایک نکتہ، ہے فرد خوشی
ہے اس بات پر اجتماع تمام


کہ طالع میں فرزند ہے تیرے نام
زن و زوج کے گھر میں ہے گی فرح
پیا کر مے وصل کا تو قدح
نجومی بھی کہنے لگے در جواب


کہ ہم نے بھی دیکھی ہے اپنی کتاب
نحوست کے دن سب گئے ہیں نکل
عمل اپنا سب کر چکا ہے زحل
ستارے نے طالع کے، بدلے ہیں طور


خوشی کا کوئی دن میں آتا ہے دور
نظر کی جو تسدیس و تثلیث پر
تو دیکھا کہ ہے نیک سب کی نظر
کیا پنڈتوں نے جو اپنا بچار


تو کچھ انگلیوں پر کیا پھر شمار
جنم پترا شاہ کا دیکھ کر
تُلا اور بِرچھک پہ کر کر نظر
کہا: رام جی کی ہے تم پر دیا


چندرما سا بالک ترے ہووے گا
نکلتے ہیں اب تو خوشی کے بچن
نہ ہو گر خوشی، تو نہ ہوں برہمن
مہاراج کے ہوں گے مقصد شتاب


کہ آیا ہے اب پانچواں آفتاب
نصیبوں نے کی آپ کے یاوری
کہ آئی ہے اب ساتویں مشتری
مقرر ترے، چاہیے، ہو پسر


کہ دیتی ہے یوں اپنی پوتھی خبر
وہ لیکن مقدر ہے کچھ اور بھی
کہ ہیں اس بھلے میں، برے طور بھی
یہ لڑکا تو ہو گا، ولے کیا کہیں


خطر ہے اسے بارھویں برس میں
نہ آوے یہ خورشید بالائے بام
بلندی سے خطرہ ہے اس کو تمام
نہ نکلے یہ بارہ برس رشک مہ


رہے برج میں یہ مہ چاردہ
کہا شہ نے یہ سن کے، ان کے تئیں
کہو، جی کا خطرہ تو اس کو نہیں؟
کہا: جان کی سب طرح خیر ہے


مگر دشت غربت کی کچھ سیر ہے
کوئی اس پہ عاشق ہو جن و پری
کوئی اس کی معشوق ہو استری
کچھ ایسا نکلتا ہے پوتھی میں اب


خرابی ہو اس پر کسی کے سبب
ہوئی کچھ خوشی شہ کو اور کچھ الم
کہ دنیا میں توام ہیں شادی و غم
کہا شہ نے: اس پر نہیں اعتبار


جو چاہے کرے میرا پروردگار
یہ فرما، محل میں در آمد ہوئے
منجم وہاں سے بر آمد ہوئے
خدا پر زبس اس کا تھا اعتقاد


لگا مانگنے اپنی حق سے مراد
خدا سے لگا کرنے وہ التجا
لگا آپ مسجد میں رکھنے دیا
نکالا مرادوں کا آخر سراغ


لگائی ادھر لَو، تو پایا چراغ
سحاب کرم نے کیا جو اثر
ہوئی کشت امید کی بارور
اسی سال میں، یہ تماشا سنو


رہا حمل اک زوجۂ شاہ کو
جو کچھ دل پہ گزرے تھے رنج و تعب
مبدّل ہوئے وے خوشی ساتھ سب
خوشی سے پلا مجھ کو ساقی! شراب


کوئی دم میں بجتا ہے چنگ و رباب
کروں نغمۂ تنہنیت کو شروع
کہ اک نیک اختر کرے ہے طلوع
داستان تولد ہونے کی شاہ زادہ بے نظیر کے


گئے نو مہینے جب اس پر گزر
ہوا گھر میں شہ کے تولد پسر
عجب صاحب حسن پیدا ہوا
جسے مہرومہ دیکھ شیدا ہوا


نظر کو نہ ہو حسن پر اُس کے تاب
اسے دیکھ، بے تاب ہو آفتاب
ہوا وہ جو اُس شکل سے دل پذیر
رکھا نام اس کا شہ بے نظیر


خواصوں نے، خواجہ سراؤں نے جا
کئی نذریں گزرانیاں اور کہا
مبارک تجھے اے شہ نیک بخت!
کہ پیدا ہوا وارث تاج و تخت


سکندر نژاد اور دارا حشم
فلک مرتبت اور عطارد رقم
رہے اس کے اقلیم زیر نگیں
غلامی کریں اس کی خاقان چیں


یہ سنتے ہی مژدہ، بچھا جا نماز
کیے لاکھ سجدے، کہ اے بے نیاز!
تجھے فضل کرتے نہیں لگتی بار
نہ ہو تجھ سے مایوس، امید دار


دوگانہ غرض شکر کا کر ادا
تہیہ کیا شاہ نے جشن کا
وے نذریں خواصوں کی، خوجوں کی لے
انہیں خلعت و زر کا انعام دے


کہا: جاؤ، جو کچھ کہ درکار ہو
کہو خانساماں سے تیار ہو
نقیبوں کو بلوا کے یہ کہ دیا
کہ نقار خانے میں دو حکم جا


کہ نوبت خوشی کی بجاویں تمام
خبر سن کے یہ شاد ہوں خاص و عام
یہ مژدہ جو پہنچا، تو نقارچی
لگا ہر جگہ بادلا اور زری


بنا ٹھاٹھ نقار خانے کا سب
مہیا کر اسباب عیش و طرب
غلاف اس پہ بانات پر زر کے ٹانک
شتابی سے نقاروں کو سینک سانک


دیا چوب کو پہلے بم سے ملا
لگی پھیلنے ہر طرف کو صدا
کہا زیر سے بم نے بہر شگوں
کہ دوں دوں خوشی کی خبر کیوں نہ دوں


بجے شادیانے جو واں اس گھڑی
ہوئی گرد و پیش آ کے خلقت کھڑی
بہم مل کے بیٹھے جو شہنا نواز
بنا منہ سے پھرکی، لگا اس پہ ساز


سروں پر وے سر پیچ معمول کے
خوشی سے، ہوئے گال گل، پھول کے
لگے لینے اپجیں خوشی سے نئی
اڑانا لگا بجنے اور سگھڑئی


ٹکوروں میں نوبت کے شہنا کی دھن
سگھڑ سننے والوں کو کرتی تھی سن
ترھی اور قرنائے شادی کے دم
لگے بھرنے زیل اور کھرج میں بہم


سنی جھانجھ نے جو خوشی کی نوا
تھرکنے لگا، تالیوں کو بجا
نئے سر سے عالم کو عشرت ہوئی
کہ لڑکے کے ہونے کی نوبت ہوئی


محل سے لگا تابہ دیوان عام
عجب طرح کا اک ہوا ازدحام
چلے لے کے نذریں وزیر و امیر
لگے کھینچنے زر کے تودے فقیر


دیے شاہ نے شاہزادے کے نانو
مشائخ کو اور پیر زادوں کو گانو
امیروں کو جاگیر، لشکر کو زر
وزیروں کو الماس و لعل و گہر


خواصوں کو، خوجوں کو جوڑے دیے
پیادے جو تھے، ان کو گھوڑے دیے
خوشی سے کیا یاں تلک زر نثار
جسے ایک دینا تھا، بخشے ہزار


کیا بھانڈ اور بھکتیوں نے ہجوم
ہوئی ’’آہے آہے مبارک‘‘ کی دھوم
لگا کنچنی، چونا پزنی تمام
کہاں تک میں لوں نرت کاروں کا نام


جہاں تک کہ سازندے تھے ساز کے
دھنی دست کے اور آواز کے
جہاں تک کہ تھے گایک اور تنت کار
لگے گانے اور ناچنے ایک بار


لگے بجنے قانون و بین و رباب
بہا ہر طرف جوئے عشرت کا آب
لگی تھاپ طبلوں پہ مردنگ کی
صدا اونچی ہونے لی چنگ کی


کمانچوں کو، سارنگیوں کو بنا
خوشی سے ہر اک ان کی تربیں ملا
لگا تار پر موم مرچنگ کے
ملا سر طنبوروں کے یک رنگ کے


ستاروں کے پردے بنا کر درست
بجانے لگے سب وے چالاک و چست
گئی بائیں کی آسماں پر گمک
اٹھا گنبد چرخ سارا دھمک


خوشی کی زبس ہر طرف تھی بساط
لگے ناچنے اس پہ اہل نشاط
کناری کے جوڑے چمکتے ہوئے
دو پانوں میں گھنگرو جھنکتے ہوئے


وہ گھٹنا، وہ بڑھنا اداؤں کے ساتھ
دکھانا وہ رکھ رکھ کے چھاتی پہ ہاتھ
دو بالے چمکتے ہوئے کان میں
پھڑکنا وہ نتھنے کا ہر آن میں


کبھی دل کو پاؤں سے مل ڈالنا
نظر سے کبھی دیکھنا بھالنا
دکھانا کبھی اپنی چھب مسکرا
کبھی اپنی انگیا کو لینا چھپا


کسی کے وہ مکھڑے پہ نتھ کی پھبن
کسی کے چمکتے ہوئے نورتن
وہ دانتوں کی مسی، وہ گل برگ تر
شفق میں عیاں جیسے شام و سحر


وہ گرمی کے چہرے، کہ جوں آفتاب
جسے دیکھ کر دل کو ہو اضطراب
چمکنا گلوں کا صفا کے سبب
وہ گردن کے ڈورے قیامت، غضب


کبھی منہ کے تئیں پھیر لینا ادھر
کبھی چوری چوری سے کرنا نظر
دوپٹے کو کرنا کبھی منہ کی اوٹ
کہ پردے میں ہو جائیں دل لوٹ پوٹ


ہر اک تان میں ان کو ارمان یہ
کہ دل لیجئے تان کی جان یہ
کوئی فن میں سنگیت کے شعلہ رو
برم، جوگ، لچھمی کی لے، پر ملو


کوئی ڈیڑھ گت ہی میں پانوں تلے
کھڑی عاشقوں کے دلوں کو ملے
کوئی دائرے میں بجا کر پرن
کوئی ڈھمڈھمی میں دکھا اپنا فن


غرض ہر طرح دل کو لینا انہیں
نئی طرح سے داغ دینا انہیں
کبھی مار ٹھوکر، کریں قتل عام
کبھی ہاتھ اٹھا، لیویں گرتے کو تھام


کہیں دھرپت اور گیت کا شور و غل
کہیں قول و قلبانہ و نقش و گل
کہیں بھانڈ کے ولولوں کا سماں
کہیں ناچ کشمیریوں کا وہاں


منجیرا، پکھاوج، گلے ڈال ڈھول
بجاتے تھے اس جا کھڑے، باندھ غول
محل میں جو دیکھو تو اک ازدحام
مبارک سلامت کی تھی دھوم دھام


وہاں بھی تو تھی عیش و عشرت کی دھوم
پری پیکروں کا ہر اک جا ہجوم
چھٹی تک غرض تھی خوشی ہی کی بات
کہ دن عید اور رات تھی شب برات


بڑھے ابر ہی ابر میں جوں ہلال
محل میں لگا پلنے وہ نو نہال
برس گانٹھ جس سال اس کی ہوئی
دل بستگاں کی گرہ کھل گئی


وہ گل جب کہ چوتھے برس میں لگا
بڑھایا گیا دودھ اس ماہ کا
ہوئی تھی جو کچھ پہلے شادی کی دھوم
اسی طرح سے پھر ہوا وہ ہجوم


طوائف وہی اور وہی راگ و رنگ
ہوئی بلکہ دونی خوشی کی ترنگ
وہ گل پانو سے اپنے جس جا چلا
وہاں آنکھ کو نرگسوں نے ملا


لگا پھرنے وہ سرو جب پانو پانو
کیے بَردے آزاد تب اس کے نانو
داستان تیاری میں باغ کی
مے ارغوانی پلا ساقیا!


کہ تعمیر کو باغ کی دل چلا
دیا شہ نے ترتیب اک خانہ باغ
ہوا رشک سے جس کے، لالے کو داغ
عمارت کی خوبی، دروں کی وہ شان


لگے جس میں زر بفت کے سا یبان
چقیں اور پردے بندھے زر نگار
دروں پر کھڑی دست بستہ بہار
کوئی دور سے در پر اٹکا ہوا


کوئی زہ پہ خوبی سے لٹکا ہوا
وہ مقیش کی ڈوریاں سر بہ سر
کہ مہ کا بندھا جس میں تار نظر
چقوں کا تماشا، تھا انکھوں کا جال


نگہ کو وہاں سے گزرنا محال
سنہری، مغرق چھتیں ساریاں
وہ دیوار اور در کی گل کاریاں
دیے چار سو آئنے جو لگا


گیا چوگنا لطف اس میں سما
وہ مخمل کا فرش اس میں ستھرا کہ بس
بڑھے جس کے آگے نہ پاے ہوس
رہیں لخلخے اس میں روشن مدام


معطر شب و روز جس سے مشام
چھپر کھٹ مرصع کا دالان میں
چمکتا تھا اس طرح ہر آن میں
زمیں پر تھی اس طور اس کی جھلک


ستاروں کی جیسے فلک پر چمک
زمیں کا کروں دھاں کی کیا میں بیا ں
کہ صندل کا اک پارچہ تھا عیاں
بنی سنگ مر مر سے چو پڑ کی نہر


گئی چارسو، اس کے پانی کی لہر
قرینے سے گرد اس کے سروسہی
کچھ اک دور دور اس سے سیب و بہی
کہوں کیا میں کیفیت دار بست


لگائے رہیں تاک وہاں مے پرست
ہواے بہاری سے گل لہلہے
چمن سارے شاداب اور ڈہڈ ہے
زمرد کی مانند سبزے کا رنگ


روش کا، جواہر ہوا جس سے سنگ
روش کی صفائی پہ بے اختیار
گل اشرفی نے کیا زر نثار
چمن سے بھرا باغ، گل سے چمن


کہیں نرگس و گل، کہیں یاسمن
چنبیلی کہیں اور کہیں موتیا
کہیں راے بیل اور کہیں موگرا
کھڑے شاخ شبو کے ہر جانشان


مدن بان کی اور ہی آن بان
کہیں ارغواں اور کہیں لالہ زار
جدی اپنے موسم میں سب کی بہار
کہیں چاندنی میں گلوں کی بہار


ہر اک گل سفیدی سے مہتاب وار
کھڑے سرو کی طرح چمپے کے جھاڑ
کہے تو کہ خوش بوئیوں کے پہاڑ
کہیں زرد نسریں، کہیں نسترن


عجب رنگ پر زعفرانی چمن
پڑی آبجو، ہر طرف کو بہے
کریں قمریاں سرو پر چہچہے
گلوں کا لب نہر پر جھومنا


اسی اپنے عالم میں منہ چومنا
وہ جھک جھک کے گرنا خیابان پر
نشے کا سا عالم گلستان پر
لیے بیلچے ہاتھ میں مالنے


چمن کو لگیں دیکھنے بھالنے
کہیں تخم پاشی کریں کھود کر
پنیری جماویں کہیں گود کر
کھڑے شاخ در شاخ باہم نہال


رہیں ہاتھ جوں مست گردن پہ ڈال
لب جو کے آئینے میں دیکھ قد
اکڑنا کھڑے سرو کا جد نہ تد
خراماں صبا صحن میں چار سو


دماغوں کو دیتی پھرے گل کی بو
کھڑے نہر پر قاز اور قر قرے
لیے ساتھ مرغابیوں کے پرے
صدا قر قروں کی، بطوں کا وہ شور


درختوں پہ بگلے، منڈیروں پہ مور
چمن آتش گل سے دہکا ہوا
ہوا کے سبب باغ مہکا ہوا
صبا جو گئی ڈھیریاں کر کے بھول


پڑے ہر طرف مونسریوں کے پھول
وہ کیلوں کی اور مونسریوں کی چھانو
لگی جائیں آنکھیں لیے جن کا نانو
خوشی سے گلوں پر سدا بلبلیں


تعشق کی آپس میں باتیں کریں
درختوں نے برگوں کے کھولے ورق
کہ لیں طوطیاں بوستاں کا سبق
سماں قمریاں دیکھ اس آن کا


بڑھیں باب پنجم گلستان کا
دوا، دائیاں اور مغلانیاں
پھریں ہر طرف اس میں جلوہ کناں
خواصوں کا اور لونڈیوں کا ہجوم


محل کی وہ چہلیں، وہ آپس کی دھوم
تکلف کے پہنے پھریں سب لباس
رہیں رات دن شاہ زادے کے پاس
کنیزان مہ رو کی ہر طرف ریل


چنبیلی کوئی اور کوئی راے بیل
شگوفہ کوئی اور کوئی کام روپ
کوئی چت لگن اور کوئی سیام روپ
کوئی کیتکی اور کوئی گلاب


کوئی مہ رتن اور کوئی ماہتاب
کوئی سیوتی اور ہنس مکھ کوئی
کوئی دل لگن اور تن سکھ کوئی
ادھر اور ادھر آتیاں جاتیاں


پھریں اپنے جوبن میں اتراتیاں
کہیں چٹکیاں اور کہیں تالیاں
کہیں قہقہے اور کہیں گالیاں
کہیں اپنی پٹی سنوارے کوئی


اری اور تری کہہ پکارے کوئی
بجاتی پھرے کوئی اپنے کڑے
کہیں ’’ہوئے رے‘‘ اور کہیں ’’واچھڑے‘‘
دکھاوے کوئی گو کھرو موڑ موڑ


کہیں سوت بونٹی، کہیں تار توڑ
ادا سے کوئی بیٹھی حقہ پیے
دم دوستی کوئی بھر بھر جیے
کوئی حوض میں جاکے غوطہ لگائے


کوئی نہر پر پانو بیٹھی ہلائے
کوئی اپنے توتے کی لیوے خبر
کوئی اپنی مینا پہ رکھے نظر
کسی کو کوئی دھول مارے کہیں


کوئی جان کو اپنی وارے کہیں
کوئی آرسی اپنے آگے دھرے
ادا سے کہیں بیٹھی کنگھی کرے
مقابا کوئی کھول مسی لگائے


لبوں پر دھڑی کوئی بیٹھی جمائے
ہوا ان گلوں سے دوبالا سماں
اسی باغ میں یہ بھی باغ رواں
غرض لوگ تھے یہ جو ہر کام کے


سو سب واسطے اس کے آرام کے
پلا جب وہ اس ناز و نعمت کے ساتھ
پدر اور مادر کی شفقت کے ساتھ
ہوئی اس کے مکتب کی شادی عیاں


ہوا پھر انہیں شادیوں کا سماں
معلم، اتالیق، منشی، ادیب
ہر اک فن کے استاد بیٹھے قریب
کیا قاعدے سے شروع کلام


پڑھانے لگے علم اس کو تمام
دیا تھا زبس حق نے ذہن رسا
کئی برس میں علم سب پڑھ چکا
معانی و منطق، بیان و ادب


پڑھے اس نے منقول و معقول سب
خبردار حکمت کے مضمون سے
غرض جو پڑھا اس نے، قانون سے
لگا ہیئت و ہندسہ تا نجوم


زمیں آسماں میں پڑی اس کی دھوم
کیے علم نوک زباں حرف حرف
اسی نحوسے عمر کی اس نے صرف
عطارد کو اس کی لگی آنے ریس


ہوا سادہ لوحی میں وہ خوش نویس
ہوا جب کہ نو خط وہ شیریں رقم
بڑھا کر لکھے سات سے، نو قلم
لیا ہاتھ جب خامۂ مشک بار


لکھا نسخ و ریحان و خط غبار
عروس الخطوط اور ثلث و رقاع
خفی و جلی مثل خط شعاع
شکستہ لکھا اور تعلیق جب


رہے دیکھ، حیراں، اتالیق سب
کیا خط گلزار سے جب فراغ
ہوا صفحۂ قطعہ، گلزار باغ
کروں علم کو اس کے کیا میں عیاں


کروں مختصر یاں سے اب یہ بیاں
کماں کے جو درپے ہوا بے نظیر
لیا کھینچ چلے میں سب فن تیر
صفائی میں سو فار، پیکاں کیا


گیا جب کہ تودے پہ، طوفاں کیا
رکھا چھوٹتے ہی جو لکڑی پہ من
لیا اپنے قبضے میں سب اس کا فن
ہوئیں دست و بازو کی سر سائیاں


اڑائیں کئی ہاتھ میں گھائیاں
رکھا موسیقی پر بھی کچھ جو خیال
کیے قید سب اس نے ہاتھوں میں تال
طبیعت گئی کچھ جو تصویر پر


رکھے رنگ سب اس نے مد نظر
کئی دن میں سیکھا یہ کسب تفنگ
کہ حیراں ہوئے دیکھ، اہل فرنگ
سو ان کمالوں کے، کتنے کمال


مروت کی خو، آدمیت کی چال
رذالوں سے، نفروں سے نفرت اسے
غرض قابلوں ہی سے صحبت اسے
گیا نام پر اپنے وہ دل پذیر


ہر اک فن میں سچ مچ ہوا بے نظیر
داستان سواری کی تیاری کے حکم میں
پلا ساقیا! مجھ کو اک جام مل
جوانی پر آیا ہے ایام گل


غنیمت شمر صحبت دوستاں
کہ گل پنج روز است در بوستاں
ثمر لے بھلائی کا، گر ہو سکے
شتابی سے بو لے، جو کچھ بو سکے


کہ رنگ چمن پر نہیں اعتبار
یہاں چرخ میں ہے خزان و بہار
پڑی جب گرہ بارہویں سال کی
کھلی گل جھڑی غم کے جنجال کی


کہا شہ نے بلوا نقیبوں کو شام
کہ ہوں صبح حاضر سبھی خاص و عام
سواری تکلف سے تیار ہو
مہیا کریں، جو کہ درکار ہو


کریں شہر کو مل کے آئینہ ہند
سواری کا ہو لطف جس سے دو چند
رعیت کے خوش ہوں صغیر و کبیر
کہ نکلے گا کل شہر میں بے نظیر


یہ فرما، محل میں گئے بادشاہ
نقیبوں نے سن حکم، لی اپنی راہ
ہوئی شب، لیا مہ نے جام شراب
گیا سجدۂ شکر میں آفتاب


خوشی سے گئی جلد جو شب گزر
ہوئی سامنے سے نمایاں سحر
عجب شب تھی وہ جوں سحر روسپید
عجب روز تھا مثل روز امید


گیا مژدۂ صبح لے ماہتاب
اٹھا سورج آنکھوں کو ملتا شتاب
کہا شاہ نے اپنے فرزند کو
کہ بابا! نہا دھو کے تیار ہو


داستان حمام کے نہانے کی لطافت میں
پلا آتشیں آب پیر مغاں!
کہ بھولے مجھے گرم و سرد جہاں
اگر چاہتا ہے مرے دل کا چین


نہ دینا وہ ساغر جو ہو قلتین
کدورت مرے دل کی دھو ساقیا
ذرا شیشئہ مے کو دھو دھا کے لا
کہ سر گرم حمام ہے بے نظیر


گیا ہے نہانے کو ماہ منیر
ہوا جب کہ داخل وہ حمام میں
عرق آ گیا اس کے اندام میں
تن نازنیں نم ہوا س کا گل


کہ جس طرح ڈوبے ہے شبنم میں گل
پرستار، باندھے ہوئے لنگیاں
مہ و مہر سے طاس لے کر وہاں
لگے ملنے اس گل بدن کا بدن


ہوا ڈہڈہا آب سے وہ چمن
نہانے میں یوں تھی بدن کی دمک
برسنے میں بجلی کی جیسے چمک
لبوں پر جو پانی پھرا سر بہ سر


نظر آئے، جیسے دو گل برگ تر
ہوا قطرۂ آب یوں چشم بوس
کہے تو، پڑے جیسے نرگس پہ اوس
لگا ہونے ظاہر جو اعجاز حسن


ٹپکنے لگا اس سے انداز حسن
گیا حوض میں جو شہ بے نظیر
پڑا آب میں عکس ماہ منیر
وہ گورا بدن اور بال اس کے تر


کہے تو کہ ساون کی شام و سحر
نمی کا تھا بالوں کی عالم عجب
نہ دیکھی کوئی خوب تر اس سے شب
کہوں اس کی خوبی کی کیا تجھ سے بات


کہ جوں بھیگتی جاوے صحبت میں رات
زمیں پر تھا اک موجۂ نور خیز
ہوا جب وہ فوارہ ساں آب ریز
زمرد کے لے ہاتھ میں سنگ پا


کیا خادموں نے جو آہنگ پا
ہنسا کھلکھلا وہ گل نو بہار
لیا کھینچ پانوں کو بے اختیار
عجب عالم اس نازنیں پر ہوا


اثر گد گدی کا جبیں پر ہوا
ہنسا اس ادا سے کہ سب ہنس پڑے
ہوئے جی سے قربان چھوٹے بڑے
دعائیں لگے دینے بے اختیار


کہا: خوش رکھے تجھ کو پرور دگار
کہ تیری خوشی سے، ہے سب کی خوشی
مبارک تجھے روز و شب کی خوشی!
نہ آوے کبھی تیری خاطر پہ میل


چمکتا رہے یہ فلک کا سہیل
کیا غسل جب اس لطافت کے ساتھ
اڑھا کھیس، لائے اسے ہاتھوں ہاتھ
نہا دھو کے نکلا وہ گل اس طرح


کہ بدلی سے نکلے ہے مہ جس طرح
غرض شاہ زادے کو نہلا دھلا
دیا خلعت خسروانہ پنہا
جواہر سراسر پنہایا اسے


جواہر کا دریا بنایا اسے
لڑی، لٹکن اور کلغی اور نورتن
عدد ایک سے ایک زیب بدن
مرصع کا سر پیچ جوں موج آب


مصفّا بہ شکل گل آفتاب
وہ موتی کے مالے بہ صد زیب و زین
کہیں جس کو آرام جاں، دل کا چین
جواہر کا تن پر عجب تھا ظہور


کہ ایک ایک عدد اس کا، تھا کوہ طور
غرض ہو کے اس طرح آراستہ
خراماں ہوا سرو نوخاستہ
نکل گھر سے جس دم ہوا وہ سوار


کیے خوان گوہر کے اس پر نثار
زبس تھا سواری کا باہر ہجوم
ہوا جب کہ ڈنکا، پڑی سب میں دھوم
برابر برابر کھڑے تھے سوار


ہزاروں ہی تھی ہاتھیوں کی قطار
سنہری، رپہری تھیں عماریاں
شب و روز کی سی طرح داریاں
چمکتے ہوئے بادلوں کے نشان


سواروں کے غٹ اور بھالوں کی شان
ہزاروں تھی اطراف میں پالکی
جھلا بور کی جگمگی نالکی
کہاروں کی زر بفت کی کرتیاں


اور ان کے دبے پانو کی پھرتیاں
بندھیں پگڑیاں تاش کی سر اوپر
چکا چوندھ میں جس سے آوے نظر
وہ ہاتھوں میں سونے کے موٹے کڑے


جھلک جس کی ہر ہر قدم پر پڑے
وہ ماہی مراتب، وہ تخت رواں
وہ نوبت، کہ دولھا کا جس سے سماں
وہ شہنائیوں کی صدا خوش نوا


سہانی وہ نوبت کی اس میں صدا
وہ آہستہ گھوڑوں پہ نقارچی
قدم با قدم بالباس زری
بجاتے ہوئے شادیا نے تمام


چلے آگے آگے ملے، شاد کام
سوار اور پیادے، صغیر و کبیر
جلو میں تمامی امیر و وزیر
وے نذریں کہ جس جس نے تھیں ٹھانیاں


شہ و شاہ زادے کو گزرانیاں
ہوئے حکم سے شاہ کے پھر سوار
چلے سب قرینے سے باندھے قطار
سجے اور سجائے سبھی خاص و عام


لباس زری میں ملبس تمام
طرق کے طرق اورپرے کے پرے
کچھ ایدھر ادھر، کچھ ورے، کچھ پرے
مرصع کے سازوں سے کوتل سمند


کہ خوبی میں روح الفرس سے دو چند
وہ فیلوں کی اور میگ ڈمبر کی شان
جھلکتے وہ مقیش کے سایبان
چلی پایۂ تخت کے ہو قریب


بہ دستور شاہانہ نپتی جریب
سواری کے آگے کیے اہتمام
لیے سونے روپے کے عاصے تمام
نقیب اور جلو دار اور چوبدار


یہ آپس میں کہتے تھے ہر دم پکار
اسی اپنے معمول و دستور سے
ادب سے تفاوت سے اور دور سے
یلو! نوجوانو! بڑھے جائیو


دو جانب سے باگیں لیے آئیو
بڑھے جائیں آگے سے، چلتے قدم
بڑھے عمر و دولت قدم با قدم
غرض اس طرح سے سواری چلی


کہے تو کہ باد بہاری چلی
تماشائیوں کا جدا تھا ہجوم
ہر اک طرف تھی ایک عالم کی دھوم
لگا قلعے سے شہر کی حد تلک


دکانوں پہ تھی بادلے کی جھلک
کیا تھا زبس شہر آئینہ بند
ہوا چوک کا لطف واں چار چند
منڈھے تھے تمامی سے دیوار و در


تمامی وہ تھا شہر، سونے کا گھر
رعیت کی کثرت، ہجوم سپاہ
گزرتی تھی رک رک کے ہر جانگاہ
ہوئے جمع کھوٹھوں پہ جو مردوزن


ہر اک سطح تھی جوں زمین چمن
یہ خالق کی سن قدرت کا ملہ
تماشے کو نکلی زن حاملہ
لگا لنج سے تا ضعیف و نحیف


تماشے کو نکلے وضیع و شریف
وحوشوں، طیوروں تلک بے خلل
پڑے آشیانوں سے اپنے نکل
نہ پہنچا جو اک مرغ قبلہ نما


سو وہ آشیانے میں تڑپھا کیا
زبس شاہ زادہ بہت تھا حسیں
ہوئے دیکھ عاشق کہین و مہیں
نظر جس کو آیا وہ ماہ تمام


کیا اس نے جھک جھک کے اس کو سلام
دعا شاہ کو دی کہ بار الٰہ!
سدا یہ سلامت رہے مہر و ماہ
یہ خوش اپنے مہ سے رہے شہر یار


کہ روشن رہے شہر، پروردگار!
غرض شہر سے باہر اک سمت کو
کوئی باغ تھا شہ کا، اس میں سے ہو
گھڑی چار تک خوب سی سیر کر


رعیت کو دکھلا کے اپنا پسر
اسی کثرت فوج سے ہو سوار
پھر اشہر کی طرف وہ شہر یار
سواری کو پہنچا گئی فوج، ادھر


گئے اپنی منزل میں شمس و قمر
جہاں تک کہ تھیں خادمان محل
خوشی سے وہ ڈیوڑھی تک آئیں نکل
قدم اپنے حجروں سے باہر نکال


لیا سب نے، آپیشوا، حال حال
بلائیں لگیں لینے سب ایک بار
کیا جی کو یک دست سب نے نثار
گیا جب محل میں وہ سر و رواں


بندھا ناچ اور راگ کا پھر سماں
پہر رات تک، پہنے پوشاک وہ
رہا ساتھ سب کے طرب ناک وہ
قضارا وہ شب، تھی شب چار دہ


پڑا جلوہ لیتا تھا ہر طرف مہ
نظارے سے تھا اس کے، دل کو سرور
عجب عالم نور کا تھا ظہور
عجب جوش تھا نور مہتاب کا


کہے تو کہ دریا تھا سیماب کا
ہوا شاہ زادے کا دل بے قرار
یہ دیکھی جو واں چاندنی کی بہار
کچھ آئی جو اس مہ کے جی میں ترنگ


کہا: آج کوٹھے پہ بچھے پلنگ
خواصوں نے جا شاہ سے عرض کی
کہ شہ زادے کی آج یوں ہے خوشی
ارادہ ہے کوٹھے پر آرام کا


کہ بھایا ہے عالم لب بام کا
کہا شہ نے: اب تو گئے دن نکل
اگر یوں ہے مرضی تو کیا ہے خلل
پر اتنا ہے، اس سے خبردار ہوں


جنھوں کی ہے چوکی، وہ بیدار ہوں
لب بام پر جب یہ سووے صنم
کریں سورۂ نور کو اس پہ دم
تمھارا مرا بول بالا رہے


یہ اس گھر کا قائم اجالا رہے
کہا تب خواصوں نے: حق سے امید
یہی ہے کہ ہم بھی رہیں رو سفید
پھریں حکم لے وہاں سے پھر شاہ کا


بچھونا کیا جا کے اس ماہ کا
قضارا وہ دن تھا اسی سال کا
غلط وہم ماضی میں تھا حال کا
سخن مولوی کا یہ سچ ہے قدیم


کہ آگے قضا کے، ہو احمق حکیم
پڑے اپنے اپنے جو سب عیش بیچ
نہ سوجھی زمانے کی کچھ اونچ نیچ
یہ جانا کہ یوں ہی رہے گا یہ دور


زمانے کا سمجھا انہوں نے نہ طور
کہ اس بے وفا کی نئی ہے ترنگ
یہ گرگٹ بدلتا ہے ہر دم میں رنگ
کرا بادۂ عیش درجام ریخت


کہ صد شام بر فرق صبحش نہ پیخت
نداری تعجب ز نیرنگ دہر
کہ آرد زیک حقہ تریاک و زہر
داستان شاہ زادے کے کوٹھے پر سونے کی اور پری کے اڑا کر لے جانے کی


شتابی سے اٹھ ساقی بے خبر!
کہ چاروں طرف ماہ ہے جلوہ گر
بلوریں گلابی میں دے بھر کے جام
کہ آیا بلندی پہ ماہ تمام


جوانی کہاں اور کہاں پھر یہ سن
مثل ہےکہ ہے چاندنی چار دن
اگر مے کے دینے میں کچھ دیر ہے
تو پھر جان یہ تو کہ اندھیر ہے


وہ سونے کا جو تھا جڑاؤ پلنگ
کہ سیمیں تنوں کو ہو جس پر امنگ
کھنچی چادر ایک اس پہ شبنم کی صاف
کہ ہو چاندنی، جس صفا کی غلاف


دھرے اس پہ تکیے کئی نرم نرم
کہ مخمل کو ہو جس کے دیکھے سے شرم
کہاں تک کوئی اس کی خوبی کو پائے
جسے دیکھ، آنکھوں کو آرام آئے


کسے اس پہ کسنے وہ مقیش کے
کہ جھبوں میں تھے جس کے موتی لگے
سراسر ادقچے رزی باف کے
کہ تھے رشک آئینہ صاف کے


وہ گل تکیے اس کے جو تھے رشک ماہ
کہ ہر وجہ تھی ان کو خوبی میں راہ
کہوں اس کے گل تکیوں کا کیا بیاں
کہ بے وجہ رکھتا نہ تھا گال واں


کبھی نیند میں جب کہ ہوتا تھا وہ
تو رخسار رکھ اپنا، سوتا تھا وہ
چھپائے سے ہوتا نہ، حسن اس کا ماند
کہے تو، لگائے تھے مکھڑے پہ چاند


زبس نیند میں تھا جو وہ ہورہا
بچھونے پہ آتے ہی بس سورہا
وہ سویا جو اس آن سے بے نظیر
رہا پاسباں اس کا ماہ منیر


ہوا اس کے سونے پہ عاشق جو ماہ
لگا دی ادھر اپنی اس نے نگاہ
وہ مہ اس کے کوٹھے کا ہالا ہوا
غرض واں کا عالم دو بالا ہوا


وہ پھولوں کی خوش بو، وہ ستھرا پلنگ
جوانی کی نیند اور وہ سونے کا رنگ
جہاں تک کہ چوکی کے تھے باری دار
ہوا جو چلی، سو گئے ایک بار


غرض سب کو واں عالم خواب تھا
مگر جاگتا ایک مہتاب تھا
قضارا ہوا اک پری کا گزر
پڑی شاہ زادے پہ اس کی نظر


بھبھوکا سا دیکھا جو اس کا بدن
جلا آتش عشق سے اس کا تن
ہوئی حسن پر اس کے جی سے نثار
وہ تخت اپنا لائی ہوا سے اتار


جو دیکھا، تو عالم عجب ہے یہاں
منور ہے سارا زمیں آسماں
دوپٹے کو اس مہ کے منہ سے اٹھا
دیا گال سے گال اپنا م

لکھ قلم پہلے حمد رب ودود
کہ ہر اک جا پہ ہے وہی موجود
ذات معبود جاودانی ہے
باقی جو کچھ کہ ہے وہ فانی ہے


ہمسر اس کا نہیں ندیم نہیں
سب ہیں حادث کوئی قدیم نہیں
نعت
مدح احمد زباں پہ کیونکر آئے


بحر کوزے میں کس طرح سے سمائے
ذات احمد کو کوئی کیا جانے
یا علی جانے یا خدا جانے
منقبت


مدح حیدر میں کھولئے جو دہن
اس سے آگے نہیں ہے جائے سخن
کوئی حیدر کا مرتبہ سمجھا
کوئی بندہ کوئی خدا سمجھا


بیان عشق
ہے بنا جب سے گلشن ایجاد
ہوئی ہر شے ہر ایک کو امداد
رنگ خوبی عطا کیا گل کو


نالۂ و درد بخشا بلبل کو
ماہ کو نور لطف ہالے کو
چشم نرگس کو داغ لالے کو
راستی کی عطا صنوبر کو


پیچ سنبل کو آب گوہر کو
سختی ساری بتوں کے دل میں دی
الفت انساں کے آب و گل میں دی
عشق سے کون ہے بشر خالی


کر دیئے جس نے گھر کے گھر خالی
پڑتے ہیں اس میں جان کے لالے
ڈالتا ہے جگر میں بت خانے
جو کہ واقف تھے سب قرینوں سے


خاک چھنوائی ان حسینوں سے
اس سے امید رکھنا ہے بے جا
بھائی مجنوں سے کیا سلوک کیا
منہ سے کرنے نہ دی فغاں اس نے


مارے چن چن کے نوجواں اس نے
اس نے جس سے ذرا تپاک کیا
سب سے پہلے اسے ہلاک کیا
آتش ہجر سے رلاتا ہے


آگ پانی میں یہ لگاتا ہے
مار ڈالا تماش بینوں کو
زہر کھلوا دیا حسینوں کو
بس میں ڈالے نہ کبریا اس کے


رحم دل میں نہیں ذرا اس کے
آغاز داستان
ایک قصہ غریب لکھتا ہوں
داستان عجیب لکھتا ہوں


تازہ اس طرح کی حکایت ہے
سننے والوں کو جس سے حیرت ہے
جس محلے میں تھا ہمارا گھر
وہیں رہتا تھا ایک سوداگر


مرد اشراف صاحب دولت
تاجروں میں کمال ذی عزت
غم نہ تھا کچھ فراغ بالی سے
تھا بہت خاندان عالی سے


ایک دختر تھی اس کی ماہ جبیںؔ
شادی اس کی نہیں ہوئی تھی کہیں
ثانی رکھتی نہ تھی وہ صورت میں
غیرت حور تھی حقیقت میں


سبز نخل گل جوانی تھا
حسن یوسف فقط کہانی تھا
اس سن و سال پر کمال خلیق
چال ڈھال انتہا کی نستعلیق


چشم بد دور وہ حسیں آنکھیں
رشک چشم غزال چیں آنکھیں
تھا جو ماں باپ کو نظر کا ڈر
آنکھ بھر کر نہ دیکھتے تھے ادھر


تھی زمانے میں بے عدیل و نظیر
خوش گلو، خوش جمال خوش تقریر
تھا نہ اس شہر میں جواب اس کا
حسن لاکھوں میں انتخاب اس کا


شعر گوئی سے ذوق رہتا تھا
لکھنے پڑھنے کا شوق رہتا تھا
رخ پہ گیسو کی لہر آفت تھی
جو ادا اس کی تھی قیامت تھی


تھا یہ اس گل کا جامہ زیب بدن
سادی پوشاک میں تھے سو جوبن
سارا گھر اس پہ رہتا تھا قرباں
روح گر ماں کی تھی تو باپ کی جاں


نور آنکھوں کا دل کا چین تھی وہ
راحت جان والدین تھی وہ
پہلی نظر
ایک دن چرخ پر جو ابر آیا


کچھ اندھیرا سا ہر طرف چھایا
کھل گیا جب برس کے وہ بادل
قوس تب آسماں پہ آئی نکل
دل مرا بیٹھے بیٹھے گھبرایا


سیر کرنے کو بام پر آیا
خفقاں دل کا جو بہلنے لگا
اس طرف اس طرف ٹہلنے لگا
دیکھا اک سمت جو اٹھا کے نظر


سامنے تھی وہ دخت سوداگر
ساتھ ہجمولیاں بھی تھیں دو چار
دیکھتی تھیں وہ آسماں کی بہار
بام سے کچھ اترتی جاتی تھیں


چہلیں آپس میں کرتی جاتی تھیں
رہ گئی جب اکیلی وہ گل رو
نگراں سیر کو ہوئی ہر سو
ہوئی میری جو اس کی چار نگاہ


منہ سے بے ساختہ نکل گئی آہ
حال دل کا نہیں کہا جاتا
خوب سنبھلا، نہیں غش آ جاتا
نہ ہوا گو کلام فی ما بین


روح قالب میں ہو گئی بے چین
تیر الفت جو تھا لگا کاری
اشک بے ساختہ ہوئے جاری
سامنے وہ کھڑی تھی ماہ منیر


چپ کھڑا تھا میں صورت تصویر
تاب نظارہ اتنی لا نہ سکا
کہ اشارے سے بھی بلا نہ سکا
دیکھتا اس کو بار بار تھا میں


محو حسن و جمال یار تھا میں
گو میں روکے ہوئے ہزار رہا
دل پہ لیکن نہ اختیار رہا
اسی صورت سے ہو گئی جب شام


لائی پاس اس کے اک کنیز پیام
بیٹھی ناحق بھی ہولیں کھاتی ہیں
امی جان آپ کی بلاتی ہیں
گیسو رخ پر ہوا سے ہلتے ہیں


چلئے اب دونوں وقت ملتے ہیں
سن کے لونڈی کے منہ سے یہ پیغام
گئی کوٹھے کے نیچے وہ گلفام
اس کا جلوہ نہ جب نظر آیا


میں بھی روتا ہوا اتر آیا
شام سے پھر سحر کی مر مر کے
شب وہ کاٹی خدا خدا کر کے
اضطراب عاشق


پڑ گیا دل میں غم سے اک ناسور
یہی اس دن سے پڑ گیا دستور
دن میں سو بار بام پر جانا
دیکھنا بھالنا چلے آنا


جب نہ دیکھا وہاں پہ وہ گل رو
فرط غم سے نکل پڑے آنسو
لاکھ چاہا نہ ہو سکا دل سخت
پئے تسکیں رہی یہ آمد و رفت


گزرے کچھ دن تو رنج کے مارے
زر درخسار ہو گئے سارے
ہو گئی پھر تو ایسی حالت زار
جیسے برسوں کا ہو کوئی بیمار


دل کو تھی غم سے خود فراموشی
لگ گئی لب پہ مہر خاموشی
نہ رہا دل کو ضبط کا یارا
سر جہاں پایا دھڑ سے دے مارا


رنج لاکھوں طرح کے سہتے تھے
لب تھے خاموش اشک بہتے تھے
ہجر سے غیر ہوگئی حالت
غم سے بالکل بدل گئی صورت


ہوا حیران اپنا بیگانہ
جس نے دیکھا مجھے نہ پہچانا
ماں باپ کی فہمائش
دیکھے ماں باپ نے جو یہ انداز


روح قالب سے کر گئی پرواز
پوچھا مجھ سے یہ کیا ہے حال ترا
کس طرف ہے بندھا خیال ترا
سچ بتا دے کہ دھیان کس کا ہے


دل میں غم میری جان کسی کا ہے
رنج کس شعلہ رو کا کھاتے ہو
شمع کی طرح پگھلے جاتے ہو
زرد چہرہ ہے ارغواں کی طرح


ٹکڑے پوشاک ہے کتاں کی طرح
کون سی ماہ رو پہ مرتے ہو
سچ کہو کس کو پیار کرتے ہو
یہ کہو مہ جبیں ملا ہے کون؟


تم کو ایسا حسیں ملا ہے کون؟
کھاتے ہو پیتے ہو نہ سوتے ہو
روز اٹھ اٹھ کے شب کو روتے ہو
نہیں معلوم کون ہے وہ چھنال


کر دیا میرے لال کا یہ حال
میرے بچے کی جو کڑھائے جان
سات بار اس کو میں کروں قربان
اللہ آمیں سے ہم تو یوں پالیں


آپ آفت میں جاں کو یوں ڈالیں
تیرے پیچھے کی تلخ سب اوقات
دن کو دن سمجھی اور نہ رات کو رات
پالا کس کس طرح تمہیں جانی


کون منت تھی جو نہیں مانی
روشنی مسجدوں میں کرتی تھی
جا کے درگاہ چوکی بھرتی تھی
اب جو نام خدا جوان ہوئے


ایسے مختار میری جان ہوئے
ہاں میاں سچ ہے یہ خدا کی شان
تم کرو جان بوجھ کر ہلکان
ہم تو یوں پھونک پھونک رکھیں قدم


آپ دیتے پھریں ہر ایک پہ دم
ہم یہاں رنج و غم میں روتے ہیں
آپ غیروں پہ جان کھوتے ہیں
یوں مٹاؤ گے جان کر ہم کو


تھی نہ اس روز کی خبر ہم کو
دیکھتی ہوں جو تیرا حال زبوں
خشک ہوتا ہے میرے جسم کا خون
یوں تو برباد تو شباب نہ کر


مٹی ماں باپ کی خراب نہ کر
کچھ تو کہہ ہم سے اپنے قلب کا حال
کس کا بھایا ہے تجھ کو حسن و جمال
دل ہوا تیرا شیفتہ کس کا


سچ بتا ہے فریفتہ کس کا
کیسا دو دن میں جی نڈھال ہوا
دائی بندی کا کیا یہ حال ہوا
آئینہ تو اٹھا کے دیکھ ذرا


ست گیا دو ہی دن میں منہ کیسا
سدھ نہ کھانے کی ہے نہ پینے کی
کونسی پھر امید جینے کی
کس کی الفت میں ہے یہ حال کیا


کچھ نہ ماں باپ کا خیال کیا
دل پہ گزرا ہے کیا ملال تو کہہ
منہ سے ناشدنی اپنا حال تو کہہ
یوں ہی گر ہو گیا تو سودائی


دور پہونچے گی اس کی رسوائی
ایسے دیوانے کو بھرے گا کون؟
شادی اور بیاہ پھر کرے گا کون؟
کردیا کس نے ایسا آوارہ


کہ نہیں بنتا اب کوئی چارہ
آگے تو یہ نہ تھا ترا دستور
کس سے سیکھا ہے اس طرح کے امور
میرے تو دیکھ کر گئے اوسان


لیلیٰ مجنوں کے تونے کاٹے کان
باتیں یہ والدین کی سن کر
اور اک قلب پر لگا نشتر
شرم کے مارے منہ کو ڈھانپ لیا


کچھ نہ ماں باپ کو جواب دیا
گزرا یاں تک تو یہ ہمارا حال
اب بیان اس کا ہوتا ہے احوال
میں تو کھائے ہوئے تھا عشق کا تیر


پر ہوئی اس کے دل پہ بھی تاثیر
چھلکے آنکھوں کے دونوں پیمانے
دل لگا آپ ہی آپ گھبرانے
آتش عشق سے اٹھا جو دھواں


باتوں باتوں میں بڑھ گیا خفتاں
گوش فریاد قلب سننے لگے
خود بخود ہاتھ پاؤں دھننے لگے
درد و غم دل کو آ گیا جو پسند


سونا راتوں کا ہو گیا سوگند
موج الفت اسے ڈبونے لگی
ایک الجھن سی دل کو ہونے لگی
گھٹنے طاقت لگی جو روز بروز


آتش ہجر ہو گئی دل سوز
داغ جوں جوں جگر کے جلتے تھے
اشک گرم آنکھ سے نکلتے تھے
گرم نالے تھے لب پہ آہ سرد


دل میں ہوتا تھا میٹھا میٹھا درد
یوں تڑپتا تھا اس کے سینے میں دل
جس طرح لوٹے طائر بسمل
ہو گئی جب کمال حالت زار


جی میں باقی رہا نہ صبر و قرار
نامۂ حسن
لکھنے پڑھنے سے تھا جو اس کو ذوق
سو چ کر دل میں لکھا اک خط شوق


بھیجا مجھ کو وہ بے خطر نامہ
ڈر سے لکھا مگر نہ سرنامہ
ایک ماما نے آ کے چپکے سے
خط دیا ان کا ہاتھ میں میرے


کھول کر میں نے جو اسے دیکھا
کچھ عجب درد سے یہ لکھا تھا
ہو یہ معلوم تم کو بعد سلام
غم فرقت سے دل ہے بے آرام


اپنے کوٹھے پہ تو نہیں آتا
دل ہمارا بہت ہے گھبراتا
شکل دکھلا دے کبریا کے لئے
بام پر آ ذرا خدا کے لئے


اس محبت پہ ہو خدا کی مار
جس نے یوں کر دیا مجھے نا چار
سارے الفت نے کھو دیئے اوسان
ورنہ یہ لکھتی میں خدا کی شان


اب کوئی اس میں کیا دلیل کرے
جس کو چاہے خدا ذلیل کرے
جواب عشق
پڑھ کے میں نے لکھا یہ اس کو جواب


کیا لکھوں تم کو اپنا حال خراب
بن گئی یاں تو جان پر میری
خوب لی آپ نے خبر میری
ہجر میں مر کے زندگانی کی


اب بھی پوچھا تو مہربانی کی
جب سے دیکھا ہے آپ کا دیدار
دل سے جاتا رہا ہے صبر و قرار
روز تپ سے بخار رہتا ہے


سر پہ اک جن سوار رہتا ہے
تیرے قدموں کی ہوں قسم کھاتا
ہوش دو دو پہر نہیں آتا
پوچھتا ہے جو کوئی آ کے حال


اور ہوتا ہے میرے دل کو ملال
کہوں کس کس سے اس کہانی کو
آگ لگ جائے اس جوانی کو
ہوگئی ہے کچھ ایسی طاقت طاق


اٹھ نہیں سکتا بار رنج فراق
ہل کے پانی پیا نہیں جاتا
ورنہ حکم آپ کا بجا لاتا
پاتا طاقت جو طالب دیدار


بام پر آتا دن میں سو سو بار
پہنچا جس وقت سے ترا مکتوب
زندگی کا بندھا ہے کچھ اسلوب
رنج راحت سے گر بدل جائے


کیا عجب ہے جو دل سنبھل جائے
پیش قدمی جو تم نے کی مرے ساتھ
اس میں ذلت کی کون سی ہے بات
نہیں کچھ اس میں آپ کا ہے قصور


میری الفت کا یہ اثر ہے ضرور
عشق کا ہے اثر مرے واللہ
ورنہ تم لکھتیں یہ معاذ اللہ
تم تو وہ لوگ ہوتے ہو جلاد


نہیں سنتے کوئی کرے فریاد
ہو بلا سے کسی کا حال برا
کوئی مرجائے تم کو کیا پروا
نہیں ممکن تمہارا بل جائے


دم بھی عاشق کا گر نکل جائے
اب میں لکھتا ہوں آپ کو یہ حضور
وصل کی فکر چاہیئے ہے ضرور
اس میں غفلت جو تو نے کی اے ماہ


حال ہو گا مرا کمال تباہ
غیر ہے ہجر سے مری حالت
غم اٹھانے کی اب نہیں طاقت
دل پہ آفت عجیب آئی ہے


جان بچ جائے تو خدائی ہے
جان کو کس گھڑی قرار آیا
غش نے فرصت جو دی بخار آیا
تپش دل نے گر کیا ہشیار


وہم آنے لگے ہزار ہزار
دل کی وحشت نے کچھ جو مارا جوش
وہ بھی جاتے رہے جو آئے تھے ہوش
آشنا دوست آ گئے جو کبھو


جس نے دیکھا نکل پڑے آنسو
جھوٹ سمجھیں اسے حضور نہیں
جان جاتی رہے تو دور نہیں
مر گئے ہم تو رنج فرقت سے


پر خبر کی نہ اپنی حالت سے
اب جو بھیجی یہ آپ نے تحریر
ہے یہ لازم کہ وہ کرو تدبیر
سختیاں ہجر کی بدل جائیں


دل کی سب حسرتیں نکل جائیں
دے کے خط میں نے یہ کہا اس سے
جلد اس کا جواب لا اس سے
پہونچا جب اس تلک مرا مکتوب


ہنس کے بولی کہ واہ وا کیا خوب
جواب خط
پھر کیا یہ جواب میں تحریر
''کچھ قضا تو نہیں ہے دامن گیر''


ذکر ان باتوں کا یہاں کیا تھا
چھیڑنے کو ترے یہ لکھا تھا
ایسی باتیں تھیں کب یہاں منظور
تھا فقط تیرا امتحاں منظور


یہ تو لکھے تھے سب ہنسی کے کلام
ورنہ ان باتوں سے مجھے کیا کام
مجھ کو ایسی تھی کیا تری پروا
بام پر تو بلا سے آ کہ نہ آ


بات تھی یہ کمال عقل سے دور
جھوٹ لکھنے پہ ہوگئے مغرور
تم پہ مرتی میں کیا قیامت تھی
کیا مرے دشمنوں کی شامت تھی


میری جانب سے یہ گماں کیا خوب
جھوٹ جم جم سے ہے بہت مرغوب
یہ نہ سمجھا کہ ماجرا کیا ہے؟
یوں بھی کوئی کسی کو لکھتا ہے


کالا دانا ذرا اتر والو
رائی لون اس سمجھ پہ کر ڈالو
تجھ پہ مرتے بھی گر مرے بد خواہ
یوں نہ لکھتی کبھی معاذ اللہ


جان پا پوش سے نکل جاتی
پر طبیعت نہ یوں بدل جاتی
ایسی باتوں میں ہوتا ہے بدنام
اب نہ لکھیئے گا اس طرح کے کلام


رنج آ جاتا ہے اسی کد سے
نہ بڑھے آدمی کبھی حد سے
کیا سمجھ کر لکھا تھا یہ مضمون
اچھی ہوتی نہیں ہے اتنی دون


جی میں ٹھانی ہے کیا بتاؤ تو؟
خانگی کسبی کوئی سمجھے ہو
مال زادی نہیں یہاں کوئی
جو کرے تم سے گرمیاں کوئی


دیکھ تحریر فیل لائے آپ
خوب جلدی مزے میں آئے آپ
طالب وصل جو ہوئے ہم سے
ہے گا سادہ مزاج جم جم سے


وصال دوست
رہی کچھ روز تو یہی تحریر
پھر موافق ہوئی مری تقدیر
ہوئے اس گل سے وصل کے اقرار


اٹھ گئی درمیاں سے سب تکرار
جو کہا تھا ادا کیا اس نے
وعدہ اک دن وفا کیا اس نے
رات بھر میرے گھر میں رہ کے گئی


صبح کے وقت پھر یہ کہہ کے گئی
بات اس دم کی یاد رکھئے گا
ایک دن یہ مزا بھی چکھئے گا
بگڑے گی جب نہ کچھ بن آئے گی


آپ کے پیچھے جان جائے گی
لو مری جان جاتی ہوں اب تو
یاد رکھئے گا میری صحبت کو
جو خدا پھر ملائے گا تم سے


تو کہوں گی میں حال آ تم سے
سن کے میں نے دیا یہ اس کو جواب
نہ کرو دل کو اس قدر بے تاب
کہتی تم کیا ہو یہ خدا نہ کرے


یہ ستم ہووے کبریا نہ کرے
عمر بھر ہم وفا نہ توڑیں گے
زندگی بھر نہ منہ کو موڑیں گے
پیار کرتی جو تھی وہ غیرت حور


رکھا ملنے کا اس نے یہ دستور
پنج شنبہ کو جاتی تھی درگاہ
واں سے آتی تھی میرے گھر وہ ماہ
عیش ہونے لگے مرے ان کے


غیر جلنے لگے یہ سن سن کے
آتش ہجر
اتفاق ایسا پھر ہوا ناگاہ
دو مہینے تلک نہ آئی وہ ماہ


قطع سب ہو گئے پیام و سلام
نہ رہی شکل راحت و آرام
طبع کو ہو گئی پریشانی
عقل کو تھی عجیب حیرانی


دل کو تشویش تھی یہ حد سے زیاد
دفعتاً پڑ گئی یہ کیا افتاد
تھی نہ مجھ سے یہاں کسی کو لاگ
کس نے اس طرح کی لگائی آگ


دل میں کس نے یہ اس کے بل ڈالا
جو مرے عیش میں خلل ڈالا
کچھ تو ایسا ہوا ہے افسانہ
جو یہاں تک نہ ہو سکا آنا


نہیں معلوم کیا پڑی افتاد
جو فراموش کی ہماری یاد
کون ایسا ہے جائے گھر اس کے
کس کو بھیجوں مکان پر اس کے


کیوں نہ بیزار ہوں میں جینے سے
نہیں دیکھا ہے دو مہینے سے
جان آنکھوں میں کھنچ کے آئی ہے
اب نہیں طاقت جدائی ہے


کرلیا ہو سکا جہاں تک صبر
اب کہو دل کرے کہاں تک صبر
دو مہینے نہ دیکھے جب گل کو
چین کس طرح آئے بلبل کو


رات پھر کس طرح گزاری جائے
کسی طرح دل کی بے قراری جائے
طبع کس طرح پھر بہل جائے
جسم سے روح جب نکل جائے


آخری ملاقات
آئی نوچندی اتنے میں ناگاہ
اس بہانے سے آئی وہ درگاہ
بس کہ مرتی تھی نام پر میرے


چھپ کے آئی وہاں سے گھر میرے
تھی نہ فرصت جو اشکباری سے
اتری روتی ہوئی سواری سے
پھر لپٹ کر مرے گلے اک بار


حال کرنے لگی وہ یوں اظہار
اقربا میرے ہوگئے آگاہ
تم سے ملنے کی اب نہیں کوئی راہ
مشورے یہ ہوئے ہیں آپس میں


بھیجتے ہیں مجھے بنارس میں
وہ چھٹے ہم سے جس کو پیار کریں
جبر کیونکر یہ اختیار کریں
گو ٹھکانے نہیں ہیں ہوش و حواس


پر یہ کہنے کو آئی ہوں ترے پاس
آخری التماس
جائے عبرت سرائے فانی ہے
مورد مرگ ناگہانی ہے


اونچے اونچے مکان تھے جن کے
آج وہ تنگ گور میں ہیں پڑے
کل جہاں پر شگوفہ و گل تھے
آج دیکھا تو خار بالکل تھے


جس چمن میں تھا بلبلوں کا ہجوم
آج اس جا ہے آشیانۂ بوم
بات کل کی ہے نوجواں تھے جو
صاحب نوبت و نشاں تھے جو


آج خود ہیں نہ ہے مکاں باقی
نام کو بھی نہیں نشاں باقی
غیرت حورمہ جبیں نہ رہے
ہیں مکاں گر تو وہ مکیں نہ رہے


جو کہ تھے بادشاہ ہفت اقلیم
ہوئے جا جا کے زیر خاک مقیم
کوئی لیتا نہیں اب اس کا نام
کون سی گور میں گیا بہرام


اب نہ رستم نہ سام باقی ہے
اک فقط نام نام باقی ہے
کل جو رکھتے تھے اپنے فرق پہ تاج
آج ہیں فاتحہ کو وہ محتاج


تھے جو خود سر جہان میں مشہور
خاک میں مل گیا سب ان کا غرور
عطر مٹی کا جو نہ ملتے تھے
نہ کبھی دھوپ میں نکلتے تھے


گردش چرخ سے ہلاک ہوئے
استخواں تک بھی ان کے خاک ہوئے
تھے جو مشہور قیصر و مغفور
باقی ان کا نہیں نشان قبور


تاج میں جن کے ٹکتے تھے گوہر
ٹھوکریں کھاتے ہیں وہ کاسۂ سر
رشک یوسف جو تھے جہاں میں حسیں
کھا گئے ان کو آسمان و زمیں


ہر گھڑی منقلب زمانہ ہے
یہی دنیا کا کارخانہ ہے
ہے نہ شیریں نہ کوہکن کا پتا
نہ کسی جا ہے نل دمن کا پتا


بوئے الفت تمام پھیلی ہے
باقی اب قیس ہے نہ لیلی ہے
صبح کو طائران خوش الحان
پڑھتے ہیں کل من علیہا فان


موت سے کس کو رستگاری ہے
آج وہ کل ہماری باری ہے
زندگی بے ثبات ہے اس میں
موت عین حیات ہے اس میں


ہم بھی گر جان دے دیں کھا کر سم
تم نہ رونا ہمارے سر کی قسم
دل کو ہمجولیوں میں بہلانا
یا مری قبر پر چلے آنا


جا کے رہنا نہ اس مکان سے دور
ہم جو مرجائیں تیری جان سے دور
روح بھٹکے گی گر نہ پائے گی
ڈھونڈھنے کس طرف کو جائے گی


روکے رہنا بہت طبیعت کو
یاد رکھنا مری وصیت کو
ضبط کرنا اگر ملال رہے
میری رسوائی کا خیال رہے


میرے مرنے کی جب خبر پانا
یوں نہ دوڑے ہوئے چلے آنا
جمع ہولیں سب اقربا جس دم
رکھنا اس وقت تم وہاں پہ قدم


کہے دیتی ہوں جی نہ کھونا تم
ساتھ تابوت کے نہ رونا تم
ہو گئے تم اگرچہ سودائی
دور پہونچے گی میری رسوائی


لاکھ تم کچھ کہو نہ مانیں گے
لوگ عاشق ہمارا جانیں گے
طعنہ زن ہوں گے سب غریب و امیر
قبر پر بیٹھنا نہ ہو کے فقیر


سامنا ہو ہزار آفت کا
پاس رکھنا ہماری عزت کا
جب جنازہ مرا عزیز اٹھائیں
آپ بیٹھے وہاں نہ اشک بہائیں


میری منت پہ دھیان رکھئیے گا
بند اپنی زبان رکھئے گا
تذکرہ کچھ نہ کیجئے گا مرا
نام منہ سے نہ لیجئے گا مرا


اشک آنکھوں سے مت بہائیے گا
ساتھ غیروں کی طرح جائیے گا
آپ کاندھا نہ دیجئے گا مجھے
سب میں رسوا نہ کیجئے گا مجھے


رنگ دل کے بدل نہ جائیں کہیں
منہ سے نالے نکل نہ جائیں کہیں
ساتھ چلنا نہ سر کے بال کھلے
تا کسی شخص پر نہ حال کھلے


ہوتے آتش کے ہیں یہ پر کالے
تاڑ جاتے ہیں تاڑنے والے
ہو بیاں گر کسی جگہ مرا حال
تم نہ کرنا کچھ اس طرف کو خیال


ذکر سن کر مرا نہ رو دینا
میری عزت نہ یوں ڈبو دینا
رنج فرقت مرا اٹھا لینا
جی کسی اور جا لگا لینا


ہوگا کچھ میری یاد سے نہ حصول
دل کو کر لینا اور سے مشغول
رنج کرنا نہ میرا میں قربان
سن لو گر اپنی جان ہے تو جہان


دے نہ اس کو خدا کبھی کوئی درد
ہو تا نازک کمال ہے دل مرد
دل میں کڑھنا نہ مجھ سے چھوٹ کے تو
رونا مت سینہ کوٹ کوٹ کے تو


آ کے رو لینا میری قبر کے پاس
تا نکل جائے تیرے دل کی بھڑاس
آنسو چپکے سے دو بہا لینا
قبر میری گلے لگا لینا


اگر آ جائے کچھ طبیعت پر
پڑھنا قرآن میری تربت پر
غنچۂ دل مرا کھلا جانا
پھول تربت پہ دو چڑھا جانا


رو کے کرنا نہ اپنا حال زبوں
تا نہ ہو جائے دشمنوں کو جنوں
دیکھئے کس طرح پڑے گی کل
سخت ہوتی ہے منزل اول


میرے مرقد پہ روز آنا تم
فاتحہ سے نہ ہاتھ اٹھانا تم
ہے یہ حاصل سب اتنی باتوں سے
مٹی دینا تم اپنے ہاتوں سے


عمر بھر کون کس کو روتا ہے
کون صاحب کسی کا ہوتا ہے
کبھی آ جائے گر ہمارا دھیان
جاننا ہم پہ ہو گئی قربان


دل میں کچھ آنے دیجیو نہ ملال
خواب دیکھا تھا کیجیو یہ خیال
رنج و راحت جہاں میں تو ام ہے
کہیں شادی ہے اور کہیں غم ہے


ہے کسی جا پہ جشن شام و پگاہ
ہے کسی جا صدائے نالہ و آہ
مرگ کا کس کو انتظار نہیں
زندگی کا کچھ اعتبار نہیں


پھر ملاقات دیکھیں ہو کہ نہ ہو
آج دل کھول کر گلے مل لو
خوب سا آج دیکھ بھال لو تم
دل کی سب حسرتیں نکال لو تم


آؤ اچھی طرح سے کر لو پیار
کہ نکل جائے کچھ تو دل کا بخار
دل میں باقی رہے نہ کچھ ارمان
خوب مل لو گلے سے میں قربان


حشر تک ہو گی پھر یہ بات کہاں
ہم کہاں تم کہاں یہ رات کہاں
کہہ لو سن لو جو کچھ کہ جی میں آئے
پھر خدا جانے کیا نصیب دکھائے


دل کو اپنے کرو ملول نہیں
رونے دھونے سے کچھ حصول نہیں
ہم کو گاڑے جو اپنے دل کو کڑھائے
ہم کو ہے ہے کرے جو اچک بہائے


عمر تم کو تو ہے ابھی کھینا
دن بہت سے پڑے ہیں رو لینا
باہیں دونوں گلے میں ڈال لو آج
جو جو ارمان ہوں نکال لو آج


پھر خدا جانے کیا مشیت ہے
اتنی صحبت بہت غنیمت ہے
کل کسے بیٹھ کر کرو گے پیار
کس کی لو گے بلائیں تم ہر بار


کل گلے سے کسے لگاؤ گے
یوں کسے گود میں بٹھاؤ گے
حال کس کا سنائے گی آ کر
کس کی ماما بلائے گی آ کر


ہم تو اٹھتے ہیں اس مکاں سے کل
اب تو جاتے ہیں اس جہاں سے کل
یاد اپنی تمہیں دلاتے جائیں
پان کل کے لئے لگاتے جائیں


ہو چکا آج جو کہ تھا ہونا
کل بسائیں گے قبر کا کونا
خاک میں ملتی ہے یہ صورت عیش
پھر کہاں ہم کہاں یہ صحبت عیش


دیکھ لو آج ہم کو جی بھر کے
کوئی آتا نہیں ہے پھر مر کے
ختم ہوتی ہے زندگانی آج
خاک میں ملتی ہے جوانی آج


چپ رہو کیوں عبث بھی روتے ہو
مفت کاہے کو جان کھوتے ہو
سمجو اس شب کو شب برات کی رات
ہم ہیں مہماں تمہارے رات کی رات


چین دل کو نہ آئے گا تجھ بن
اب کے بچھڑے ملیں گے حشر کے دن
اب تم اتنی دعا کرو مری جان
کل کی مشکل خدا کرے آسان


پھل اٹھایا نہ زندگانی کا
نہ ملا کچھ مزا جوانی کا
دل مین لے کر تمہاری یاد چلے
باغ عالم سے نا مراد چلے


کہتی ہے بار بار ہمت عشق
ہے یہی مقتضائے غیرت عشق
چارپائی پہ کون پڑ کے مرے
کون یوں ایڑیاں رگڑ کے مرے


عشق کا نام کیوں ڈبو جائیں
آج ہی جان کیوں نہ کھو جائیں
جب تلک چرخ بے مدار رہے
یہ فسانہ بھی یادگار رہے


بولی گھبرا کے پھر ٹھہر مری جان
کچھ سنا بھی کہ کیا بجا اس آن
حسرت دل نگوڑی باقی ہے
اور یہاں رات تھوڑی باقی ہے


گود میں اپنی پھر بٹھا لو جان
پھر گلے سے ہمیں لگا لو جان
ڈال دو پھر گلے میں باہوں کو
پھر گلوری چبا کے منہ میں دو


پھر کہاں ہم کہاں یہ صحبت یار
کر لو پھر ہم کو بھینچ بھینچ کے پیار
پھر مرے سر پہ رکھ دو سر اپنا
گال پھر رکھ دو گال پر اپنا


پھر اسی طرح منہ کو منہ سے ملو
پھر وہی باتیں پیار کی کر لو
لہر پھر چڑھ رہی ہے کالوں کی
بو سنگھا دو تم اپنے بالوں کی


پھر ہم اٹھنے لگیں بٹھا لو تم
پھر بگڑ جائیں ہم منا لو تم
پھر لبوں کو چبا کے بات کرو
پھر ذرا مسکرا کے بات کرو


پھر بلائیں تمہاری یار لیں ہم
آؤ پھر سر سے سر اتار لیں ہم
رو نہ اس طرح سے تو زار و قطار
دشمنوں کو کہیں چڑھے نہ بخار


آپ اچھے بھلے بچھڑ جائیں
اور لینے کے دینے پڑ جائیں
کاٹ لے کوئی دھڑ سے سر میرا
بال بیکا نہ ہو مگر تیرا


میں دل و جاں سے ہوں فدا تیری
لے کے مر جاؤں میں بلا تیری
اب تو کیوں ٹھنڈی سانسیں بھرتا ہے
کیوں مرے دل کے ٹکڑے کرتا ہے


میں ابھی تو نہیں گئی ہوں مر
کیوں سجائی ہیں آنکھیں رو رو کر
اس قدر ہو رہا ہے کیوں غمگیں
کیوں مٹاتا ہے اپنی جان حزیں


کر نہ رو رو کے اپنا حال زبوں
ارے ظالم ابھی تو جیتی ہوں
اشک بہتے ہیں ناگوار ترے
تو نہ رو ہو گئی نثار ترے


ایسے قصے ہزار ہوتے ہیں
یوں کہیں مردوے بھی روتے ہیں
یوں تو آنسو نہ تو بہا اپنے
دل کو مضبوط رکھ ذرا اپنے


رنج سے میرے کچھ اداس نہ ہو
یوں تو للہ بد حواس نہ ہو
تم تو اتنے میں ہو گئے رنجور
تھک گئے اور ابھی ہے منزل دور


اسی غم نے تو مجھ کو مارا ہے
صدمہ تیرا نہیں گوارا ہے
اپنے مرنے کا کچھ نہیں ہے الم
دل میں میرے فقط ہے اس کا غم


جان ہم نے تو اس طرح کھوئی
کون تیری کرے گا دل جوئی
آ کے سمجھائے گا بجھائے گا کون
اس طرح سے گلے لگائے گا کون


کون رو کے گا اس طبیعت کو
کس سے کہہ جاؤں اس وصیت کو
گو کہ بے جا ترا ہراس نہیں
کوئی دل سوز بھی تو پاس نہیں


میں کہاں ہوں جو ساتھ دوں تیرا
ہاتھ میں کس کے ہاتھ دوں تیرا
یوں تسلی تری کرے گا کون
میری صورت بھلا مرے گا کون


کون یوں خوش کرے گا دل تیرا
دل ہے اس غم سے مضمحل تیرا
جی لگے گا نہ ساتھ میں اس کا
دل لئے رہنا ہاتھ میں اس کا


پر میں اب اس کا کیا کروں کمبخت
آسماں دور ہے زمیں ہے سخت
گو کہ عقبیٰ میں رو سیاہ چلی
مگر اپنی سی میں نباہ چلی


جی کو تم پر فدا کیا میں نے
حق وفا کا ادا کیا میں نے
بولی پھر زانوؤں پہ مار کے ہاتھ
نہیں معلوم اب ہے کتنی رات


جوں جوں گھڑیال واں بجاتا تھا
جی مرا سنسنایا جاتا تھا
یوں تو کوئی نہ درد و غم میں کڑھے
پھولے جاتے ہیں ہاتھ پاؤں مرے


کچھ عجب ہو رہا ہے جان کا طور
کہتی ہوں کچھ نکلتا ہے کچھ اور
آنسو آنکھوں میں بھر بھر آتے ہیں
دست و پا سارے تھرتھراتے ہیں


دل کو سمجھاتی ہوں میں بہتیرا
پر سنبھلتا نہیں ہے جی میرا
گو تو بیٹھا ہوا ہے پاس مرے
پر ٹھکانے نہیں حواس مرے


ہوش آئے ہوئے بھی جاتے ہیں
دل میں کیا کیا خیال آتے ہیں
پیش یوں فرقت حبیب نہ ہو
کسی دشمن کو بھی نصیب نہ ہو


دوسرا اب یہ اور ماتم ہے
سانگ باقی بہت ہیں شب کم ہے
خاک تسکین جان زار کریں
اب وصیت کریں کہ پیار کریں


سن کے میں نے دیا یہ اس کو جواب
دل کو میرے بس اب کرو نہ کباب
تم تو یوں اپنی جان دو مری جان
میں وصیت سنوں خدا کی شان


دل سے رکھنا ذرا یہ اپنے دور
کون کمبخت یہ کرے گا امور
مجھ پہ یہ دن تو کبریا نہ کرے
تم مرو میں جیوں خدا نہ کرے


جان دے دو گی تم جو کھا کر سم
میں بھی مرجاؤں گا خدا کی قسم
جو یہ دیکھے گا خوب روئے گا
آگے پیچھے جنازہ ہوئے گا


اک ذرا مجھ سے تو کہو یہ حال
جی میں کیا آیا آپ کے یہ خیال
دل ہی دل میں الم اٹھاتی ہو
جان دیتی ہو، زہر کھاتی ہو


پہونچا ماں باپ سے اگر ہے الم
اس کا کرنا نہ چاہئیے تمہیں غم
جو کہ ہوتے ہیں قوم کے اشراف
یوں ہی کرتے ہیں وہ قصور معاف


کچھ تمہیں پر نہیں ہے یہ افتاد
سب کے ماں باپ ہوتے ہیں جلاد
صدمہ ہر اک پہ یہ گزرتا ہے
زہر کھا کھا کے کوئی مرتا ہے


شکوہ ماں باپ کا تو ناحق ہے
ان کا اولاد پر بڑا حق ہے
ہوں جو ناراض یہ قیامت ہے
ان کے قدموں کے نیچے جنت ہے


تم تو نام خدا سے ہو دانا
اس پہ رتبہ نہ ان کا پہچانا
کیا بھروسہ حیات کا ان کی
نہ برا مانو بات کا ان کی


ہوش رہتے نہیں ہیں اس سن کے
یہ تو مہمان ہیں کوئی دن کے
اتنی سی بات کا غبار ہے کیا
ان کے کہنے کا اعتبار ہے کیا


غور سے کیجئے جو دل میں خیال
ان کا غصہ نہیں ہے جائے ملال
سن کے اس نے دیا یہ مجھ کو جواب
ہم نے دیکھی نہیں ہے چشم عتاب


بے حیا ایسی زندگی کو سلام
منہ پہ آئے نہ تھے کبھی یہ کلام
طعنے سنتی ہوں دو مہینے سے
موت بہتر ہے ایسے جینے سے


خون دل کب تلک پیے کوئی
بے حیا بن کے کیا جیے کوئی
نوج انسان بے حمیت ہو
آدمی کیا نہ جس کو غیرت ہو


بات وہ کس طرح بشر سے اٹھے
نہ سنی ہو کبھی جو کانوں سے
وہ سنے جس کو اس کی عادت ہے
اس میں کیا اپنی اپنی غیرت ہے


پر مرے جیتے جی تو بہر خدا
اپنے مرنے کا ذکر منہ پہ نہ لا
کون سا پڑ گیا ہے رنج و محن
جان کیوں دیں گے آپ کے دشمن


تم نے جی دینے کی جو کی تدبیر
حشر کے روز ہوں گی دامن گیر
تو سلامت جہاں میں رہ مری جاں
نکلیں ماں باپ کے ترے ارماں


واسطے میرے اپنا دل نہ کڑھا
چاند سی بنو گھر میں بیاہ کے لا
ہے یہی لطف زندگانی کا
دیکھ سکھ اپنی نوجوانی کا


چار دن ہے یہ نالہ و فریاد
عمر بھر کون کس کو کرتا ہے یاد
لطف دینا کے جب اٹھاؤ گے
ہم کو دو دن میں بھول جاؤ گے


آخری گھڑیاں
تھا یہی ذکر جو بجا گھڑیال
سنتے ہی اس کے ہو گئی بے حال
ہو گیا فرط غم سے چہرہ زرد


دست و پا تھرتھرا کے ہو گئے سرد
مردنی رخ پہ چھا گئی اس کے
دل میں وحشت سما گئی اس کے
دل میں گزرا جو اس کے صبح کا شک


ہوئی استادہ جا کے زیر فلک
ٹھنڈی جس دم چلی نسیم سحر
ہو گیا حال اور بھی ابتر
اتنے میں صبح کی بجی وردی


دونی چہرے کی ہو گئی زردی
ہوئے ثابت جو صبح کے آثار
ہو گئی اور اس کی حالت زار
بید کی طرح جسم تھرایا


سر سے لے پاؤں تک عرق آیا
باتیں کرنی جو تھیں سو بھول گئی
دم لگا چڑھنے سانس پھول گئی
بولی گھبرا کے رہیو اس کے گواہ


اور کہا لا الہ الا اللہ
اب فقط یہ ہے خوں بہا میرا
بخش دیجو کہا سنا میرا
کہہ کے وہ پھر چمٹ گئی اک بار


اور کیا خوب بھینچ بھینچ کے پیار
سر سے لے کر بلائیں تا بہ قدم
بولی تم پر نثار ہوتے ہیں ہم
آگ لگ جائے وہ گھڑی کمبخت


بام پر آئی تھی میں کون سے وقت
پھر یہ بولی وہ پوچھ کر آنسو
میرے سر کی قسم نہ کڑھیو تو
آزماتی تھی تجھ کو کستی تھی


میں ترے چھیڑنے کو ہنستی تھی
مفارقت
کہہ کے یہ بات ہو گئی وہ سوار
یاں بندھا آنسوؤں کا آنکھ سے تار


آتش غم بھڑک گئی دونی
تپش قلب نے کی افزونی
یاد آتی تھی جب وصیت یار
وہم لاتا تھا دل ہزار ہزار


تھی مصیبت جو یہ بلا انگیز
دھیان آتے تھے کیا کیا وحشت خیز
دل میں کہنے کا اس کے تھا جو ملال
آتے تھے ذہن میں عجیب خیال


کون روکے گا جا کے گھر بیٹھے
جو کہا ہے وہی نہ کر بیٹھے
ہر گھڑی تھا جو اضطراب فزوں
چپکا روتا تھا بیٹھا میں محزوں


کہ اٹھا ایک سمت سے وہ غل
ہوش جس سے کہ اڑ گئے بالکل
شعلہ اک آگ کا بھڑکنے لگا
مثل بسمل کے دل تڑپنے لگا


یوں تو گزرے تھے دوپہر روتے
اور ہاتھوں کے اڑ گئے توتے
ہو گیا دل کو اس طرح کا ہراس
آئے سو سو طریق کے وسواس


کہا اک دوست سے کہ تم جا کر
جلد اس شور و غل کی لاؤ خبر
روتے ہیں ہم سے بد نصیب کوئی
مر گیا ان کا کیا حبیب کوئی


یوں جو اپنی یہ جان کھوتے ہیں
کون ہیں کس لیے یہ روتے ہیں
کیا ہوا ان پہ صدمۂ جاں کاہ
یہ جو کرتے ہیں ایسے نالہ و آہ


دوڑے آخر ادھر مرے احباب
لے کر آئے خبر وہاں سے شتاب
کیا اس طرح آ کے مجھ سے بیاں
کہ یہاں سے ہے اک قریب مکاں


باغ کے پاس جو بنا ہے گھر
واں فروکش ہے ایک سوداگر
یوں تو اک شور راہ بھر میں ہے
پر یہ آفت انہیں کے گھر میں ہے


صاف کھلتا نہیں ہے یہ اسرار
مر گیا کوئی یا کہ ہے بیمار
پر یہ ہوتا ہے عقل سے ادراک
کہ نہیں بے سبب اڑاتے خاک


کچھ نہ کچھ تو ہے ایسی ہی روداد
کہ یہ ہے شور نالہ و فریاد
نہیں برپا یہ بے سبب ماتم
ہے نکلتا کسی جوان کا دم


ہر بشر ہو رہا ہے دیوانہ
کوئی مرتا ہے صاحب خانہ
نہیں قابو میں ہے کسی کا دل
پیٹتے سر ہیں صاحبان محل


نہیں دیتا سنائی کچھ بالکل
ہے فقط ایک ہائے ہائے کا غل
تھمتا اک دم بھی واں خروش نہیں
کس سے پوچھیں کسی میں ہوش نہیں


روتے جس درد سے ہیں وہ اس دم
دیکھا جاتا نہیں خدا کی قسم
کہہ گئی تھی جو وہ کہ کھاؤں گی زہر
میں یہ سمجھا کہ ہو گیا وہی قہر


گو حیا سے نہ اس کا نام لیا
دونوں ہاتھوں سے دل کو تھام لیا
دوستوں نے جو دیکھی یہ صورت
بولے اس طرح از رہ الفت


حال دل یوں تمہارا غیر تو ہے
مگر اس وقت کیا ہے خیر تو ہے
بے سبب کس لئے ہوئے ہو اداس
اڑ گئے کیوں تمہارے ہوش و حواس


کون سی آفت آ گئی اس دم
مردنی منہ پہ چھا گئی اس دم
کیا ہے جو اتنے بے قرار ہو اب
کوئی مرجائے تم سے کیا مطلب


ایسی حالت جو بیچ و تاب کی ہے
تم کو کیا وجہ اضطراب کی ہے
شہر میں لوگ روز مرتے ہیں
خفقان اس کا کوئی کرتے ہیں


فکر کرنا ہے اس طرح کی زبوں
یونہی ہو جاتا ہے بشر مجنوں
سن کے ماں باپ کیا کہیں گے بتاؤ
ہوش پکڑو ذرا حواس میں آؤ


تم کو کیا ہے جو جان کھوتے ہو
بے سبب آپ ہی آپ روتے ہو
ہو رہے ہو ملول کس غم سے
حال دل کا تو کچھ کہو ہم سے


طعنہ آمیز دوستوں کے بیاں
ہوئے معلوم نشتر رگ جاں
نہ دیا ان کو مارے غم کے جواب
ڈھانپ کر منہ کیا بہانۂ خواب


اٹھ گئے دوست آشنا جس دم
کھول کر منہ کو چپکے اٹھے ہم
حال دل سینہ میں ہوا جو تباہ
بیٹھا کمرے سے آن کر سر راہ


دیکھا برپا ہے ایک حشر کا غل
بھیڑ سے بند راہ ہے بالکل
اس طرف سے جو لوگ آتے ہیں
یہی آپس میں کہتے جاتے ہیں


والدین کا ماتم
حال ان کا بھی جائے رقت ہے
داغ اولاد کا قیامت ہے
نوچ ڈالے ہیں سارے سر کے بال


کیا پریشاں ہے والدین کا حال
آفت تازہ سر پہ ہے آئی
بک رہے ہیں مثال سودائی
دھیان ان کی طرف جو جاتا ہے


غم سے منہ کو کلیجہ آتا ہے
جو کہ تھے ان میں صاحب اولاد
حال ابتر تھا ان کا حد سے زیاد
کہتے تھے کوٹ کر سر و سینہ


کیوں نہ دشوار ان کو ہو جینا
مرگ اولاد کا وہ ماتم ہے
رنج و غم جس قدر کریں کم ہے
کوئی کہتا تھا کیسی آفت ہے


نوجواں مرنا بھی قیامت ہے
یوں تو ہے از پئے زمانا مرگ
نہ مرے پر کوئی جوانا مرگ
آتش غم سے دل ہوا ہے کباب


ہے تپاں مثل ماہئ بے آب
چشمہ جاری ہے چشم گریاں کا
ہوش باقی نہیں تن و جاں کا
نہیں دم بھر کسی کو واں آرام


دیکھنے والے رو رہے ہیں تمام
پھوڑ ڈالے ہیں سب نے سر اپنے
سر و پا کی نہیں خبر اپنے
بنئے بقال جان کھوتے ہیں


سارے دوکان دار روتے ہیں
حال دیکھا جو میں یہ اٹھ کر
ہل گیا سینے میں دل مضطر
نہ رہی تاب رنج کے مارے


لگے تھرانے دست و پا سارے
بحر الفت نے دل میں مارا جوش
گر پڑا ہو کے خاک پر بے ہوش
عشق کی تھی جو دل کو بیماری


غش کا عالم سا ہو گیا طاری
دو گھڑی بعد پھر جو آیا ہوش
دیکھا برپا عجب ہے جوش و خروش
محبوب کا جنازہ


آگے آگے ہے کچھ جلوس رواں
سر کھلے کچھ ہیں پیچھے پیر و جواں
سن رسیدہ ہیں عورتیں کچھ ساتھ
سینہ و سر پہ مارتی ہیں ہاتھ


کوئی ماما ہے کوئی دائی ہے
کوئی انا کوئی کھلائی ہے
جب وہ بھرتی ہیں غم سے آہ سرد
سننے والوں کے دل میں ہوتا ہے درد


ہوتا غیروں کو ہے ملال ان کا
دیکھا جاتا نہیں ہے حال ان کا
کچھ بیاں ایسے ہوتے جاتے ہیں
راستے والے روتے جاتے ہیں


اس کے پیچھے پڑی پھر اس پہ نگاہ
کہ نہ دیکھے بشر معاذاللہ
شامیانہ نیا زری کا ہے
نیچے تابوت اس پری کا ہے


سہرا اس پر بندھا ہے اک زرتار
جیسے گلشن کی آخر ہو بہار
تھی پڑی اس پہ ایک چادر گل
جس سے خوشبو نکلتی تھی بالکل


عود سوز آگے آگے روشن تھے
مر گئے پر بھی لاکھ جوبن تھے
بھیڑ تابوت کے تھی ایسی ساتھ
جیسے آئے کسی دلہن کی برات


سب وضیع و شریف تھے ہمراہ
بھیڑ تھی اس قدر کہ تنگ تھی راہ
ساتھ تھے خویش و اقربا سارے
رو رہے تھے غریب بے چارے


پیچھے پیچھے تھا سب سے سوداگر
مو پریشاں، اداس، خاک بسر
آگے آگے جنازہ جاتا تھا
غش اسے ہر قدم پہ آتا تھا


ہاتھ تھامے تھے اقربا سارے
تا کسی جا پہ سر نہ دے مارے
حال اس درجہ ہو رہا تھا زبوں
بہتا جاتا تھا سر کے زخم سے خوں


سب امیر و فقیر روتے تھے
دیکھ کر راہ گیر روتے تھے
پیچھے سب کے پنس میں تھی مادر
کہتی جاتی تھی اس طرح رو کر


تیری میت پہ ہو گئی میں نثار
کم سخن ہائے میری غیرت دار
دل پہ جو گزری کچھ بیان نہ کی
کچھ وصیت بھی میری جان نہ کی


کچھ نہیں ماں کی اب خبر تم کو
کس کی یہ کھا گئی نظر تم کو
دل ضعیفی میں میرا توڑ گئیں
بیٹا اس ماں کو کس پہ چھوڑ گئیں


تازہ پیدا جگر پہ داغ ہوا
گھر مرا آج بے چراغ ہوا
دل کو ہاتھوں سے کوئی ملتا ہے
جی سنبھالے نہیں سنبھلتا ہے


زہر دے دے کوئی میں کھا جاؤں
یا زمیں شق ہو میں سما جاؤں
داغ تیرا جگر جلاتا ہے
چاند سا مکھڑا یاد آتا ہے


مٹ گیا لطف زندگانی کا
دل کو غم ہے تری جوانی کا
بیاہ تیرا رچانے پائی نہ میں
کوئی منت بڑھانے پ]ائی نہ میں


تیری صورت پہ ہوگئی قرباں
چلیں دنیا سے کیسی پر ارماں
ہوئیں کس بات پر خفا بولو
اماں واری ذرا جواب تو دو


بولتیں تم نہیں پکارے سے
اب جیوں گی میں کس سہارے سے
کیا قضا نے جگر پہ داغ دیا
آج گھر میرا بے چراغ کیا


نکلا ماں باپ کا نہ کچھ ارمان
ہائے بیٹا نہ تم چڑھیں پروان
ایسی اس ماں سے ہوگئیں بیزار
لی نہ خدمت بھی پڑ کے کچھ بیمار


نہ جیؤں گی ترے فراق میں میں
دل تڑپتا ہے آنکھیں ڈھونڈتی ہیں
کس مصیبت میں پڑ گئی بیٹا
کوکھ میری اجڑ گئی بیٹا


عمر کٹنی تھی ایسے صدمے میں
ٹھوکریں تھیں لکھی بڑھاپے میں
سن کے اس طرح اس کی ماں کے بین
اور سینے میں دل ہوا بے چین


تھی وصیت جو اس پری کی یاد
سب کے پیچھے میں ہو لیا ناشاد
گو یہ طاقت نہ تھی کہ چلتا راہ
لے چلا جذب عشق پر ہمراہ


پیچھے ان سب کے جو رواں تھا میں
صورت گرد کارواں تھا میں
گہ تڑپتا تھا صورت بسمل
بیٹھ جاتا تھا گاہ تھام کے دل


جوں جوں کرتا تھا ضبط میں نالہ
دل ہوا جاتا تھا تہ و بالا
مرغ بسمل کی میری صورت تھی
یاں گرا واں گرا یہ حالت تھی


العرض پہنچا ساتھ ان کے وہاں
دفن کا اس کے تھا مقام جہاں
قبر کھدتی جو واں نظر آئی
لاکھ روکا پہ چشم بھر آئی


دیکھ کر یہ جو لوگ رونے لگے
ٹکڑے ٹکڑے جگر کے ہونے لگے
طاقت ضبط گر یہ جب نہ رہی
دل سے اپنے یہ میں نے بات کہی


کہہ کے کیا مر گئی وہ جان تجھے
کچھ وصیت کا بھی ہے دھیان تجھے
ہو نہ للہ بے قرار اتنا
ضبط کر نالہ ہو سکے جتنا


دل کو سمجھا کے یہ گیا میں وہاں
جمع سب ان کے اقربا تھے جہاں
دل آفت زدہ کو بہلا کر
چپکا بیٹھا میں اک طرف جا کر


اشک آنکھوں سے گو نہ بہتے تھے
لوگ پر دیکھ کر یہ کہتے تھے
حال چہرے کا آج کیسا ہے؟
خیر تو ہے مزاج کیسا ہے؟


لال آنکھیں ہیں تمتمائے ہیں گال؟
وجہ کیا ہے بیان کیجئے حال؟
منہ پہ اک مردنی سی چھائی ہے
چہرے پر چھٹ رہی ہوائی ہے


بولا میں اور کچھ نہیں ہے بات
شب کو سویا نہیں میں ساری رات
اس پہ پیدل جو آیا میں مجبور
رنگ چہرے کا ہو گیا کافور


ترک عادت بھی اک عداوت ہے
رات کا جاگنا قیامت ہے
دل کا شک ان کے سب نکال دیا
یہی کہہ سن کے ان کو ٹال دیا


غل ہوا اتنے میں سب آتے جائیں
فاتحہ پڑھتے جائیں جاتے جائیں
سن کے یہ سب گئے وہاں احباب
بخشا پڑھ پڑھ کے فاتحہ کا ثواب


جب کہ اس سے بھی ہو گئی فرصت
آئے جتنے تھے ہو گئے رخصت
پائی تنہا جو میں نے یار کی قبر
دل کو باقی رہی نہ طاقت صبر


تھا جو اس شمع رو کا پروانہ
دوڑا کر آیا مثل دیوانہ
گر پڑا آ کے قبر پر اک بار
اور رونے لگا میں زار و قطار


نہ رہا تھا جو اختیار میں دل
لوٹا تربت پہ صورت بسمل
مر گئی تھی جو مجھ پہ وہ گلفام
زندگی ہو گئی مجھے بھی حرام


دیکھا آنکھوں سے تھا جو ایسا قہر
کھا گیا میں بھی گھر میں آ کر زہر
دوپہر تک تو قے رہی جاری
بعد پھراس کے غش ہوا طاری


تین دن تک رہی وہ بے ہوشی
ہو گئی جس سے خود فراموشی
عین غفلت میں پھر یہ دیکھا خواب
کہ یہ کہتی ہے وہ بچشم عتاب


سن تو رے تو نے زہر کیوں کھایا
کچھ وصیت کا بھی نہ پاس آیا
ہوئے خود رفتہ ایسے حد سے زیادہ
دو ہی دن میں بھلا دی میری یاد


دل سے میرا بھلا دیا کہنا
ہاں یہی چاہیئے تھا کیا کہنا
کہہ کے یہ جب وہ ہو گئی روپوش
کھل گئی آنکھ، آ گیا مجھے ہوش


زہر کا پھر نہ کچھ اثر پایا
اک تعجب سا مجھ کو یہ آیا
آشنا دوست سب کا تھا یہ بیان
مردے جی اٹھے لو خدا کی شان


ہو گیا والدین کو یہ سرورر
بڑھ گیا دل کا چین چشم کا نور
اقربا سن کے ہو گئے دل شاد
آ کے دینے لگے مبارکباد


حاصل اتنا تھا اس کہانی سے
ہم رہے جیتے سخت جانی سے
عشق میں ہم نے یہ کمائی کی
دل دیا غم سے آشنائی کی